Mga TagaRoma 3 - Inkeanon

¹ Hay kon makaruyon, ano eon dayon ro bintaha it pagkaJudio o pagkatinuli?

² Abo gid-a ron. Una sa tanan, sa mga Judio gintugyan it Dyos ro anang mensahi sa Sagrado nga Kasueatan.

³ Matuod nga ro iba nga mga Judio hay indi masaligan nga magtuman karon pero nagakahueugan baea ron nga ro Dyos hay indi masaligan nga magtuman ku anang mga ginpromisa kanda?

⁴ Owa't-a ron! Bisan tanan pa nga tawo hay magpinuril, imposible nga magpinuril ro Dyos. Pareho sa nasueat sa Kasueatan, “agod mapamatud-an nga matuod ro tanan nimong ginahambae, ag agod magadaog ka kuntra sa mga nagapabangod kimo parti sa imong paghusgar.”

⁵ Kon ro atong buhat nga bukon it matarong hay mas gapakita nga matarong ro Dyos, mahambae baea naton nga saea imaw kon pinahan nana kita sa atong saea? (Bukon 't-a it raya ro akong ginaturo kundi ginahambae ko malang ro basi hambaeon it mga pilosopo.)

⁶ Indi't-a ron! Dahil kon indi pagpinahan it Dyos ro dapat pinahan hay gapakita ron nga bukon imaw it kwalipikado nga maghusgar ku bilog nga kalibutan.

⁷ Pero basi may maghambae man nga buko't tama nga pinahan imaw bilang makasasaea ay dahil sa anang pagpinuril hay mas makita nga matuod ro hambae it Dyos. Ag mas padunggan ro Dyos dahil karon.

⁸ Kon makaruyon man lang gali hay ham-an it indi lang kita maghimo it maeain ay kon mayad gali karon ro mangin bunga? May mga nagapabangod kamon nga makaruyon kuno ro among ginaturo. Dapat gid-a nga pinahan ro nagahambae karon.

Owa Gid it Bisan Sin-o nga Matarong sa Mata it Dyos

⁹ Hay ano, makahambae baea kita nga ro mga Judio hay mas ginapaeabi it Dyos kaysa sa mga bukon it Judio? Indi gid-a, dahil nga ginhambae ko eon nga paeareho man lang kita tanan, Judio man o bukon, nga hatetentar nga magpakasaea.

¹⁰ Pareho sa nasueat sa Sagrado nga Kasueatan, “Owa gid it bisan sambilog nga tawo nga matarong sa mata it Dyos.

¹¹ Owa gid it nakaeubot ku dangatan ku andang pagkamakasasaea, ag owa man it nagausoy it paagi nga makilaea ro Dyos.

¹² Tanan hay nagtalikod sa Dyos. Nangin owa sanda tanan it pueos. Owa it nagahimo it mayad. Owa gid bisan sambilog.”

¹³ “Ro mga pamisaea nga nagaguwa sa andang ba-ba hay makangingil-ad, pareho it hugom it nagakaeunot nga patay. Maeumo eang kanda magpinuril agod makapangdaya ku andang isigkatawo. Kon maghambae sanda hay dalitan, pareho ku dalit it sawa nga makamaeatay.”

¹⁴ “Puro eang sumpa ro gaguwa sa andang ba-ba dahil sa andang pagdumot.”

¹⁵ “Owa sanda nagaisaea-daywa kon gusto't-a nandang magpamatay.

¹⁶ Bisan siin sanda mag-adto hay kasamaran ag kasubo ro andang daea.

¹⁷ Sa bilog nandang kabuhi hay owa sanda it habadwan kon mauno makighidait sa andang isigkatawo.”

¹⁸ “Owa gid sanda it kahadlok sa Dyos.”

¹⁹ Sayod kita nga kon ano ro ginahambae sa Kasuguan it Dyos hay para gid anay sa tanan nga hauna nga gintaw-an kato, ag ruyon ro mga Judio. Ngani ro mga Judio man hay makasasaea pareho ku mga bukon it Judio. Ngani owa gid it bisan sin-o nga makabalibad nga owa sanda it saea ag ro bilog nga kalibutan hay dapat eang hukman it Dyos.

²⁰ Matuod ra ay owa gid it bilangon nga matarong sa panueok it Dyos paagi sa anang pagtuman sa mga kasuguan it Dyos dahil kon ginatinguhaan naton nga tumanon ro mga ruyon hay maklaro gid katon nga makasasaea gid kita.

Paagi eang sa Pagtuo kay Jesu-Kristo Mangin Matarong ro Tawo

²¹ Pero makaron hay ginpahayag eon ro plano it Dyos kon paalin mangin matarong ro tawo sa anang panueok ag bukon ron it paagi sa andang pagtuman sa mga kasuguan. Ro plano ngaron hay ginapamatud-an sa mga ginsueat ni Moises ag ku mga propeta sa Sagrado nga Kasueatan.

²² Rayang pagkamatarong sa panueok it Dyos hay paagi eang sa pagtuo kay Jesu-Kristo. Owa gid it pinaeabi kara

²³ dahil ro tanan hay nagkasaea ag owa gid it nakatupong sa pagkaperpekto it Dyos nga ana man nga sukatan para sa tanan nga tawo.

²⁴ Pero dahil sa sobrang kabuot it Dyos hay ginbilang nana kita nga matarong sa anang panueok. Owa ron nana pagpabayri katon dahil sa ginhimo ni Kristo Jesus agod tubson kita sa pina it atong mga saea.

²⁵ Imaw ro ginhaead it Dyos bilang sakripisyo agod paagi sa anang kamatayon hay mapatawad kita sa atong mga saea kon magtuo kita kana. Ginhaead it Dyos si Jesus bilang sakripisyo agod ipakita nga matarong 't-a imaw bisan matsa ginpataliwan nana ro mga saea ku mga tawo kato anay.

²⁶ Ginpinasensyahan nana ro saea ku mga tawo kato anay pero makaron, ro mga saea ngato hay gintapoe sa mga saea nga ginbayran ni Jesus paagi sa anang kamatayon sa krus. Gapakita eang ra nga matarong 't-a ro Dyos ag ana nga ginabilang nga matarong sa anang panueok ro tanan nga nagatuo kay Jesus.

²⁷ Hay makapabugae baea kita nga may atong nahimo agod bilangon kita it Dyos nga matarong sa anang panueok? Indi gid-a ron! Ham-an? Dahil bukon it ro atong pagtuman sa mga kasuguan ro rason nga ginabilang kita nga matarong kundi ro atong pagtuo't-a kay Jesus.

²⁸ Ngani owa nagabaylo ro atong tinindugan nga paagi eang sa pagtuo kay Jesus hay bilangon ro tawo nga matarong sa panueok it Dyos ag bukon it paagi sa pagtuman ku mga kasuguan.

²⁹ Eaom baea ninyo gihapon nga ro Dyos hay Dyos it mga Judio eang ag bukon 't-a it ana man ku mga bukon it Judio? Bukon it makaruyon ay ro Dyos hay Dyos man ku mga bukon it Judio.

³⁰ Matuod ra dahil sambilog eang ro Dyos ag owa eon it iba. Ag ginabilang nana nga matarong ro tanan nga nagatuo kay Jesus, Judio man o bukon.

³¹ Kon makaruyon, nagakahueugan baea ron nga indi eon dapat naton pagtumanon ro mga sugo it Dyos? Bukon 't-a ron! Aton 't-a gihapon nga ginatindugan ro haega ag tuyo ku mga sugo ngaron.