Pahayag 4 - Inkeanon

Ginpakita kay Juan ro Pagpanimbahon sa Eangit

¹ Pagkatapos karon, nagtangda ako sa eangit ag nakakita ako it bukas nga pwertahan. Habatian ko it uman ro limog nga matsa tunog it trumpeta kon pamatian. Hambae nana, “Saka iya ay ipakita ko kimo kon ano ro dapat nga matabo sa paeaabuton.”

² Insigida hay gin-gamhan ako ku Espirito it Dyos ag gindaea ako sa eangit ag idto't-a hay may trono ag may nagapungko idto.

³ Ro anang hitsura hay nagaidlak pareho it maeahaeon nga mga bato nga jasper ag kornalina. Sa palibot ku anang trono hay may baeangaw nga ro kolor hay pareho it bato nga esmeralda.

⁴ Ro ana nga trono hay nalibutan it 24 nga ka trono ag may nagapueungko man idto nga 24 nga ka mga manogdumaea. Nakasuksuk sanda it puti ag may korona sanda nga bueawan.

⁵ May mga kilat ag mabaskog nga daeugdog nga nagahalin sa trono ngato sa tunga. Sa atubang kato hay may pito nga ka sueo nga may sindi ag rato ro nagasimbolo ku pito nga ka espirito it Dyos.

⁶ Sa atubang man it trono hay may matsa dagat nga saeaming nga nagaidlak pareho it kristal. Sa palibot it trono ngato sa tunga hay may ap-at man nga ka buhi nga mga tinuga nga ro andang eawas hay lipos it mga mata, sa atubang ag sa likod.

⁷ Ro hauna hay matsa liyon ro itsura. Ro pangaywa hay matsa tiyo it baka. Ro pangatlo hay may uyahon nga matsa ana it tawo. Ag ro pangap-at hay matsa agila nga nagaeupad.

⁸ Kada isaea kanda hay may an-om nga ka pakpak ag lipos gid it mata ro andang bilog nga eawas. Sige ro andang hinambae adlaw-gabii it, “Balaan, balaan, balaan ro Ginuong Dyos nga makagagahom. Imaw ro nagakabuhi hasta sa owa it katapusan, owa it ginhalinan ag ro manog-abot.”

⁹ Kada magdayaw, magpadungog ag magpasaeamat ro ap-at nga ka tinuga ngato sa nagapungko sa trono nga nagakabuhi hasta sa owa it katapusan,

¹⁰ ro 24 ngato nga ka manogdumaea hay nagahapa sa pagsimba sa atubang it nagalingkod sa trono nga nagakabuhi hasta sa owa it katapusan. Ginabutang man nanda ro andang korona sa atubang ku anang trono ag nagahambae sanda,

¹¹ “Ikaw nga among Ginuo ag Dyos hay takos gid nga dayawon, ag padunggan tungod sa imong pagkagamhanan ay ikaw ro nagtuga ku tanan. Ag tungod man sa imong pagbuot hay gintuga mo sanda ngani iya sanda.”