Mga TagaEfeso 3 - Inkeanon

Ginpili it Dyos si Pablo Bilang Manogwali sa mga Bukon it Judio

¹ Ngani dahil karon tanan, ako nga si Pablo nga iya sa prisuhan dahil sa pagserbi kay Kristo Jesus sa pagwali kinyo nga mga bukon it Judio (hay nagapangamuyo sa Dyos para kinyo).

² Sigurado nga hasayran eon ninyo nga ginsalig kakon it Dyos ro responsibilidad nga iwali kinyo nga mga bukon it Judio ro parti sa anang sobrang kabuot.

³ Ag hasayran man ninyo nga may ginpahayag imaw kakon parti sa anang plano nga owa anay ginpahayag kato. Hasambit ko eon ron it matag-od sa primerong parti ku sueat ngara

⁴ ag sa pagbasa ninyo karon hay masayran ninyo nga abo ro akong haeubtan parti sa plano it Dyos nga owa anay nana ginpahayag kato tanan nga gintuman nana makaron paagi kay Kristo.

⁵ Owa ron kato pagsugiran it Dyos sa mga tawo, pero makaron hay ginpasayod ron ku Espirito Santo sa mga balaan nga mga apostoles ag mga propeta.

⁶ Ag ro anang plano ngaron hay raya: bukon eang it kami nga mga Judio ro manunubli ku mga pagpakamaayo it Dyos, kundi pati man kamo nga mga bukon it Judio. Gintapoe man kamo sa ginatawag nga eawas ni Kristo, nga ro buot hambaeon hay ro tanan nga nagatuo kana. Ag tungod nagatuo man kamo sa Mayad nga Balita parti kay Jesus hay gintapoe man kamo sa tanan nga may maeueot nga kaangtanan kay Kristo Jesus nga magabaton ku ginpromisa it Dyos.

⁷ Sa sobrang kabuot it Dyos hay ana ako nga gintaw-an it pribilihiyo nga magserbi kana sa pagwali ku rayang Mayad nga Balita ag ana man ako nga gintaw-an it ikasarang nga mahimo ron paagi sa anang gahom.

⁸ Bisan ako ro pinakakubos sa tanan nga mga katawhan it Dyos, ginpakita gihapon nana kakon ro anang sobrang kabuot nga gintaw-an nana ako it pribilihiyo nga magwali sa mga bukon it Judio parti sa bugana ag indi matungkad nga pagpakamaayo ni Kristo.

⁹ Ginapapaathag man kakon it Dyos sa tanan nga mga tawo kon paalin nana tumanon ro anang plano. Halin pa ku pagtuga it Dyos ku tanan, owa anay nana igpahayag ro tanan parti sa anang plano ngaron,

¹⁰ agod ikapahayag nana makaron nga kita nga mga nagatuo kay Jesus ro katumanan ku plano ngaron. Kon makita ron ku mga pinuno it mga anghel ag ku iba pa nga may gahom sa eangit hay maeubtan nanda ro kaaeam it Dyos nga anang ginapakita sa kaabo-abo ag sari-saring paagi.

¹¹ Bago pa gintuga ro kalibutan hay ruyon eo't-a ro anang plano, ag ana gid ron nga gintuman paagi kay Kristo Jesus nga atong Ginuo.

¹² Ngani tungod sa atong maeueot nga kaangtanan kay Kristo Jesus ag dahil sa atong pagtuo kana, makapaeapit kita sa Dyos nga may kaisog it buot ag owa it pagkatahap.

¹³ Ngani bisan nagakalisod ako para kinyo hay ginapangabay ko kamo nga indi kamo magpaeuya it buot, dahil para man ra sa inyong kamaeayran.

Ro Pangamuyo ni Pablo para sa mga Tumueuo sa Efeso

¹⁴ Ngani kon hidumduman ko ro tanan nga ginhimo ku atong Ama hay nagaeuhod ako sa pagpangamuyo kana.

¹⁵ Imaw ro Ama ku tanan nga anang katawhan nga idto eon sa eangit, ag ku mga iya pa sa kalibutan nga ginatawag nga mga myembro ku anang panimaeay.

¹⁶ Nagapangamuyo ako kana nga eabing makagagahom, nga indi matupungan ro pagkadaeayawon nga anang pabaskugon ro inyong buot paagi sa Espirito Santo,

¹⁷ agod padayon nga magaistar si Kristo sa inyong tagipusuon tungod sa inyong pagtuo. Ag ginapangamuyo ko man nga ro inyong paghigugma hay mangin kapareho it lig-on it kahoy nga nakapanggamot it husto, ag pareho man sa baeay nga malig-on ro pundasyon.

¹⁸ Kon matabo ra, kamo ag ro inyong mga isigkapareho nga mga katawhan it Dyos bisan siin hay makasayod ag makaeubot gid it mayad ku indi masukat nga gugma ni Kristo katon.

¹⁹ Bisan indi gid naton matungkad tanan rayang gugma ni Kristo, ginapangamuyo ko nga mabatyagan gid ninyo ra agod padayon nga matuead ninyo ro pagginawi it Dyos hasta nga ro inyong pagginawi hay pareho eon ku ana.

²⁰ Ngani dayawon naton ro Dyos nga makasarang maghimo it sobra-sobra pa sa atong ginapangayo o sa atong ginapaino-ino nga pangayuon kana paagi sa anang gahom nga nagapanghikot iya katon.

²¹ Dayawon imaw naton tanan nga anang katawhan hasta sa owa it katapusan dahil sa ginhimo ni Kristo Jesus. Amen.