Pahayag 8 - Inkeanon

Ginsamad it Tiyo it Karnero ro IkaPito nga Selyo ku Binaeueon nga Sueueatan

¹ Kat hasamad eon ku Tiyo it Karnero ro ikapito nga selyo ku ratong binaeueon nga sueueatan hay naghilipos ro tanan nga idto sa eangit it mga tunga sa oras.

² Hakita ko dayon ro pitong ka anghel nga nagatindog sa atubang it Dyos ag hakita ko man nga gintaw-an sanda it tig sambilog nga trumpeta.

³ Nag-abot man dayon ro sambilog pa nga anghel nga may daea nga bueawan nga sueunugan it insenso ag nagtindog dayon imaw sa altar. Gintaw-an dayon imaw it kaabo-abo nga insenso agod ihaead sa bueawan nga altar nga idto sa atubang it trono, kaibahan it mga pangamuyo ku tanan nga mga katawhan it Dyos.

⁴ Ag ro aso ku insenso hay nagtub-ok sa Dyos kaibahan ku mga pangamuyo it mga katawhan it Dyos nga nagahalin sa sueunugan it insenso nga ginabuytan ku anghel ngato.

⁵ Ginbutangan dayon ku anghel it baga nga halin sa altar ro sueunugan ngato it insenso ag ana dayon rato nga gineapog sa kalibutan. Gulpi eang dayon nga nagpinangilat ag nagdinaeugdog it kabaskog ag may kaibahan nga linog.

Mga Iba Pang Larawan ku Pagpina it Dyos sa mga Maeain nga Tawo

⁶ Nagpahaom dayon tag pitong ka anghel nga nagatindog sa atubang it Dyos sa pagpatunog ku andang mga trumpeta.

⁷ Ginpatunog ku primero nga anghel ro anang trumpeta ag may gineapog dayon sa kalibutan nga yelo ag kaeayo nga may halo nga dugo. Ro tersya parti ku kalibutan hay nasunog, pati ro tersya parti ku mga kahoy ag ro tanan nga buhi nga hilamunon.

⁸ Ginpatunog man dayon ku pangaywa nga anghel ro anang trumpeta ag may matsa mabahoe nga bukid nga nagakaeayo nga gineapog sa dagat ag ro tersya parti ku dagat hay nahimo nga dugo.

⁹ Ag ro tersya parti ku tanan nga nagakabuhi sa dagat hay nagkaeamatay ag tersya parti ku tanan nga barko hay nagkaeawasak.

¹⁰ Ginpatunog man ku pangatlo nga anghel ro anang trumpeta ag may nahueog halin sa eangit nga kabahoe-bahoe nga bituon nga nagakaeayo pareho it sueo. Tumugpa rato sa tersya parti it tanan nga mga suba ag mga tuburan.

¹¹ Ro bituon ngato hay ginatawag nga Mapait ngani nangin mapait ro tersya parti ku tubi sa kalibutan. Imaw ron nga nagkaeamatay ro kaabo nga mga tawo nga nakainom ku tubi ngato nga mapait.

¹² Ginpatunog man ku ika-4 nga anghel ro anang trumpeta ag may bumunae sa tersya parti it adlaw, buean, ag mga bituon agod mabuhinan it tersya parti ro andang kahayag. Ngani sang tersya parti it kada adlaw hay kadueom-dueom, ag sa sang tersya parti man it kada gabii hay owa naghayag ro buean ag mga bituon.

¹³ Samtang nagatan-aw ako hay may hakita ako nga agila nga nagaeupad it kataas-taas sa kaeangitan ag nagasinggit. Sinana, “Makangingidlis gid it duro ro matabo sa mga nagaistar sa kalibutan! Grabi pa gid ro magakaeatabo kon patunugon eon ku tatlo pa nga habilin nga anghel ro andang mga trumpeta.”