Mga TagaFilipos 2 - Inkeanon

Tueara ro Pagpaubos ni Jesus

¹ Bukon abi it nagbaskog ro inyong buot dahil sa inyong maeueot nga kaangtanan kay Kristo, ag dahil ginahigugma nana kamo? Ag bukon abi it mayad ro inyong pag-ililiba tungod ro Espirito Santo hay una kinyo tanan, ag bukon abi it mabuot ag maeueuy-on man kamo sa kada isaea?

² Ngani agod mangin tueos ro akong kalipay hay ginapangabay ko kamo nga magkaeasugot eon kamo ag maghigugmaanan. Magsambilog kamo sa inyong panindugan sa inyong pagpangabuhi ag katuyuan.

³ Ayaw kamo maghimo it bisan ano nga ro inyong motibo hay agod indi maeabawan it iba o dahil sa sobra-sobra ninyong pagsalig sa inyong kaugalingon. Imbis nga makaruyon hay dapat nga magpaubos kamo, ag bilanga ro inyong isigkatawo nga mas mayad pa kaysa kinyo.

⁴ Ayaw eang ninyo pagkabangti ro inyong pangabuhi kundi ro ana man ku iba, agod mabuligan ninyo sanda.

⁵ Dapat nga ro inyong paino-ino hay pareho ku ay Kristo Jesus.

⁶ Bisan imaw hay Dyos hay owa nana pagbilanga nga dapat gid nanang panghugtan ro anang pagkadaeayawon bilang Dyos

⁷ kundi ana't-a ron nga ginpaiway, ag nagpakatawo imaw. Sa panueok it tawo hay tawo eang gid imaw, ag nagkabuhi nga ulipon it tanan.

⁸ Sa anang pagpakatawo, nagpaubos imaw ag nangin masinueundon sa Dyos bisan hasta sa kamatayon, maskin rato hay makahueuya ag makangingidlis nga kamatayon sa krus.

⁹ Sa anang ginhimo ngaron hay ginpadunggan gid imaw it Dyos ag gintaw-an it otoridad nga eabaw sa tanan

¹⁰ agod sa ulihi, ro tanan-tanan nga tinuga bisan siin hay magaeuhod sa anang atubang sa pagpasakop sa anang otoridad ngaron.

¹¹ Ag magahambae sanda tanan nga si Jesu-Kristo ro gamhanan nga Ginuo, ag mapadunggan man kara ro Dyos nga Ama.

Magkabuhi Kita nga Pareho it Iwag sa Rayang Madueom nga Kalibutan

¹² Ngani, mga hinigugma ko, dahil duyon ro ginhimo ni Jesus, kita man dapat hay matinumanon sa Dyos. Tag inha pa ako hay gintinuman ninyo ro akong ginaturo pero makaron nga owa eon ako inha hay mas kapin pa gid dapat ninyong tumanon ron. Padayuna ninyo ro mga buhat nga nagapakita nga mga linuwas kamo hasta nga makompleto ro pageuwas kinyo it Dyos. Ag himua ninyo ron nga may pagtahod ag kahadlok kana.

¹³ Mahimo ninyo ron dahil ro Dyos ro nagatao kinyo it kabubut-on ag ikasarang nga himuon ro makapalipay kana.

¹⁴ Obraha ninyo ro tanan ninyong ginaobra nga owa it reklamo o binais,

¹⁵ agod mangin putli kamo nga mga unga it Dyos nga puro eang mayad ro ginaobra, ag owa gid it ikasaway kinyo. Kon makaruyon ro inyong pagkabuhi sa atubang ku mga bukon it mga tumueuo sa inyong libot, nga mga balingahag it paino-ino ag mga ginpataeang hay pareho kamo it mga nagatao it kahayag nga idto sa kaeangitan, ay nagatao kamo it kahayag sa paino-ino ku mga una pa sa kadueom.

¹⁶ Ayaw ninyo pagtalikdi ro mensahi nga nagapaathag parti sa kabuhi nga owa it katapusan. Kon makaruyon ro inyong ginahimo hay igakalipay ko sa adlaw nga magbalik si Kristo nga may pueos gid ro akong mga pagkabudlay sa pagturo kinyo.

¹⁷ Ro inyong malig-on nga pagtuo kay Kristo bisan ginahingabot kamo hay pareho it sakripisyo nga ginahaead ninyo sa Dyos. Ag basi madali lang ako patyon dahil sa akong pagwali parti kay Kristo, ag ro akong dugo nga ipatueo hay pareho it bino nga ginahaead nga ginabu-bu sa inyong sakripisyo ngaron. Pero bisan patyon ako hay igakalipay ko gihapon ag naila man ako nga magbuylog kinyo tanan sa inyong kalipay.

¹⁸ Ag kamo hay dapat man nga magkalipay ag magbuylog sa akong kalipay.

Ginpadaea ni Pablo si Timoteo Agod Magbisita sa mga TagaFilipos Kaibahan si Epafroditus

¹⁹ Kon kabubut-on ni Ginuong Jesus, kabay pa nga hipaadto ko eon inha si Timoteo sa indi magbuhay, agod malipay man ako sa anang ibalita kakon hanungod kinyo, pagbalik nana.

²⁰ Sa tanan nakong kabulig sa pagwali, ay Timoteo eang nga paino-ino ro nagakasinanto sa akon, ag ana gid nga kahaktan ro inyong ginakabangtan.

²¹ Ro iba eo't-a hay ro andang kamaeayran eang ro ginaisip ag bukon it kon ano ro ginapahaegahan ni Jesu-Kristo.

²² Pero si Timoteo't-a ngara hay hapamatud-an eon ninyo kon mauno imaw it mayad sa among oeobrahon, ay hakita ninyo nga ginbuligan nana ako sa pagpaeapnaag ku Mayad nga Balita, pareho sa pagbulig it sangka masaligan nga unga sa anang ama.

²³ Ngani imaw ro akong ginaplanuhan kunta nga paadtunon eagi inha kon hisayran ko eon ro resulta ku akong kaso.

²⁴ Pero sigurado ako nga sa bulig it Ginuo, ako mismo hay makaadto man inha kinyo sa indi magbuhay.

²⁵ Pero nagdesisyon ako nga dapat nga pabalikon ko inha ro atong igmanghod nga si Epafroditus, nga inyong ginpaadto iya agod magbulig kakon sa akong mga kinahangeanon. Kaibahan ko imaw sa pagserbi sa Dyos ag sa pagpangapin ku Mayad nga Balita.

²⁶ Pabalikon ko imaw inha ay nahidlaw gid imaw kinyo tanan, ag indi imaw himayang pagkasayod nana nga hasayran ninyo nga nagmasakit imaw.

²⁷ Nagmasakit gid ma't-a matuod imaw it grabi, ag sangkiri eang ngani imaw mamatay. Pero ginkaeuy-an imaw it Dyos ag nagmayad ma't-a imaw. Bukon eang it imaw ro ginkaeuy-an it Dyos kundi pati man ako, agod indi hidugangan ro akong kalisod.

²⁸ Ngani mas kapin pa gid nga gusto ko nga pabalikon imaw inha, agod malipay kamo kon hikita imaw ag agod hibuhinan man ro akong pagkahawag.

²⁹ Gusto ko nga abi-abihon gid ninyo imaw nga may kalipay bilang igmanghod sa Ginuo kon magbalik eon imaw inha. Padunggi ninyo ro mga tawo nga pareho kana

³⁰ tungod sangkiri eang imaw mamatay dahil eang sa anang pagserbi kay Kristo. Anang ginbutang sa peligro ro anang kabuhi sa pagserbi kakon, nga indi ninyo mahimo ay maeayo kita sa kada isaea.