Pahayag 20 - Inkeanon

Ginpriso si Satanas sa Buho nga Owa't Katapusan ro Kadaeumon

¹ Ag nakakita ako it anghel nga nagpanaog halin sa eangit nga may ginabuytan nga mabahoe nga kadena ag yabi sa buho nga owa't katapusan ro kadaeumon.

² Ana dayon nga gindakop ro Dragon nga imaw man tag nagpakuno-kuno nga sawa kato anay, ag imaw man ro ginatawag nga Dyablo ukon Satanas. Ginkadenahan dayon imaw ku anghel ag indi imaw pagbuhian sa sueod it 1,000 nga dag-on.

³ Gineapog dayon imaw it anghel sa buho nga owa't katapusan ro kadaeumon ag gintakpan dayon ag ginselyuhan rato agod ipakita nga indi gid dapat pagbuksan rato agod indi eon nana mapataeang ro mga tawo sa bilog nga kalibutan sa sueod it 1,000 nga dag-on ngato. Pero pagkataliwan it 1,000 nga dag-on ngato hay dapat nga buhian imaw it uman, pero sa madali eang nga tyempo.

⁴ Ag nakakita ako it mga trono. Ro mga nagapungko idto hay ginpangtaw-an it otoridad nga maghukom. Hakita ko man ro mga kaeag ku mga ginpamugutan it ueo dahil sa andang pagpamatuod parti kay Jesus ag sa andang pagsugid ku mensahi it Dyos. Owa man sanda rato magsimba sa makahaeadlok nga sapat o bisan sa anang rebulto ngato. Owa man sanda magpabutang it tanda ku sapat sa andang dahi o alima. Nabanhaw sanda ag naghari kaibahan ni Kristo sa sueod it 1,000 nga dag-on ngato.

⁵ Dato ro hauna nga pagkabanhaw. Ro iba nga mga patay hay owa nabanhaw hasta owa natapos ro 1,000 nga dag-on ngato.

⁶ Bulahan gid-a ro mga masakpan sa hauna nga pagkabanhaw ay ginpaeain sanda bilang mga katawhan it Dyos. Sanda ngara hay indi gid makaagi it pangaywang kamatayon. Mangin mga saserdote sanda nga nagaserbi sa Dyos ag kay Kristo, ag magahari sanda kaibahan ni Kristo sa sueod it 1,000 nga dag-on ngato.

Ro Pagkaperdi ag Katapusan ni Satanas

⁷ Pagkatapos it 1,000 nga dag-on ngato hay paguwaon si Satanas halin sa buho nga ginprisuhan kana.

⁸ Magaguwa imaw agod pataeangon it uman ro mga tawo sa bilog nga kalibutan. Ginatawag sanda nga Gog ag Magog, ag kaabo-abo gid sanda pareho it baeas sa baybayon nga indi mahuyap. Tilipunon dayon nana sanda agod magpanggira.

⁹ Nageapta sanda sa bilog nga kalibutan ag andang ginlibutan ro tanan nga lugar nga ginaistaran ku mga katawhan it Dyos ag ro palangga nga syudad. Pero may kaeayo nga nanaog halin sa eangit ag gintugbang sanda tanan.

¹⁰ Ag si Satanas nga nagpataeang kanda hay gineapog sa eawod nga nagadaba-daba ay may asupre rato nga nagakaeayo nga gineapgan man kato sa makahaeadlok nga sapat ag sa nagpakuno-kuno nga propeta. Idto sanda pasakitan adlaw-gabii hasta sa owa it katapusan.

Ro Makahaeadlok nga Paghukom ag Pagpina it Dyos sa Tanan nga Maeain

¹¹ Ag nakakita ako it mabahoe nga puti nga trono, ag hakita ko man ro nagapungko idto, ag ro eangit ag ro eugta hay mat nagpaeagiw sa kahadlok sa nagapungko dikato. Naduea sanda nga matsa aso.

^12-13 Hakita ko man ro mga namatay nga nagatindog sa atubang it trono, ro mga kubos ag ro mga dungganon. Idto nagatindog ro tanan-tanan nga namatay, sa eugta man o sa dagat, nga naghalin sa Hades, ro lugar it mga patay. Ginbuksan dayon ro mga kasueatan kon siin nasueat ro andang binuhatan. Ginhukman dayon sanda it Dyos suno sa nasueat sa mga kasueatan ngato, kon ano ro andang mga binuhatan tag buhi pa sanda. Ginbuksan man ro sambilog pa gid nga ka kasueatan, nga listahan ku mga ngaean ku mga gintaw-an it kabuhi nga owa it katapusan.

^14-15 Ro tanan nga owa nakasueat ro andang ngaean sa kasueatan nga listahan ku mga gintaw-an it kabuhi nga owa it katapusan hay gineapog sa eawod nga nagakaeayo. Ro eawod nga nagakaeayo ngato hay imaw ro pangaywang kamatayon kon tawgon. Gineapog man dayon idto it Dyos ro kamatayon ag ro lugar it mga patay.