Mga TagaFilipos 3 - Inkeanon

Ro Pagkamatarong hay Bukon it Dahil sa Pagtuman sa Kasuguan

¹ Mga igmanghod, maadto eon kita sa iba pang bagay nga gusto kong ihambae kinyo. Magkalipay kamo dahil sa inyong maeueot nga kaangtanan sa Ginuo. Owa ako natak-i mag-inuman-uman ku akon nga mga ginahambae kinyo ay para gid ra sa inyong kamaeayran agod indi kamo hipataeang.

² Mag-andam gid kamo sa mga manogturo inha nga nagahimo it maeain ay nagapilit sanda nga samaron it mga tawo ro andang eawas paagi sa pagnina. Ginaturo abi nanda nga dapat gid nga magpatuli ro mga tawo agod ikatapoe sa mga katawhan it Dyos. Pareho ron sanda it bang-aw nga nagapangeapa-eapa.

³ Pero ro matuod hay bukon it sanda kundi kita ro minatuod nga katawhan it Dyos. Sa bulig ku anang Espirito hay nagasimba kita sa Dyos, ag nagasalig kita kay Kristo Jesus para sa atong kaeuwasan. Owa kita nagasalig kon sin-o kita, o kon ano ro atong binuhatan, agod nga maeuwas.

⁴ Kon masaligan malang ro mga ruyon ngaron hay abo man ro akon karon. Kon may maghambae nga may ana karon hay mas kapin pa gid ako.

⁵ Kon parti sa pagtuli, gintuli ako tag waeong adlaw pa eang ako. Natawo ako nga sangka inapo ni *Israel ag halin sa linahi ni Benjamin, ngani minatuod gid ako nga Hebreo sa dugo. Kon parti man sa pagtuman sa *Kasuguan namon nga mga Judio hay gintuman ko man ron tanan it maid-id ay *Pariseo anay ako kato.

⁶ Tungod sa akong grabi nga pagkadeboto sa among relihiyon hay mawron ngani nga ginhiningabot ko anay kato ro mga tumueuo ni Jesus. Kon parti man sa pagkamatarong paagi sa pagtuman sa Kasuguan hay owa kakon it ikasaway karon.

⁷ Pero ruyon ngaron tanan nga eaom ko kato hay akong bintaha agod mas batunon ako it Dyos, ginabilang ko eon makaron nga kaperdihan 't-a ay gusto ko nga makilaea gid it mayad si Kristo.

⁸ Ag bukon eang it ro mga ruyon ro akong ginabilang makaron nga kaperdihan kundi ro tanan-tanan eo't-a, ay ro akong maeueot nga pagkakilaea kay Kristo Jesus nga akong Ginuo hay eabaw pa gid sa bisan ano. Dahil kana, gintalikdan ko ron tanan ag ginabilang ko nga makasuka-suka nga basura, agod mas mageueot pa gid ro akong kaangtanan kay Kristo,

⁹ ag bilangon it Dyos nga matarong dahil sa akon ngarong kaangtanan kay Kristo. Ro akon nga pagkamatarong makaron hay bukon it dahil sa akon mismong binuhatan pareho it pagtuman sa among Kasuguan. Ro pagkamatarong ngara hay gintao it Dyos ag nabase sa akong pagtuo kay Kristo, bukon it sa akong mga binuhatan.

¹⁰ Ro akon gid nga handom hay mas mageueot pa gid ro akong pagkakilaea kay Kristo. Gusto ko maeksperyensyahan sa akong kabuhi ro gahom nga nagbanhaw kana. Ag haom gid ako nga mag-antos por dahil kana, ay nag-antos man imaw por dahil kakon, ag haom ako mamatay sa pagsunod kana, ay namatay man imaw por dahil kakon.

¹¹ Ag bisan paalin ma't-ang mamatay hay sayod ako nga pagabanhawon ako ag daehon sa eangit kaibahan ku akong mga kapareho nga katawhan it Dyos.

Dapat Kita nga Magtinguha nga Mangin Pareho kay Jesus

¹² Owa ako nagahambae nga natuman eo't-a ron tanan sa akong kabuhi ag perpekto eon ako. Pero ginatinguha ko gid nga matuman ro tuyo ni Kristo Jesus para kakon, kon ham-an it matsa inagaw na ako sa akong dating saea nga ginaobra ag binutang sa akong katungdanan makaron nga manogwali.

¹³ Mga igmanghod, kon kakon hay owa ko pa gid hatuman tanan ro tuyo nana ngaron para kakon, pero ro akon nga ginahimo hay owa ko eon ginainisipa ro mga bagay nga akon anay nga ginapahaegahan kato ag ginatinguhaan ko gid nga tumanon ro anang pagbuot kakon sa paeaabuton.

¹⁴ Ro akong kahalimbawa hay manogkarera nga ro ginaeagas hay makaabot sa punta agod mabaton ko ro premyo nga itao it Dyos sa tanan nga anang gintawag nga magkabuhi kaibahan nana sa eangit dahil sa ginhimo ni Kristo Jesus.

¹⁵ Ro mga hamtong eon sa pagtuo hay dapat nga magkompormi sa akon ngarang mga ginhambae kon mauno dapat kita magkabuhi. Pero kon may una pa nga owa nagakompormi hay ipahayag kanda it Dyos kon ano ro bukon it tama sa andang ginapaino-ino.

¹⁶ Ro importanti hay ro aton dapat nga pagkabuhi hay nagakasinanto sa aton eon nga hatun-an kon paalin magkabuhi ro mga tumueuo ni Jesus.

¹⁷ Mga igmanghod, magsambilog kamo sa pagtuead kakon sa akong pagsunod kay Jesus. Tan-awa ninyo ag tuearon ro mga nagatuead eon inha kakon, ay ginatuead eon nanda ro halimbawa nga ginpakita namon kinyo.

¹⁸ Ginahambae ko kamo kara dahil abo ro nagakuntra kay Kristo. Paagi sa andang pagpinakasaea hay ginabaliwala nanda ro haega ku anang kamatayon sa krus. Pilang beses ko eon nga ginhambae ra kinyo kato, ag makaron hay ginahambae ko ra kinyo it uman, nga may kaibahan nga euha.

¹⁹ Pagapinahan gid sanda sa ulihi sa impyerno hasta sa owa it katapusan tungod ginapakadiyos nanda ro mga maeain nga handom ku andang eawas. Ginapabugae-bugae nanda ro mga dapat ikahuya ag ro anda eang nga ginapaino-ino permi hay ro mga maeain nga butang iya sa kalibutan.

²⁰ Pero kita ma't-a hay mga pumueuyo it eangit. Ruyon ro lugar kon siin kita bagay. Ag idto magahalin ro atong ginapaabot gid nga Maneueuwas nga si Ginuong Jesu-Kristo.

²¹ Pag-abot nana riya, ro aton ngara nga eawas nga kalibutanon ag nagakamatay hay anang bag-uhon nga pareho eo't-a ku anang eawas nga eangitnon ag owa nagakamatay pagkabanhaw nana. Himuon nana ron paagi sa anang gahom nga makapasakop ku tanan nga butang kana.