Mga TagaEfeso 2 - Inkeanon

Bag-o nga Kabuhi Paagi kay Kristo

¹ Kato anay, tag owa pa kamo nagtuo hay pareho kamo it mga patay tungod sa inyong mga pageapas ag kasae-anan. Owa pa kamo hataw-i it Dyos it bag-o nga kabuhi halin kana.

² Makaruyon anay kamo kato, ay nagasunod pa kamo sa maeain nga batasan ku mga tawo iya sa kalibutan. Ro inyong pagsunod ngaron hay pagsunod man sa pinuno it tanan nga maeain nga espirito nga nagagahom sa kahanginan, ag imaw man ro espirito nga nagatueod sa mga owa nagatuman sa Dyos nga magkasaea.

³ Kita tanan hay kaibahan man kato nanda ag pareho man kanda nga nagatuman eang ku atong makasasaea nga kinaiya. Ginasunod naton kon ano ro gusto ku aton nga eawas, ag kon ano ro iya sa atong paino-ino. Pareho man kita kanda, makasasaea man kita halin pa ku aton nga pagkatawo, ag pina it Dyos ro atong dangatan.

⁴ Pero maeueuy-on gid ro Dyos ag mabahoe gid ro anang paghigugma katon.

⁵ Ngani bisan pareho kita it mga patay tungod sa atong mga pageapas hay ana gihapon kita nga gintaw-an it bag-o nga kabuhi, ag ginabilang nana kita nga gintapoe kay Kristo sa anang pagkabanhaw. Paagi eang matuod sa sobrang kabuot it Dyos kita hay naeuwas.

⁶ Owa eang nana kita gintapoe kay Kristo Jesus sa anang pagkabanhaw kundi ana man kita nga gintapoe kana sa anang pagdumaea idto sa eangit.

⁷ Ginhimo ra it Dyos agod hasta sa owa't katapusan hay ikapakita nana ro anang paghigugma ag sobrang kabuot nga indi matupungan, nga anang ginpakita katon paagi kay Kristo Jesus.

⁸ Dahil sa rayang sobrang kabuot it Dyos hay naeuwas kamo paagi sa inyong pagtuo kay Kristo. Ro kaeuwasan ngara hay bukon it halin sa inyong binuhatan kundi regalo ron kinyo it Dyos.

⁹ Ngani owa gid it ikapabugae ro bisan sin-o, nga mahambae abi nga dahil mayad ro anang binuhatan hay gineuwas imaw it Dyos.

¹⁰ Ro Dyos ro nagbag-o ku atong kabuhi paagi sa atong maeueot nga kaangtanan kay Kristo Jesus. Ginbag-o nana kita agod himuon ta ro mga mayad nga buhat nga ginplano it Dyos kato pa nga ipahimo katon.

Ro mga Judio ag ro mga Bukon it Judio hay Sambilog kay Kristo

¹¹ Ngani dumduma ninyo kon ano anay kamo kato. Ginamata-mata kamo ku mga *Judio dahil mga bukon kamo it Judio ag mga bukon it tinuli pareho kanda. Sinanda hay sanda eang ro mga katawhan it Dyos dahil sanda ro ginatawag nga Mga Tinuli. Pero tawo eang ro nagtuli kanda ag ruyon hay sa anda eang nga eawas.

¹² Dumduma ninyo nga ku rato nga tyempo, kamo hay nahamueag kay Kristo. Owa kamo hatapoe sa mga inapo ni *Israel nga ginpili it Dyos nga mangin anang katawhan, ag owa man kamo hasakpi sa kasugtanan nga anang gintao kanda nga may kaibahan nga promisa nga padaehan nana sanda it Maneueuwas. Nagpangabuhi kamo iya sa ibabaw it kalibutan nga owa it pageaom ag owa nagakilaea sa Dyos.

¹³ Pero makaron, tungod sa inyong maeueot nga kaangtanan kay Kristo Jesus, kamo nga mga maeayo anay sa Dyos hay ginpapaeapit nana paagi sa pagpatueo ku dugo ni Kristo tag namatay imaw.

¹⁴ Imaw ro nagdaea it paghidait kamon nga mga Judio ag kinyo nga mga bukon it Judio ag nag-ilimpon katon agod mangin sambilog nga katawhan. Paagi sa anang kamatayon hay anang ginduea ro atong pagkueuntrahan nga matsa pader nga nagaueot katon.

¹⁵ Paagi man sa anang pagkamatay sa krus hay ginhimo nana nga owa it pueos ro tanan nga regulasyon ku relihiyon it mga Judio agod ro tanan nga nagatuo kana hay mangin sambilog eang nga katawhan it Dyos nga may paghidait eon.

¹⁶ Paagi man sa pagkamatay nana sa krus, ana nga ginduea ro atong pagdueumtanan ag ginhimo nana kita nga matsa sambilog eang nga eawas agod kita tanan hay anang ikapapanumbalik sa Dyos.

¹⁷ Si Kristo hay nag-adto riya ag nagwali ku mayad nga balita nga makapanumbalik eon ro mayad nga relasyon ku tanan nga tawo sa Dyos, kamo nga mga bukon it Judio nga maeayo anay kana, ag kami man nga mga Judio nga maeapit.

¹⁸ Ngani paagi sa ginhimo ni Kristo hay paeareho eon kita nga mga Judio ag bukon it Judio nga ginabaton it Dyos nga atong Ama kon magpaeapit kita kana sa bulig it Espirito Santo nga iya katon tanan.

¹⁹ Ngani kamo nga mga bukon it Judio hay bukon eon it mga tawo nga owa kakilaea sa Dyos o owa nahakat parti kana kundi gintapoe eon kamo sa anang mga katawhan ag mga myembro eon ku anang panimaeay.

²⁰ Ro mga katawhan it Dyos hay matsa baeay nga anang ginapatindog ag kamo hay parti man karon. Rayang baeay hay napundar sa mensahi nga ginwali ku mga apostoles ag mga propeta, ag si Kristo Jesus ro pinakaimportanti nga bato sa pundasyon nga nagapalig-on ku bilog nga baeay.

²¹ Si Kristo ro atong ginaangutan ag sigo gid ro pag-aeangot naton tanan nga parti ku baeay. Nagabinahoe ro baeay ngara hasta mangin balaan nga templo nga ginhaead sa Ginuo.

²² Ag tungod may inyo nga maeueot nga kaangtanan kay Kristo, kamo man hay ginatapoe it Dyos sa ana ngarang ginapatindog nga baeay nga anang ginaistaran paagi sa Espirito Santo.