Mga TagaFilipos 4 - Inkeanon

Ro Katapusan nga mga Bilin ni Pablo

¹ Ngani, mga igmanghod, tumana ro mga ginbilin ko kinyo ay dikaron mangin malig-on ro inyong pagtuo sa Ginuo. Palangga ko kamo ag ginakahidlawan. Nagatao kamo kakon it kalipay ag kamo man ro akong pinakapremyo sa akong kinabudlayan.

² May akon man nga ginabilin kanday Eudia ag Sintique. Nagahinyo ako kinyong daywa nga magkaeasugot eon abi kamo ay magmaeanghod kamo sa Ginuo.

³ Ag ikaw, Susugos, tindugi ro kahueugan ku imong ngaean sa pagbulig sa mga bayi ngaron inha nga magkaeasugot. Nagpangabudlay gid ron sanda kaibahan nakon sa pagpaeapnaag ku Mayad nga Balita, kaibahan nanday Clemente ag ku iba pa nga kapareho nakon nga nagaserbi sa Ginuo. Ginsueat eon it Dyos ro anda tanan nga ngaean sa listahan ku mga gintaw-an it kabuhi nga owa it katapusan.

⁴ Magkalipay kamo permi tungod sa inyong maeueot nga kaangtanan sa Ginuo. Ginahambae ko kinyo it uman nga magkalipay kamo.

⁵ Mangin mabuot kamo sa tanan nga tawo. Dumduma ninyo nga madali eon lang magbalik ro Ginuo.

⁶ Maskin ano ro matabo, indi gid kamo magpinalitik ku inyong ueo kundi sa kada kahimtangan, magpangamuyo kamo ag magpangayo sa Dyos ku inyong mga kinahangean, ag permi man kamong magpasaeamat kana.

⁷ Kon himuon ninyo ron hay taw-an dayon nana kamo it katawhayan nga indi matungkad ku isip it tawo. Dahil sa inyong maeueot nga kaangtanan kay Kristo Jesus, rayang katawhayan hay pinakabantay nga nagaprotektar sa inyong tagipusuon ag isip agod indi eon kamo magpalitik.

⁸ Hara ro akong katapusan nga bilin kinyo, mga igmanghod: estudyuhi ninyo ro mga batasan it mga tawo nga makaraya agod inyong matuead: bukon it purilon ag madaya, taeahaon, matarong, putli, nahamut-an it tawo ag ginadayaw it tanan. Mayad gid ag daeayawon ro mga ruyon ngaron.

⁹ Tueara man ninyo ro tanan ninyong hatun-an kakon, rondatong inyong mga habatian nga ginturo nakon ag rondatong mga haobserbahan ninyo sa akong kabuhi. Kon himuon ninyo ra hay ibhan kamo it Dyos nga ginahalinan it katawhayan.

Ro Pagpasaeamat ni Pablo sa andang Ginpadaea nga Bulig

¹⁰ Kon parti ma't-a sa bulig nga inyong ginpadaea hay nalipay gid ako ag nagapasaeamat sa Ginuo nga pagkatapos it maeawig nga tyempo hay ginapakita eon man ninyo ro inyong pagkabaeaka kakon. Sayod ko nga owa gid ma't-ang ninyo halipati ku ratong tyempo ugaling hay owa kamo kato it kahigayunan nga makabulig kakon.

¹¹ Owa ako gahambae nga malipayon eang ako kon hasabat ro akong mga kinahangeanon ay nag-antigo eo't-ang nga makuntento kon ano ro akong kahimtangan.

¹² Nakaagi man ako nga imoe kon amat ag gapaeanubra man kon amat sa tanan nga bagay. Pero bisan ano ro matabo hay hasayran ko eon ro sekreto kon paalin mangin kuntento, kon busog ako o maskin gutom, kon bugana o maskin ginakueang.

¹³ Masarangan nakon nga atubadngon ro tanan nga matabo tungod sa akong maeueot nga kaangtanan kay Kristo nga nagapabaskog kakon.

¹⁴ Pero mayad man gihapon nga inyo ako nga gin-unungan sa akong kalisod.

¹⁵ Kamong mga tagaFilipos hay nakasayod man nga umpisa nga nagtuo kamo sa Mayad nga Balita nga ginwali ko kinyo, ag paghalin nakon sa inyong probinsya it Macedonia hay owa it ibang grupo it tumueuo nga nagtimbang kakon sa akong bueuhaton kundi kamo gid lang, paagi sa inyong ginpinadaea nga bulig kakon.

¹⁶ Bisan tag sa Tesalonica eon ako hay bukon eang it kaisaea kamo nga nagpadaea kakon it bulig para sa akong mga kinahangeanon.

¹⁷ Ginasambit ko ra bukon it dahil gusto ko eang nga regaluhan, kundi gusto ko nga tungod sa inyong padayon nga pagtao kakon hay dugangan pa gid it Dyos ro premyo nga anang ginatigana kinyo.

¹⁸ Habaton ko ro inyong ginpadaea kay Efaproditus ngani hasabat eon tanan ro akong kinahangean. Bastanti gid rato ag gapaeanubra pa ngani. Pareho rato it mahumot nga haead sa Dyos, ag nalipay gid imaw gabaton kato.

¹⁹ Ag ro Dyos ngara nga nagadipara kakon hay magatao nga owa it hawid-hawid ku tanan ninyo nga kinahangeanon tungod sa ginhimo ni Kristo Jesus. Ag ro anang pagtao hay suno sa anang manggad nga owa't pagkaubos.

²⁰ Dayawon naton tanan hasta sa owa it katapusan ro aton nga Dyos nga Ama. Amen.

Katapusan nga mga Pagpangamusta

²¹ Ikumusta lang ninyo ako sa tanan nga mga katawhan it Dyos inha, nga anang ginpaeain nga may maeueot nga kaangtanan kay Kristo Jesus. Nagapangamusta man kinyo ro mga kaigmanghuran nga kaibahan nakon iya.

²² Tanan nga mga katawhan it Dyos iya sa Roma hay nagapangamusta man kinyo, eabi gid ro nagaserbi sa palasyo it Emperador.

²³ Kabay pa nga masamitan pa gid ninyo ro sobrang kabuot ku Ginuo nga si Jesu-Kristo.