Pahayag 12 - Inkeanon

Dugang pa nga Taean-awon Parti sa Pagkaperdi ni Satanas

¹ Pagkatapos kara hay may nagtunga sa eangit nga makangawa-ngawa nga taean-awon nga may ginapatungdan. May isaeang ka bayi nga ro anang eambong hay ro adlaw. Ro anang mga siki hay nagatungtong sa buean. May ana man nga korona nga doseng ka bituon.

² Nabdos imaw rato ag ginasaeapuan eon ngani nagasiyagit imaw sa kasakit.

³ May nagtunga pa gid sa eangit nga isaeang ka makangawa-ngawa nga taean-awon nga may ginapatungdan. May isaeang ka mabahoe ag puea nga dragon nga may pitong ka ueo ag napueong ka sungay. Ro kada ueo nana kato hay may korona.

⁴ Ginpaeas ku anang ikog ro tersya parti ku tanan nga bituon sa eangit ag nagkaeahueog rato sa kalibutan. Pumwesto dayon imaw sa atubang it bayi ngato nga manog-unga agod kon matawo eon ro eapsag hay ana rato nga tukbon.

⁵ Nag-unga eon dayon tag bayi ag eaki ro ana nga unga. Sa plano it Dyos, ratong unga ro magahari sa tanan nga rasa it tawo iya sa kalibutan. Ro anang pagdumaea hay strikto, ag matsa gagamit imaw it baston nga saesaeon sa pagpina sa tanan nga gakuntra kana. Ngani pagkatawo ku eapsag ngato, ro plano ku dragon hay owa natigayon ay ginhabnit ro eapsag ag gindaea sa Dyos nga idto sa anang trono.

⁶ Ag ro bayi ngato hay pumaeagiw eagi sa sangka lugar sa *disyerto nga ginpahaom kana ku Dyos agod idto imaw diparahon sa sueod it 1,260 diyas.

⁷ Ag hakita ko nga may gira sa eangit. Si Micael nga isaea sa mga anghel it Dyos ag ro anang mga ginadumaeahan nga anang mga isigkaanghel hay sumukoe it gira sa dragon, ag sa anang mga kaapin nga mga anghel man.

⁸ Pero owa it mahuman ro dragon, ngani imaw ag ro anang mga kaapin nga mga anghel hay naperdi ag ginsuboe sa eangit.

⁹ Ro kabahoe ngato nga dragon hay gineapog sa kalibutan pati ro anang mga kaapin nga mga anghel. Imaw man ra tag nagpakuno-kuno nga sawa kato anay, ag imaw man ro ginatawag nga Dyablo ukon Satanas. Halin pa kato hay ginapinataeang na eon ro mga tawo sa bilog nga kalibutan.

¹⁰ May habatian dayon ako nga mabaskog nga limog halin sa eangit. Hambae nana, “Kumpleto eon ro kaeuwasan ku mga katawhan it Dyos. Ginapakita eon nana ro anang gahom ag nagahari eon imaw. Ro Maneueuwas nga anang ginpromisa hay nagapakita man ku ana nga otoridad, tungod gineapog eon halin sa eangit ro manog-akusar sa atong mga kaigmanghuran sa pagtuo. Imaw ron ro nagainakusar kanda sa atubang it Dyos adlaw-gabii.

¹¹ Pero ginperdi nanda imaw paagi sa dugo ku ginatawag nga Tiyo it Karnero nga ginsakripisyo para sa andang mga saea, ag paagi sa andang pagpamatuod parti kay Jesus, bisan sayod nanda nga andang ikamatay ron.

¹² Ngani magkalipay kamo tanan nga nagaistar iya sa eangit! Pero makangingidlis ro matabo kinyo nga inha sa kalibutan ag sa kadagatan, tungod inha kinyo nanaog si Satanas. Naakig imaw it duro ay sangkiri eon lang ro anang oras nga habilin agod himuon ro anang gusto.”

¹³ Pagkatagumpaaw ku dragon nga indi eon imaw kahalin sa kalibutan kon siin imaw gineapog hay ana nga linagas tag bayi nga nag-unga it eaki agod hingabuton.

¹⁴ Pero ro bayi ngato hay gintaw-an it pakpak nga pareho it pakpak it mabahoe nga agila, agod makaeupad imaw paadto sa lugar sa *disyerto nga ginpahaom para kana, agod indi imaw hiabot ku dragon. Ag idto imaw diparahon it Dyos it tatlong dag-on ag tunga.

¹⁵ Pagkakita kara ku dragon hay binugahan na dayon ro bayi ngato it kaabo-abo nga tubi pareho it nagabaha nga suba agod ianod ra.

¹⁶ Pero ginbuligan it eugta ro bayi. Nagbuka rato ag mat hinigop ro tubi nga ginbuga ku dragon.

¹⁷ Naakig gid it duro sa bayi ro dragon ngani pumanaw imaw agod girahon ro iba pa nga mga unga ku bayi ngato. Ro mga unga ku bayi hay tag rato nga mga nagatuman sa mga kasuguan it Dyos ag nagapadayon sa andang malig-on nga pagtuo sa mensahi parti kay Jesus.

¹⁸ Nakita ko dayon nga nagatindog ro dragon sa sangka baybayon.