Pahayag 7 - Inkeanon

Ginpangmarkahan ro mga Katawhan it Dyos Agod Maeuwas Sanda sa Anang Pina

¹ Pagkatapos karon, may hakita ako nga ap-at nga ka anghel nga nagatindog sa ap-at nga ka pamusod it kalibutan agod pugngan ro ap-at nga ka diriksyon nga ginahalinan it hangin. Ginapugngan nanda ro hangin agod indi gid ra maghuyop sa eugta, sa dagat, ukon sa bisan ano nga kahoy.

² Sanda ro gintaw-an ku Dyos it otoridad nga samaron ro eugta ag ro dagat. Nakita ko dayon ro isaeang ka anghel nga nagsubat halin sa sidlangan. May ginabuytan ra imaw nga pangmarka. Ro pangmarka ngato hay ana ku buhi nga Dyos. Nagsinggit dayon imaw sa ap-at nga ka anghel ngato.

³ Hambae nana, “Ayaw anay ninyo pagsamara ro eugta, ro dagat ukon ro kakahuyan kon indi pa himarkahan ro dahi ku mga nagaserbi sa atong Dyos.”

⁴ Habatian ko nga ro kaabuon ku tanan nga mga ginpangmarkahan sa dahi hay 144,000 halin sa 12 nga ka tribo ni Israel.

^5-8 Tig 12,000 ka tawo ro ginmarkahan halin sa kada tribo nga ruyon hay tribo ni Juda, ni Reuben, ni Gad, ni Asher, ni Naftali, ni Manase, ni Simeon, ni Levi, ni Isacar, ni Zebulun, ni Jose ag ni Benjamin.

Idto sa Eangit hay Indi Eon Makaagi it Kasubo Ro mga Katawhan it Dyos

⁹ Pagkatapos kara hay may hakita ako nga kaabo-abo nga mga tawo nga owa it bisan sin-o nga makahuyap. Mga myembro sanda it kada rasa, kada linahi, kada tribo ag ro andang mga linggwahe hay ro tanan nga linggwahe iya sa kalibutan. Nagatindog sanda sa atubang ku nagapungko sa trono ag ku rato nga ginatawag nga Tiyo it Karnero. Nagasuksuk sanda it mahaba nga puting eambong ag nagabuyot sanda it mga dahon it palmera.

¹⁰ Nagasininggit sanda it mabaskog, “Daeayawon ro aton nga Dyos nga nagapungko sa trono, ag ro Tiyo it Karnero dahil sanda ro ginhalinan it kaeuwasan.”

¹¹ Idto man nagatindog ro tanan nga mga anghel. Nagapalibot sanda sa ratong nagapungko sa trono, sa mga manogdumaea, ag sa ap-at ngato nga ka buhi nga mga tinuga. Pagkatapos hay naghapa sanda sa atubang ku trono ag nagsimba sa Dyos.

¹² Hambae nanda, “Matuod gid ro among ihambae ngara! Ro Dyos ro aton nga dayawon, pasaeamatan ag padunggan hasta sa owa it katapusan dahil sa anang kaaeam, gahom ag kusog. Matuod gid.”

¹³ Ginpangutana dayon ako it isaea sa mga manogdumaea ngato. Hambae nana, “Rayang mga nagasuksuk it puti, sayod mo baea kon sin-o gid sanda ag kon siin ra sanda maghaealin?”

¹⁴ Nagsabat ako, “Tao ngani, Sir, owa ako kasayod. Ikaw 't-a ro nakasayod karon.” Nagsabat imaw, “Daya ro mga nakaagi it grabi nga kalisdanan pero nakalibre. Gineabhan ag ginpaputi nanda ro andang mga eambong sa dugo it Tiyo it Karnero.

¹⁵ Mawron nga una eon sanda sa atubang it trono it Dyos ag nagaserbi sanda kana adlaw-gabii idto sa eangit nga anang pinakatemplo. Ag imaw nga nagapungko sa trono ro magaiba kanda permi ag ana sanda nga diparahon.

¹⁶ Ngani indi eon gid sanda pagkueangon it pagkaon o ilimnon bisan hasta hin-uno. Ag indi man eon sanda mapaso sa pwerti kainit nga silak it adlaw o bisan ano pa nga makasueunog.

¹⁷ Ro Tiyo it Karnero abi nga una sa atubang it trono it Dyos ro magabantay kanda pareho it manogbantay it karnero ag magadaea kanda permi sa mga tuburan nga nagatao it kabuhi nga owa it katapusan. Pagapahiron man it Dyos ro euha sa andang mga mata ag owa eon it makapatangis pa kanda it uman.”