Mga TagaRoma 2 - Inkeanon

Matarong ro Paghukom it Dyos sa Tawo

¹ Basi mahambae kamo nga ro mga tawong makaruyon hay mga maeaot gid ag dapat pinahan ag kamo't-a hay matarong. Pero sa inyo ngarong pagkondenar kanda hay inyo man nga ginakondenar ro inyong kaugalingon ay paeareho man lang ro inyong mga buhat! Ngani bukon kamo it abswelto sa pina it Dyos!

² Sayod kita nga tama gid ro isintinsya it Dyos sa mga nagaobra it mga saea ngaron kon husgaran eon nana sanda.

³ Gaeaom baea kamo nga makalibre kamo sa paghukom it Dyos bisan nagahimo kamo it maeain pareho ku inyong mga ginakondenar?

⁴ Inyo nga ginabaliwala ro sobrang kabuot, pagtiniis ag pagpinasensya kinyo it Dyos. Owa't-a kamo kataeupangod nga ro anang kabuot hay nagagiya kunta kinyo sa paghinuesoe ag pagtalikod sa inyong mga saea ag pagpaeapit kana.

⁵ Pero gaalin kamo? Owa't-a kamo gahinuesoe ay mga matig-a kamo it ueo! Ngani ginadugangan pa gid ninyo ro inyong pina kon mag-abot eon ro adlaw it paghukom kon siin ipahayag it Dyos ro anang kaakig ag husgaran eon nana it matarong ro tanan nga tawo.

⁶ Pagabaeusan it Dyos ro kada isaea suno sa anang binuhatan.

⁷ Taw-an nana it kabuhi nga owa't katapusan ro nagapadayon nga nagahimo it mayad ay nagapaabot gid sanda nga padunggan ag itapoe sa kanami-nami nga kahimtangan nga owa it katapusan idto sa eangit.

⁸ Pero grabi nga kaakig it Dyos ro maagyan ku mga maisip nga owa nagatuman sa minatuod nga mensahi it Dyos kundi nagatuman 't-a sa andang mga kailigbon nga bukon it matarong.

⁹ Makaagi gid it paghingabot ag kalisod ro tanan nga nagahimo it maeain kapin gid ro mga Judio ag pati man ro mga bukon it Judio.

¹⁰ Pero ro mga nagahimo it mayad hay itapoe sa kanami-nami nga kahimtangan idto sa eangit, pagapadunggan ag taw-an it katawhayan ag kalinong, kapin gid ro mga Judio ag pati man ro mga bukon it Judio.

¹¹ Patas ro pagtratar it Dyos sa tawo ay owa imaw it pinaeabi.

¹² Pinahan it Dyos ro tanan nga nagkasaea. Ro mga bukon it Judio nga nagkasaea nga owa pagtaw-i ku *Kasuguan it Dyos hay pagapinahan nana sa impyerno. Indi nana paggamiton nga basehan ro Kasuguan sa paghusgar kanda. Pero ro mga Judio't-a nga gintaw-an ku Kasuguan, kon pagahusgahan it Dyos ro andang mga saea hay ro anang gamiton nga basehan hay ro Kasuguan ngaron.

¹³ Sintinsyahan sanda nga pinahan tungod bisan gintaw-an sanda ku Kasuguan hay owa man nanda ginatumana ngani indi sanda pagbilangon nga matarong sa panueok it Dyos. Dapat gid nga tumanon 't-a nanda ro Kasuguan ngaron indi eang pagpinamatian.

¹⁴ Bisan owa pagtaw-i ro mga bukon it Judio ku Kasuguan it Dyos, kon amat, ro andang kinaandan nga buhat hay nagakasinanto ma't-a sa Kasuguan. Owa matuod sanda kabati ku Kasuguan pero matsa gintanom sa andang paino-ino kon ano ro tama o bukon.

¹⁵ Kon gaobra sanda it mayad hay makita dikaron nga matsa nasueat sa andang tagipusuon ro ginasugo it Kasuguan. Ro anda nga konsensya hay nagapamatuod karon pati man ro andang paino-ino nga nagapasayod kanda kon tama o saea ro andang ginaobra.

¹⁶ Raya ngara tanan hay pagakonsiderahon kon mag-abot eon ro adlaw nga hukman it Dyos paagi kay Kristo Jesus ro tanan nga gin-isip ag ginhimo it mga tawo nga owa masayri it iba. Suno ra sa Mayad nga Balita nga akong ginawali.

Pagapinahan ro mga Judio nga Owa Magtuman sa Kasuguan nga Gintugyan Kanda

¹⁷ Sa akong mga isigkapareho nga Judio inha, ginapabugae ninyo nga mga Judio gid kamo ag nagapanalig kamo nga kamo hay gintugyanan it Dyos ku anang Kasuguan. Ag ginapabugae man ninyo nga ana kamo nga katawhan.

¹⁸ Sininyo hay hasayran man ninyo kon ano ro pagbuot it Dyos ag mayad man kamo magtimbang-timbang kon ano ro pinakamayad nga obrahon permi dahil hatun-an ninyo ro Kasuguan.

¹⁹ Sigurado man kamo nga bagay kamo nga maggiya sa mga matsa bulag, nga una pa sa kadueom it saea ag makatao kamo kanda it kahayag.

²⁰ Sigurado man kamo nga makaturo kamo sa mga ignoranti nga mga owa it buot kon mauno dapat magpangabuhi. Ag sininyo hay mahimo ninyo ron ay sayod ninyo ro Kasuguan it Dyos ag una rikaron ro tanan-tanan nga matuod nga dapat nga masayran it tawo.

²¹ Kamong mga nagaturo sa iba, ham-an it indi ninyo pagtud-an ro inyong kaugalingon? Nagaturo kamo nga “Indi magpanakaw.” Hay kamo, owa gid baea gapanakaw?

²² Sininyo hay “Ayaw magpangawatan.” Hay kamo, owa gid baea karon gahimo? Inyo gid nga ginakangil-aran ro pagsimba sa mga diyos-diyos pero owa gid baea ninyo ginatakawi ro mga templo ku mga diyos-diyos?

²³ Ginapabugae ninyo nga gintao it Dyos kinyo ro Kasuguan pero owa ninyo imaw ginatahura ay inyo man ron nga ginaeapas.

²⁴ Ngani dahil karon hay ginapakaeain ku mga bukon it Judio ro Dyos, pareho sa ginsueat sa Sagrado nga Kasueatan.

²⁵ Ayaw kamo magsalig nga makalibre kamo sa pina it Dyos dahil mga tinuli kamo. May pueos eang ron kon inyong tumanon ro Kasuguan. Pero kon indi hay owa gid it pueos ron ag pareho man lang kamo sa mga bukon it tinuli nga mga bukon it katawhan it Dyos.

²⁶ Pero kon tumanon ku mga bukon it Judio nga bukon it tinuli ro Kasuguan it Dyos hay bilangon nana sanda nga matsa mga tinuli ag anang mga katawhan.

²⁷ Ro pagtuman karon ku mga bukon it Judio nga bukon it tinuli hay magakondenar kinyo nga mga Judio, kamo nga tinuli ag gintaw-an ku Kasuguan nga una sa Sagrado nga Kasueatan pero owa man nagatuman.

²⁸ Ro sangka tawo hay bukon it isaea sa mga katawhan it Dyos dahil eang natawo imaw nga Judio ag nagasunod sa mga kustumbre it mga Judio o dahil tinuli imaw.

²⁹ Ro minatuod nga Judio sa panueok it Dyos hay ro tawo nga ro anang pagkaJudio hay sa sueod, bukon eang it sa guwa. Ag ro ana man nga pagkatinuli hay sa kabubut-on, bukon eang it sa eawas. Ro matuod nga pagtuli hay ro pagbag-o it kabubut-on paagi sa gahom it Espirito it Dyos ag bukon it paagi sa pagtuman sa Kasuguan. Bukon it importanti sa makaruyong tawo nga dayawon imaw it iba basta nalipay 't-a kana ro Dyos.