Pahayag 21 - Inkeanon

Ro Bag-o nga Kaeangitan ag Kalibutan

¹ Hakita ko dayon ro bag-o nga kaeangitan ag ro bag-o nga kalibutan, ay ro dati nga kaeangitan ag kalibutan hay owa eon, ag ro kadagatan hay naduea man.

² Hakita ko man dayon ro balaan nga syudad, ro Bag-o nga Jerusalem nga nagapanaog halin sa Dyos sa eangit. Kanamiton gid ro syudad pareho it nobya nga ginpagwapa para sa anang nobyo nga anang pakasaean.

³ May habatian dayon ako nga mabaskog nga limog nga halin sa trono. Hambae nana, “Pamati kamo, ro ilistaran it Dyos makaron hay sa ilistaran man it mga tawo. Una mismo imaw magaistar kaibahan nanda, ag sanda ro mangin anang mga katawhan. Imaw mismo ro magaiba kanda permi bilang andang Dyos.

⁴ Pahiron nana ro andang mga euha dahil owa eon it kasubo. Owa man it kamatayon, o pag-ueahab o kasakit dahil naduea eon ro tanan sa daan nga kalibutan.”

⁵ Naghambae dayon ro nagapungko sa trono, “Pamati kamo. Ginabag-o ko ro tanan nga mga butang.” Naghambae dayon imaw kakon, “Sueatan ro akong mga ginahambae dahil matuod ra ag masaligan.”

⁶ Naghambae pa gid imaw, “Natabo eon tanan ro gusto ko nga matabo. Ako ro Alpha ag ro Omega, ro nag-umpisa ag ro magatapos ku tanan nga mga butang. Ro ginauhaw hay paimnon ko it libre nga tubi nga nagahalin sa tuburan nga nagatao it kabuhi nga owa it katapusan.

⁷ Ro nagapadayon nga madinaeag-on sa andang pagsunod kakon hay makabaton ku ruyon tanan nga akong ginpromisa, ag ako ro mangin andang Dyos ag sanda ro mangin akong mga unga.

⁸ Pero ro mga mataeaw nga nagtalikod sa andang pagtuo dahil sa kahadlok nga magkalisod, ro mga indi magtuo, ro mga nagahimo it makangingil-ad, ro mga manogpatay, ro mga nagahulid sa bukon nanda it asawa, ro mga nagapangbarang, ro mga nagasimba sa mga diyos-diyos ag ro tanan nga mga purilon hay itapoe sa mga pinahan sa eawod nga nagadaba-daba ay may asupre rato nga nagakaeayo. Ruyon ro ginatawag nga ikaywa nga kamatayon.”

Ro Nobya ni Kristo Hay Ginasimbolo ku Bag-o nga Jerusalem

⁹ Nagpaeapit dayon kakon ro isaea sa pitong ka anghel ngato nga may daea nga pito ngato nga katapusan nga ka kaeaeat-an sa andang maeukong. Hambae nana kakon, “Maliya, ipakita ko kimo ro nobya nga mangin asawa it Tiyo it Karnero.”

¹⁰ Gin-gamhan dayon ako ku Espirito it Dyos ag gindaea ako ku anghel sa ibabaw it mataas nga bukid. Ginpakita dayon nana kakon ro balaan nga syudad nga ginatawag nga Jerusalem, nga nagpanaog halin sa Dyos sa eangit

¹¹ nga nagahayag dahil sa pagkadaeayawon it Dyos nga una kana. Ro anang siga hay pareho ku maeahaeon nga bato nga jasper nga nagabarlak pareho it kristal.

¹² Ro pader nga nagalibot sa syudad hay mataas ag may dose idto ka pwertahan, ag may tig sambilog nga anghel sa kada pwertahan. Ro kada pwertahan hay may nakasueat nga ngaean ku sambilog sa mga tribo ni Israel, nga ginpangaeanan suno sa 12 nanang ka mga unga.

¹³ Ro pader nga nagaatubang sa sidlangan hay may 3 nga ka pwertahan. Makaruyon man sa mga pader nga nagaatubang sa nakatundan, sa norte ag sa sur.

¹⁴ Ro mga pundasyon ku pader ngato hay human sa dose nga ka maeagko nga mga bato ag nakasueat man sa kada bato ro ngaean ku kada sambilog sa dose nga ka apostoles ku Tiyo it Karnero.

¹⁵ Ro anghel nga naghambae kakon hay may ginabuytan nga bueawan nga baston nga pangsukat agod anang hisukat ro syudad ag ro mga pwertahan ag ro pader.

¹⁶ Ro syudad hay kwadrado gid ay paeareho ro sukat it anang kahaba ag kaeapad. Ginsukat rato it anghel ag ro kahaba hay 2,400 kilometros, imaw man ro anang kaeapad ag kataas.

¹⁷ Ginsukat man ku anghel ro pader ag mga 66 metros rato it taas. Ro sukat nga gin-gamit ku anghel hay pareho sa sukat nga ginagamit it mga tawo.

¹⁸ Ro pader hay human sa maeahaeon nga bato nga jasper ag ro syudad hay human sa puro nga bueawan nga maeahaeon gid pareho it primira klasi nga saeaming.

¹⁹ Ro mga daeagko nga bato nga pundasyon ku pader hay nadekorahan it tanang klasi nga maeahaeon nga bato. Ro primero nga bato hay nadekorahan it jasper, ro pangaywa hay nadekorahan it safiro, ro pangatlo hay kalsedonia, ro pangap-at hay esmeralda,

²⁰ ro panglima hay sardonix, ro pangan-om hay kornalina, ro pangpito hay krisolito, ro pangwaeo hay beril, ro pangsiyam hay topaz, ro pangnapueo hay krisopraso, ro pang-onse hay hasinto ag ro pangdose hay ametista.

²¹ Ro kada isaea sa dose nga ka pwertahan hay human sa sambato eang nga perlas ag ro karsada ku ratong syudad hay puro gid nga bueawan pareho it matin-aw nga saeaming.

²² Owa ako it hakita idto nga templo ay ro pinakatemplo sa syudad ngato hay ro Eabing Makagagahom nga Ginuong Dyos ag ro Tiyo it Karnero.

²³ Owa man gakinahangean it hayag it adlaw o buean ro syudad ngato dahil mahayag eon rato sa kahayag ku pagkadaeayawon it Dyos, ag ro Tiyo it Karnero ro pinakaiwag idto.

²⁴ Ro mga tawo sa bilog nga kalibutan hay hayagan ku kahayag it syudad ngato. Tanan nga mga hari hay magadaea sa ratong syudad ku mga nagatao kanda it kadungganan.

²⁵ Permi nga bukas ro mga pwertahan ku syudad dahil owa eon it gabii idto.

²⁶ Ro pagkadaeayawon ag kadungganan ku mga tawo sa bilog nga kalibutan hay pagadaehon sa ratong syudad.

²⁷ Owa gid it bisan ano nga mahigko sa mata it Dyos nga makasueod idto. Indi man idto makasueod ro mga nagahimo it mga makangingil-ad nga mga butang o ro mga purilon. Ro makasueod eang idto hay ro mga nakasueat ro andang ngaean sa kasueatan it Tiyo it Karnero, nga listahan it mga gintaw-an it kabuhi nga owa it katapusan.