Pahayag 6 - Inkeanon

Ginsamad ku Tiyo it Karnero ro Pitong ka Selyo ku Binaeueon nga Sueueatan

¹ Ag samtang gatan-aw ako hay ginsamad ku Tiyo it Karnero ro isaea sa pitong ka selyo ku ratong binaeueon nga sueueatan. Habatian ko dayon ro isaea sa ap-at nga ka buhi nga tinuga nga naghambae nga ro anang limog hay parehas it daeugdog. Hambae nana, “Maliya.”

² Ag may hakita dayon ako nga puti nga kabayo nga nag-abot ag ro gasakay dikato hay may ginabuytan nga pana. Gintaw-an dayon imaw it korona. Tapos, pumanaw imaw agod makig-away ag perdihon tanan ro anang mga kaaway.

³ Ag pagsamad it Tiyo it Karnero ku pangaywa nga selyo, habatian ko nga naghambae ro ikaywa sa ap-at nga ka buhi nga tinuga, “Maliya.”

⁴ Nag-abot dayon ro isaea pa nga kabayo nga ro kolor hay puea. Ro nagasakay dikato hay gintaw-an it gahom nga dueaon ro paghidait it mga tawo iya sa kalibutan agod magpaeatyan sanda. Gintaw-an man imaw it mabahoe nga espada.

⁵ Tag ginsamad it Tiyo it Karnero ro pangatlo nga selyo hay habatian ko ro ikatlo sa ap-at nga ka buhi nga tinuga nga naghambae, “Maliya.” May hakita dayon ako nga isaeang ka kabayo nga nag-abot nga ro kolor hay itom, ag ro nagasakay dikato hay may ginabuytan nga kiluhan.

⁶ May habatian dayon ako nga naghambae nga matsa halin sa tunga ku ap-at nga ka buhi nga tinuga. Sinana, “Magtuga ka it sobrang tiggueutom sa bilog nga kalibutan agod ro presyo it sang kilo nga harina nga trigo hay sang adlaw man nga sweldo it sangka trabahador. Makaruyon man ro presyo it tatlong kilo nga harina nga sebada. Pero ayaw pagtabinga ro presyo it bino ag eana.”

⁷ Ag kat ginsamad ku Tiyo it Karnero ro pangap-at nga selyo hay habatian ko nga naghambae ro ika-4 sa ap-at nga ka buhi nga tinuga, “Maliya.”

⁸ May hakita dayon ako nga kabayo nga maeuspad. Ro ngaean ku nagasakay rikato hay Kamatayon ag nagasunod man kana ro ginatawag nga Hades (nga ro kahueugan hay lugar it mga patay). Gintaw-an sanda it otoridad sa pagpatay ku ika-4 nga parti it tanan nga mga tawo sa kalibutan. Gamiton nanda ro armas, grabi nga gutom, epidemya, ag mga mabangis nga sapat sa paghimo kara.

⁹ Tag ginsamad ku Tiyo it Karnero ro ikalima nga selyo ku binaeueon nga sueueatan hay hakita ko dayon sa ubos it altar ro mga kaeag ku mga tawo nga ginpamatay tungod sa andang pagtuman sa hambae it Dyos ag sa andang matutom nga pagpamatuod parti kara.

¹⁰ Nagsilinggit sanda it mabaskog. Sinanda, “Eabing gamhanan nga Ginuong Dyos, balaan ag masaligan, hin-uno mo pa't-a hukman ro mga tawo sa kalibutan agod imong baslan ro mga nagpatay kamon?”

¹¹ Gintaw-an dayon ro kada isaea kanda it mahaba nga puting eambong, ag ginhambaean nga magpahuway-huway anay sanda ag hueaton nga makompleto ro kaabuon ku iba pa nandang mga kaigmanghuran nga mga isigkapareho nanda nga mga nagaserbi sa Dyos nga pagapatyon man pareho kanda.

¹² Samtang nagatan-aw ako hay ginsamad ku Tiyo it Karnero ro ika-6 nga selyo. Naglinog dayon it grabi kabaskog, owa naghayag ro adlaw ag kadueom-dueom gid nga mayad ro palibot ag ro buean hay nangin mapuea pareho it dugo.

¹³ Ro mga bituon hay nagkaeatagak pareho it pugoy nga bunga it kahoy nga ginhuyop it kabaskog nga hangin.

¹⁴ Ag kadungan karon ro pagkapihak it eangit ag pagbalilin it mansigka pihak nga matsa binalilin nga sueueatan, ag ro mga bukid ag ro mga isla hay gin-ilisdog halin sa andang dating mga lugar.

¹⁵ Hinadlukan ro tanan nga mga tawo. Ro mga hari, ro mga haeangdon, ro mga pinuno it mga soldado, ro mga manggaranon, ro mga poderoso, ag ro tanan nga mga ordinaryo nga tawo, mga ulipon man o bukon hay nagpaeanago sa eungib ag sa mga kabatuhan sa kabukiran.

¹⁶ Nagsinggit sanda tanan sa mga bukid ag sa mga bato, “Tup-ayi kami agod hitabunan kami ag indi kami hikita ku nagapungko sa trono, ag agod indi namon hisamitan ro kaakig ku Tiyo it Karnero!

¹⁷ Nag-abot eon abi ro makahaeadlok nga adlaw kon siin ipakita nanda ro andang grabi nga kaakig ag owa it makatakod karon!”