Mga TagaEfeso 1 - Inkeanon

Mga Pagpangamusta

¹ Raya nga sueat hay halin kakon nga si Pablo nga sangka *apostol ni Kristo Jesus suno sa pagbuot it Dyos. Nagasueat ako kinyo, mga katawhan it Dyos nga anang ginpaeain inha sa syudad it Efeso, nga matutom nga mga nagatuo kay Kristo Jesus.

² Kabay pa nga masamitan pa gid ninyo ro mga pagpakamaayo ag katawhayan nga halin sa Dyos nga atong Ama ag kay Ginuong Jesu-Kristo.

Ro Makangawa-ngawa nga Plano it Dyos

³ Dayawon naton ro Dyos, imaw nga Dyos ag Ama ku atong Ginuong Jesu-Kristo tungod ana nga gintao katon ro tanan nga pagpakamaayo paagi sa anang Espirito Santo. Raya nga mga pagpakamaayo hay halin sa eangit ag gintao katon tungod sa aton nga maeueot nga kaangtanan kay Kristo.

⁴ Bisan bago pa gintuga ro kalibutan hay ginplano eon it Dyos ro atong maeueot nga kaangtanan kay Kristo ag ginpili eon eagi nana kita nga mangin balaan ag owa eon it saea sa anang panueok.

⁵ Bangod sa mabahoe nana nga paghigugma katon hay plano eon it Dyos nga ana kita nga mangin mga unga paagi kay Jesu-Kristo. Ruyon ro pagbuot it Dyos ag nagapalipay kana.

⁶ Ngani dayawon gid naton ro Dyos sa anang sobrang kabuot nga anang ginpakita katon tungod sa maeueot naton nga kaangtanan sa anang palangga nga Unga.

⁷ Tungod paagi sa dugo ni Jesu-Kristo hay gintubos kita sa pina it saea nga ro buot hambaeon hay ginpatawad eon nana ro atong mga pageapas. Ginpatawad nana kita dahil sa anang sobrang kabuot

⁸ nga anang ginpakita katon nga owa it hawid-hawid! Gintaw-an man nana kita it kaaeam ag pageubot agod maeubtan naton it mayad ro anang plano.

⁹ Ro anang plano ngaron hay owa anay kato ginpahayag pero makaron hay nalipay imaw nga ipahayag ron katon. Kato pa eagi hay ginplano na eon nga tumanon ron paagi kay Kristo.

¹⁰ Ro anang plano ngara hay makara: pag-abot ku tamang oras hay tingubon nana ro tanan nanang mga tinuga, ro tanan sa eangit ag sa eugta, ag anang ipaidaeom sa pagdumaea ni Kristo.

¹¹ Ro tanan nga butang hay ginhimo it Dyos suno sa ana nga plano ag pagbuot. Ag suno sa ana nga plano kato pa, ginpili nana kita nga mangin anang katawhan nga may maeueot nga kaangtanan kay Kristo

¹² agod dayawon ro anang kagamhanan, tungod kamon nga mga haunang nagsalig kay Kristo.

¹³ Kamo man hay nangin mga katawhan ni Kristo pagkabati ninyo ag pagpati ku matuod nga mensahi nga imaw ro Mayad nga Balita kon paalin kamo maeuwas sa pina it saea. Ngani kat nagtuo kamo kay Kristo, ana nga gintao kinyo ro Espirito Santo nga anang ginpromisa, bilang tanda nga ana eon kamo it Dyos.

¹⁴ Ro Espirito Santo ro garantiya nga mabaton gid naton ro paeanublion nga ginpromisa it Dyos katon nga anang mga katawhan, samtang ginahueat naton nga taw-an nana kita it kompleto nga kaeuwasan. Dayawon naton imaw nga makagagahom nga Dyos!

Ro Pangamuyo ni Pablo Para sa mga TagaEfeso

¹⁵ Ngani pagkasayod nakon nga nagalig-on ro inyong pagtuo kay Ginuong Jesus, ag ginahigugma gid ninyo ro tanan nga mga katawhan it Dyos,

¹⁶ indi maubos-ubos ro akong pagpasaeamat sa Dyos dahil kinyo. Ag akon man kamo permi nga ginapangamuyuan

¹⁷ sa Dyos ku atong Ginuong Jesu-Kristo, ro daeayawon nga Ama, nga taw-an nana kamo it kaaeam nga halin sa Espirito Santo nga magapasayod kinyo ku kamatuuran parti sa Dyos agod makilaea ninyo imaw it mayad.

¹⁸ Kabay pa nga pahayagon nana ro inyong paino-ino agod maeubtan ninyo ro kamaeayran nga itao gid nana sa tanan nanang katawhan nga anang tinawag. Ag kabay pa nga maeubtan man ninyo ro indi matupungan nga kaabo ag kanami ku anang ipapanubli katon nga anang mga katawhan.

¹⁹ Ag kabay pa nga inyong maeubtan ro anang gahom nga indi matupungan nga iya katon nga mga nagatuo kana. Raya ro pwerti nga gahom nga anang ginpakita tag

²⁰ ana kato nga ginbanhaw si Kristo ag ginpapungko sa anang tuo nga lugar it kadungganan sa eangit.

²¹ Ngani idto si Kristo sa eangit ag mas gamhanan pa imaw sa tanan nga mga anghel ag iba pa nga mga espirito nga nagahari, may otoridad, may gahom o nagadumaea. Owa eon it makaeabaw pa kana makaron nga tyempo, ag sa paeaabuton.

²² Ginpaidaeom it Dyos ro tanan-tanan sa gahom ni Kristo ag ginbutang imaw nga pinakaueo naton tanan nga nagatuo kana.

²³ Kitang mga nagatuo kana hay anang pinakaeawas nga nagakompleto kana ag imaw ro una sa tanan nga lugar nga nagakompleto ku tanan-tanan nga tinuga.