Pahayag 15 - Inkeanon

Gindayaw ro Dyos dahil sa Anang Pagpina sa mga Maeain

¹ Ro sambilog pa nga hakita nakon hay sambilog pa gid nga makakilibot ag makangawa-ngawa nga paeatandaan sa eangit. May pitong ka anghel nga may daea nga pito man nga ka kaeaeat-an. Daya ro katapusan nga pitong ka kaeaeat-an ag paagi man kara hay matapos eon ro kaakig it Dyos sa mga indi gid magtuo kana.

² May hakita man ako nga matsa dagat nga saeaming nga may nagadabdab nga kaeayo. Hakita ko man ro mga tawo nga nagperdi sa makahaeadlok nga sapat ag sa anang rebulto dahil owa sanda magtuman kana. Sanda rato ro mga owa nagpamarka ku anang ngaean o ku numero ku anang ngaean. Idto sanda nagatilindog sa matsa dagat ngato nga saeaming ag may buyot sanda nga harpa nga gintao kanda it Dyos.

³ Nagakanta sanda it kanta it pagdayaw sa Dyos pareho kanday Moises nga nagserbi anay sa Dyos. Kanta man rato ku Tiyo it Karnero. Raya ro andang kanta: “Ginuong Dyos nga makagagahom, ro imong buhat hay makakilibot ag makangawa-ngawa. Ikaw nga Hari it tanan nga rasa it tawo, matarong gid ag tama tanan ro imo nga mga hinimuan.

⁴ Sin-o abi ro indi magtaha kimo, Ginuo? Sin-o man abi ro indi magsugid ku imong pagkadaeayawon? Ikaw gid lang ro balaan. Ngani ro mga tawo sa bilog nga kalibutan hay magatilipon sa pagsimba kimo dahil hakita nanda ro mga matarong nimo nga mga buhat.”

⁵ Pagkatapos nanda kara it kanta hay hakita nakon nga nagbukas ro eangit nga pinakatemplo it Dyos, nga ginsimbolo kato anay ku Pinakasagrado nga Kwarto sa torda nga ginabutangan ku napueong ka sugo it Dyos.

⁶ Nagguwa dayon halin idto ro pito ngatong ka anghel nga may daea nga pitong ka kaeaeat-an. Nakasuksuk sanda it eambong nga maeahaeon ro tela nga malimpyo ag nagabarlak. Ag may bueawan nga tela nga nakabugkos sa andang dughan.

⁷ Pagguwa nanda, ro isaea sa ap-at ku mga buhi nga tinuga ngato hay nagtao kanda it tig sambilog nga bueawan nga maeukong nga puno it kaakig ku Dyos nga nagakabuhi hasta sa owa it katapusan.

⁸ Napuno it aso ro pinakatemplo it Dyos sa eangit nga nagapakita ku ana nga pagkadaeayawon ag gahom. Ngani owa idto it makasueod hasta nga indi matapos ro pito ngato nga ka kaeaeat-an nga daea ku pito man ngato nga ka anghel.