Pahayag 22 - Inkeanon

¹ Ginpakita man dayon kakon it anghel ro suba nga ro anang tubi hay nagatao it kabuhi. Matin-aw gid ro tubi pareho it kristal ag nagahalin rato sa trono it Dyos ag ku Tiyo it Karnero,

² ag nagailig rato sa tunga it mayor nga karsada ku syudad. Sa magtimbang nga pangpang ku suba hay may tig sambilog nga kahoy nga nagatao it kabuhi. Nagabueunga rato kada buean, ngani sa sueod it sang dag-on hay dose beses man rato sanda magbueunga. Ag ro dahon ku ratong mga kahoy hay nagatao it mayad nga eawas sa tanan nga tawo sa bilog nga kalibutan, ngani owa eon idto it nagamasakit.

³ Owa gid it bisan ano nga ginsumpa it Dyos sa ruyon nga syudad. Idto gid ro trono it Dyos ag ku Tiyo it Karnero, ag idto man ro mga nagaserbi sa Dyos ag magasimba sanda kana.

⁴ Permi eon nandang makita ro anang itsura ag ro anang ngaean hay nasueat sa andang dahi.

⁵ Owa eon it gabii idto ngani owa sanda nagakinahangean it iwag ukon hayag it adlaw man, dahil ro Ginuong Dyos ro andang pinakaiwag ag magahari sanda kaibahan nana hasta sa owa it katapusan.

⁶ Naghambae dayon ro anghel, “Tanan nga ginsugid kimo hay matuod ag masaligan. Ro Ginuong Dyos nga nagtao ku anang Espirito sa paggiya ku paino-ino it mga propeta hay imaw man ro nagpaadto kakon nga anang anghel, agod ipasayod kinyo nga nagaserbi kana ro dapat nga magkaeatabo sa indi magbuhay.”

Magabalik Gid Iya si Jesus

⁷ Hambae ni Jesus, “Pamati kamo sa akong ihambae. Madali lang ako magbalik. Bulahan ro tanan nga ginaseryoso ro tanan nga nasueat sa rayang kasueatan.”

⁸ Ako nga si Juan ro nakabati ag nakakita ku tanan ngara. Pagkabati ag pagkakita ko karon hay naghapa ako sa atubang ku anghel nga nagpakita karon kakon agod simbahon imaw,

⁹ pero hambae nana kakon, “Ayaw! Ro Dyos eang ro imong simbahon. Ulipon man lang ako it Dyos pareho nimo, ag ku imong mga igmanghod sa pagtuo, ku mga propeta ag ku tanan nga nagatuman sa nasueat sa raya nga kasueatan.”

¹⁰ Hambae pa gid nana, “Ayaw pagtagua ro mga ginpahayag kimo sa rayang kasueatan tungod maeapit lang ro oras.

¹¹ Ro mga indi gid magtalikod sa paghimo it maeain hay magapadayon sa andang kaeainan ngaron, pero indi gid sanda makalikaw sa pina it Dyos kanda. Makaruyon man sa mga indi gid magtalikod sa paghimo it mahigko sa mata it Dyos. Pero ro mga matarong hay dapat nga magpadayon sa paghimo it matarong ag ro mga balaan hay dapat nga magpadayon man sa pagpakabalaan.”

¹² Hambae ni Jesus, “Pamati kamo. Madali lang ako magbalik ag baeusan ko ro kada isaea suno sa anang binuhatan.

¹³ Ako ro Alpha ag ro Omega, ro owa it ginhalinan ag ro owa man it katapusan, ro nag-umpisa ag ro magatapos ku tanan nga mga butang.”

¹⁴ Bulahan ro mga nagalinaba ku andang eambong dahil sanda ro may kinamatarong nga makasueod sa mga pwertahan ku syudad. May kinamatarong man sanda nga makakaon ku bunga ku kahoy nga nagatao it kabuhi.

¹⁵ Pero indi makasueod idto ro mga may buhat nga matsa ana it sapat, ro mga nagapangbarang, ro mga nagahulid sa bukon nanda it asawa, ro mga manogpatay, ro mga nagasimba sa mga diyos-diyos, ag ro tanan nga mga naila magpangluko ag magpinuril.

¹⁶ Hambae pa gid ni Jesus, “Ako nga si Jesus ro nagpaadto ku akong anghel agod magpamatuod parti sa mga butang ngara kinyo nga mga grupo it mga tumueuo. Apo gid ako ni Haring David, ag ako man ro ginatawag nga mahayag nga bituon nga nagapakita kon aga-aga.”

¹⁷ Hambae ku Espirito it Dyos ag ku nobya ku Tiyo it Karnero “Maliya.” Ag ro tanan nga kabati kara hay mahambae man it, “Maliya.” Ro bisan sin-o nga ginauhaw hay puyding magpaeapit. Ag ro naila mag-inom ku tubi nga nagatao it kabuhi hay puydi kainom it libre.

¹⁸ Ro tanan nga nakabasa sa mga nasueat sa rayang kasueatan hay ginapaandaman ko nga indi pagdugangan kon nano ro nasueat rikara. Ro bisan sin-o nga magadugang sa ginsueat rikara hay ipasamit man kana it Dyos ro mga kaeaeat-an nga ginsambit sa raya nga kasueatan.

¹⁹ Ag ro bisan sin-o man nga magabuhin sa mga nasueat sa rayang kasueatan hay bue-an man it Dyos it kinamatarong nga magkaon ku bunga it kahoy nga nagatao it kabuhi, ag bue-on man kana ro kinamatarong nga makasueod sa syudad it Dyos nga ginsueat sa rayang kasueatan.

²⁰ Naghambae dayon si Jesus nga nagapamatuod nga matuod ro tanan nga nasueat dikara, “Matuod gid nga madali lang ako mag-abot.” Kabay pa! Balik eon, Ginuong Jesus!

²¹ Kabay pa nga masamitan pa gid ninyo tanan ro sobrang kabuot ni Ginuong Jesus.