Mga TagaEfeso 5 - Inkeanon

Ro Pagkabuhi ku mga Nahayagan ro Paino-ino

¹ Mga palangga kamo nga mga unga it Dyos, ngani tueara ninyo ro inyong Ama.

² Dapat nga higugmaon gid ninyo permi ro inyong isigkatawo pareho ku paghigugma ni Kristo katon. Ana pa ngani nga ginhaead ro anang kabuhi por dahil katon, bilang mahumot nga sakripisyo nga nakapalipay sa Dyos.

³ Mga katawhan eon kamo it Dyos ngani indi dapat kamo maghulid sa bukon ninyo it asawa, maghimo it malaswa o maghinangoe. Owa dapat it bisan sin-o kinyo nga magpaino-ino nga maghimo ku mga buhat nga makaruyon.

⁴ Bukon man it bagay kinyo nga mag-inistorya it binastos, pinaumang, ag dinaka. Imbis nga duyon ro magguwa sa inyong ba-ba, ro dapat hay pagpasaeamat sa Dyos ro mabatian kinyo.

⁵ Sayod gid ninyo nga ro mga nagahulid sa bukon nanda it asawa ag ro mga nagahimo it mahigko sa mata it Dyos hay indi makabaton it panublion nga itao ni Kristo ag ku Dyos sa andang mga katawhan. Ro mga hangoe hay indi man makabaton ay ro ginapakadiyos nanda hay ro manggad.

⁶ Indi kamo magpaluko sa mga purilon nga nagahambae nga bukon kuno it maeain nga maghimo ku mga butang ngaron. Ruyon mismo nga mga buhat ro dahilan nga pinahan it Dyos ro mga indi magtuman kana.

⁷ Ngani indi kamo kanda mag-iba sa pag-obra ku andang ginaobra.

⁸ Kato anay hay pareho man kamo kanda nga nagakabuhi sa kadueom it saea, pero makaron hay sa kahayag eon kamo dahil mga katawhan eon kamo it Ginuo. Ngani magpangabuhi kamo nga ro inyong batasan hay kat ana it mga tawo nga sa kahayag eon,

⁹ ay ro batasan ku mga sa kahayag eon hay mabuot, matarong ag owa nagapakuno-kuno.

¹⁰ Estudyuhi ninyo kon ano ro makatao it kalipay sa Ginuo ag obrahon ninyo ron.

¹¹ Ayaw kamo mag-intra sa mga owa't pueos nga ginaobra ku mga tawo nga nagakabuhi sa kadueom kundi pakitaan kanda paagi sa inyong matarong nga pagkabuhi nga saea ro andang ginahimo.

¹² Bisan ngani magsambit eon lang ku andang ginahimo it patago hay makahueuya.

¹³ Pero kon makita nanda ro inyong matarong nga pagkabuhi hay mahayagan gid sanda nga ro andang ginahimo hay maeain. Makaruyon ron dahil ro tanan nga una sa kadueom, kon mahayagan hay makita kon nano gid ron,

¹⁴ ag ro tanan nga sa kahayag eon hay kahayag man sa iba. Mawron ngani nga may haeambaeunon nga, “Bugtaw, ikaw nga nagakatueog. Bangon, ikaw nga namatay. Hayagan ka dayon ni Kristo.”

¹⁵ Ngani magdahan gid kamo sa inyong pagpangabuhi. Magkabuhi kamo nga pareho it mga may kaaeam nga halin sa Dyos, bukon it pareho ku mga owa.

¹⁶ Kaliti ninyo ro kada oportunidad sa paghimo it mayad, tungod makaron hay abo eon ro nagahimo it maeain.

¹⁷ Ayaw kamo magpinaumang kundi tinguhaa gid nga eubton ninyo it mayad kon ano ro kabubut-on it Ginuo agod masunod ninyo.

¹⁸ Ayaw kamo magpahilong nga magaresulta sa pagminaoy kundi magpasakop kamo permi sa pagkontrol it Espirito Santo.

¹⁹ Kon nagapasakop kamo kana, ro mga daya ro inyong obrahon: kon magtililipon kamo, palig-una ninyo ro pagtuo ku kada isaea, paagi sa paghambae ku mga nasueat sa Mga Salmo ag iba pa nga mga kaeantahon it pagdayaw sa Dyos. Kantaha man ron ninyo sa Ginuo it hantop sa inyong tagipusuon.

²⁰ Pasaeamati man ninyo permi ro Dyos nga Ama sa tanan nga bagay, dahil sa inyong maeueot nga kaangtanan sa atong Ginuong Jesu-Kristo.

²¹ Ag sambilog pa nga obrahon ninyo hay paeabyon ninyo ro kada isaea tungod ku inyong pagtaha kay Kristo.

Ro Mga Bilin ni Pablo sa mga Mag-asawa

²² Mga bayi, magpasakop kamo sa inyong asawa pareho ku inyong pagpasakop sa Ginuo,

²³ ay ro eaki ro pinakaueo ku anang asawa, pareho man kay Kristo nga pinakaueo naton tanan nga mga nagatuo kana. Ag bukon eang it pinakaueo naton imaw kundi imaw man ro Maneueuwas naton nga anang pinakaeawas.

²⁴ Ngani pareho ku pagpasakop kay Kristo ku mga nagatuo kana, kamong mga bayi hay dapat man nga magpasakop sa inyong mga asawa sa tanan nga butang.

²⁵ Kamo man nga mga eaki hay dapat ninyo nga higugmaon ro inyong asawa pareho ku paghigugma ni Kristo katon tanan nga mga nagatuo kana. Ginpakita nana ron sa anang pagsakripisyo ku anang kabuhi por dahil katon.

²⁶ Ginhimo nana ron agod limpyuhan kita sa saea ag himuon nga balaan tungod nagtuo kita sa mensahi parti kana ag ginbawtismuhan kita.

²⁷ Ginhimo nana ron agod kita hay mangin pareho it kagwapa-gwapa nga nobya nga owa it bisan anong dungis o kurinot ukon ano pa man nga diperensya, kundi balaan ag owa it ikasaway kon ipresentar eon kita kana pagbalik nana agod sueangon kita tanan nga nagatuo kana.

²⁸ Ngani, mga eaki, dapat nga palanggaon ninyo ro inyong asawa pareho ku pagpalangga ninyo sa inyong kaugalingon. Ro eaki nga nagapalangga sa anang asawa hay nagapalangga man sa anang kaugalingon.

²⁹ Owa it tawo nga nagakaugot sa ana mismong eawas kundi ana ron nga ginapakaon ag ginapalangga. Makaruyon man ro ginahimo ni Kristo katon nga mga nagatuo kana,

³⁰ tungod mga parti kita ku anang pinakaeawas.

³¹ May nasueat sa Sagrado nga Kasueatan nga, “Dahil kara, kon mag-asawa ro eaki hay pagaaywanan nana ro anang ginikanan agod makig-iba imaw sa anang asawa, ag mangin magkapihak it dughan sandang daywa.”

³² May madaeom nga ginaturo dikara ag ginapahayag it Dyos paagi kakon makaron nga raya hay nagapatungod gid-a kay Kristo ag katon tanan nga nagatuo kana.

³³ Pero may ginaturo man rikara sa mga mag-asawa. Ro kada asawa nga eaki hay dapat nanang palanggaon ro anang asawa, pareho ku anang pagpalangga sa anang kaugalingon, ag ro bayi man hay dapat nanang tahuron ro anang asawa.