Pahayag 17 - Inkeanon

Ro Pina sa Bayi nga Bantog sa Pagbaligya ku Anang Eawas

¹ Nagpaeapit dayon kakon ro isaea sa pitong ka anghel ngato nga nagabuyot it tig sambilog nga maeukong. Hambae nana kakon, “Maliya agod ipakita ko kimo kon ano ro pina sa bayi nga bantog sa pagbaligya ku anang eawas. Idto imaw gapungko sa kaabo nga mga tubi.

² Ro mga pinuno iya sa kalibutan hay nagpakighilawas kana. Ag ro mga tawo iya sa kalibutan hay pareho it hilong sa anang makahieilong nga ilimnon nga nagasimbolo ku anang pagpakighilawas kanda.”

³ Gin-gamhan dayon ako it Espirito Santo ag gindaea ako it anghel sa *disyerto. Nakakita ako idto it isaeang ka bayi nga nagasakay sa isaeang ka puea nga makahaeadlok nga sapat. Ro sapat ngato hay may pitong ka ueo ag napueong ka sungay. Ro eawas ku sapat ngato hay puno it nakasueat nga mga tawag sa Dyos nga anang ginaako nga ana't-a.

⁴ Ro suksuk nga eambong ku bayi ngato hay puea ag violet pareho ku kolor it eambong it hari ag nadekorahan rato it bueawan ag maeahaeon nga mga bato ag mga perlas. May ginabuytan imaw nga bueawan nga ilimnan nga puno it makahieilong nga ilimnon nga nagasimbolo ku anang mga makangingil-ad ag mahigko nga pagpakighilawas nga permi nanang ginaobra.

⁵ May nakasueat man nga ngaean sa ana nga dahi nga ro kahueugan hay sekreto. Ro nasueat ngato hay “Bantog nga Babilonya, ina ku tanan nga nagabaligya ku andang eawas ag ginahalinan ku tanan nga mga makangingil-ad nga bueuhaton sa bilog nga kalibutan.”

⁶ Nakita ko nga hilong ro bayi ngato. Hilong ra imaw sa nag-agay nga dugo ku kaabo-abo nga mga katawhan it Dyos nga anang ginpamatay tungod sa andang pagtuo kay Jesus ag sa andang pagpamatuod parti kana. Hangawa gid ako it duro pagkakita ko sa bayi ngato

⁷ pero ro anghel hay naghambae kakon, “Ham-an it hangawa ka gid? Isugid ko kimo kon ano ro kahueugan ku bayi ag ku sapat nga anang ginasakyan nga may pitong ka ueo ag napueong ka sungay.

⁸ Ro sapat nga imong hakita hay buhi anay kato pero owa eon makaron. Pero sa indi magbuhay hay magaguwa imaw halin sa buho nga owa't katapusan ro kadaeumon. Pero ro anang dangaton hay pagadaehon imaw sa lugar nga pagapinahan kana hasta sa owa it katapusan. Ro mga tawo sa kalibutan nga owa sa listahan ku mga gintaw-an it kabuhi nga owa it katapusan nga nasueat bago pa gintuga ro kalibutan hay magakahangawa kon hikita nanda imaw. Hingawa ra sanda dahil buhi anay imaw kato ag naduea pero nagtunga eon man imaw it uman.

⁹ “Hara ro makabulig sa tawo nga maeubtan kon ano ro ginasimbolo dikara: Ro kahueugan ku pitong ka ueo hay pitong ka bukid nga ginapungkuan ku bayi. Nagakahueugan man rato it pitong ka hari.

¹⁰ Pero sa pito ngaron hay owa eon karon do lima, may sambilog nga una makaron ag may sambilog nga maabot pa. Pero dapat nga indi man ron magtenir it mabuhay.

¹¹ Ro sapat ngato nga buhi anay pero owa eon makaron hay mabilang nga ikawaeo nga hari pero nakaangot imaw sa pito ngato ay sanda ro anang mga ueo. Pero ro anang dangaton hay pina nga owa it katapusan sa impyerno.

¹² “Ro napueong ka sungay nga imong hakita hay napueong ka hari nga owa pa nagahari. Taw-an man ra sanda it otoridad nga maghari kaibahan ku makahaeadlok ngato nga sapat pero matsa sang oras eang it buhay.

¹³ Dahil pareho man lang ro andang tuyo ku makahaeadlok ngato nga sapat, ngani ipaidaeom lang nanda ro andang otoridad ag gahom kana.

¹⁴ Girahon nanda ro Tiyo it Karnero pero dahil imaw ra ro Pinakaginuo ku tanan nga manogdumaea ag Pinakahari ku tanan nga hari, perdihon nana sanda kaibahan ku anang mga masaligan nga katawhan nga anang pinili ag tinawag.”

¹⁵ Naghambae kakon ro anghel, “Ro kaabo nga mga tubi nga hakita mo nga ginapungkuan ku bayi nga bantog sa anang pagbaligya ku anang eawas hay mga kaabo-abo nga tawo nga mga myembro it kada rasa, kada linahi ag ro andang mga linggwahe hay ro tanan nga linggwahe iya sa kalibutan.

¹⁶ Ro makahaeadlok nga sapat ngato ag ro napueong ka hari nga ginarepresentar ku anang napueong ka sungay hay maugot sa bayi ngato. Bue-on nanda ro tanan nanang mga pagkabutang ag anda imaw nga ubahan hasta nga owa kana it hibilin. Pagakan-on nanda ro anang unod ag anda dayon nga sunugon ro mabilin kana.

¹⁷ Matabo ra dahil ginbutang ron it Dyos sa andang paino-ino agod matuman ro anang kabubut-on paagi sa andang pagkaeasugot nga ipaidaeom sa sapat ro andang ginharian hasta matuman ro tanan nga ginhambae it Dyos.

¹⁸ Ro bayi ngato nga imong hakita hay simbolo it bantog nga syudad nga nagahari sa tanan nga mga hari sa kalibutan.”