Pahayag 14 - Inkeanon

Ro Tiyo it Karnero ag ro mga Gintubos Nana nga Anang mga Katawhan

¹ Nagtan-aw ako it uman ag hakita ko ro Tiyo it Karnero nga nagatindog idto sa Bukid it Zion. Kaibahan nana ro 144,000 nga ka tawo nga ginmarkahan sa andang dahi ku ngaean ku Tiyo it Karnero ag ku ngaean ku anang Ama.

² Nakabati dayon ako it tunog halin sa eangit nga matsa nagahaganas nga kataas nga busay o mabaskog nga daeugdog. Ro limog ngato hay matsa tukar man it dagaya nga harpa.

³ Ro 144,000 nga ka tawo ngato hay nagatindog sa atubang ku nagalingkod sa trono, ag ku ap-at nga ka buhi nga mga tinuga, ag ku 24 ka mga manogdumaea ngato. Nagakanta sanda it bag-o nga kanta nga owa it ibang kaantigo kundi sanda eang, ay sanda ro tinubos it Tiyo it Karnero halin sa tanan nga tawo iya sa kalibutan agod mangin ana nga mga katawhan.

⁴ Sanda ra hay pareho sa mga eaki nga owa gid naghulid sa bukon nanda it asawa ay ro Tiyo it Karnero eang gid ro andang ginasimba. Raya ra sanda ro nagasinunod sa Tiyo it Karnero bisan siin imaw mag-adto. Sanda raya ro mga gintubos sa mga katawhan iya sa kalibutan ag ana sanda it Dyos ag ku Tiyo it Karnero, pareho sa primerong ani nga ginahaead sa Dyos.

⁵ Owa gid sanda nagpinuril ag owa gid kanda it ikasaway.

Ro mga Paandam it Dyos Paagi sa Tatlong ka Anghel

⁶ Nakakita dayon ako it sambilog pa nga anghel nga nagaeupad it kataas-taas sa kaeangitan, ag daea nana ro Mayad nga Balita nga anang isugid sa tanan nga mga tawo sa kalibutan, mga myembro it kada rasa, kada linahi, kada tribo, ag ro andang mga linggwahe hay ro tanan nga linggwahe iya sa kalibutan.

⁷ Nagsininggit ro anghel, “Magtaha kamo sa Dyos ag kilaeaha ninyo ro anang pagkadaeayawon dahil nag-abot eon ro oras ku anang paghukom. Simbaha imaw, imaw nga nagtuga ku kaeangitan, kalibutan, kadagatan ag mga tuburan.”

⁸ May ikaywa pa gid nga anghel nga nagsinggit, “Wasak eon! Wasak eon gid ro bantog nga syudad it Babilonya! Raya nga syudad hay ginwasak dahil gintinintar nana ro mga tawo sa tanan nga nasyon iya sa kalibutan nga magtalikod sa Dyos. Pareho imaw it sangka bayi nga maeain nga ginatinentar ro mga tawo nga mag-inom ku anang makahieilong nga ilimnon agod magpangawatan sanda kana.”

⁹ May pangatlo pa nga anghel nga nagsininggit. Hambae nana, “Ro bisan sin-o nga nagasimba sa sapat ag sa anang rebulto ag nagpabutang it anang marka sa andang dahi o alima man

¹⁰ hay paimnon gid ku puro nga makahieilong nga ilimnon it Dyos nga nagasimbolo ku anang grabi nga pina. Haom eon imaw sa pagpina kanda nga owa it kueukaeuoy. Pagapinahan sanda paagi sa kaeayo ag nagadaba-daba nga asupre samtang nagatan-aw ro mga anghel it Dyos ag ro Tiyo it Karnero.

¹¹ Ro aso ku kaeayo nga nagapasakit kanda hasta sa owa it katapusan hay padayon man nga nagatinub-ok. Indi gid kapahuway sa kasakit adlaw-gabii rato nga mga nagsimba sa sapat ag sa anang rebulto ag ginmarkahan ku anang ngaean.”

¹² Ngani ro mga ginpaeain it Dyos bilang anang mga katawhan hay dapat nga matinumanon permi sa anang mga sugo, ag magpakalig-on sa andang pagtuo kay Jesus.

¹³ May habatian eon man ako nga limog halin sa eangit. Hambae nana, “Sueatan ra. Halin makaron hay bulahan ro mga nagakaeamatay nga may maeueot nga kaangtanan sa Ginuo.” Nagsabat ro Espirito Santo, “Matuod ron dahil makapahuway eon sanda sa pagkinabudlay sa andang pagsunod kana ay indi malipatan it Dyos ro andang mayad nga binuhatan ag premyuhan nana sanda.”

¹⁴ Pagtan-aw ko pa gid it uman hay hato, may hakita ako nga puti nga daeaura. Sa daeaura ngato hay may nagapungko nga matsa Unga it Tawo nga may korona nga bueawan ag may ginabuytan imaw nga mataeom nga inoggaeab.

¹⁵ May sambilog pa dayon nga anghel nga nagguwa halin sa eangit nga pinakatemplo it Dyos ag nagsinggit sa Unga it Tawo ngato nga nagapungko sa daeaura. Hambae nana, “Panaw eon ag maggaeab ay oras eon nga anihon ro mga tawo sa kalibutan nga pareho it gianyon nga euto eon.”

¹⁶ Ngani ratong nagapungko sa daeaura hay naggaeab sa kalibutan ag ro tanan-tanan nga gianyon sa kalibutan hay anang gin-ani.

¹⁷ May sambilog pa gid dayon nga anghel nga nagguwa halin sa eangit nga pinakatemplo it Dyos nga nagabuyot man it mataeom nga inoggaeab.

¹⁸ May nagguwa man sa altar nga sambilog pa gid nga ka anghel. Imaw rato ro nagatatap ku kaeayo idto sa altar. Nagsinggit imaw sa rato nga anghel nga nagabuyot it mataeom nga inoggaeab. Sinana, “Panaw eon ag bageuton ku imong inoggaeab ro ubas sa kalibutan ay euto eon.”

¹⁹ Ngani, ginbageot ku anghel ro tanan nga ubas sa kalibutan ag ginbutang nana rato sa ginaeusakan it ubas nga nagasimbolo ku grabi nga kaakig it Dyos sa saea it mga tawo nga indi magtuo kana.

²⁰ Ro anang haani ngato hay gineusak sa eueusakan sa guwa it syudad. Ro duga nga nagguwa halin sa eueusakan hay dugo nga nag-ilig it mga 300 kilometros it eawig halin idto ag mga sang metro ag tunga it daeom.