Mga Hebreo 6 - Inkeanon

¹ Ngani, indi eang kita magpabilin it tinuon sa mga primero nga mga turo parti kay Kristo kundi magpadayon kita sa mas madaeom nga mga turo agod maghamtong kita sa pagtuo. Kon sa pagpatindog ron it baeay hay kon hausod eon naton ro pundasyon, padayunon eon naton ro pagpatindog bukon it mag-inusod la't-a kita it pundasyon! Ro akong buot hambaeon hay indi eon naton pagbinalik-balikon it tuon ro mga doktrina nga pareho it pundasyon, tutal hatun-an eon naton ro mga ruyon ngaron. Ro mga halimbawa karon nanda hay: ro pagtalikod sa mga buhat nga eaom naton hay makaeuwas katon, ro kinahangean nga magtuo sa Dyos,

² ro mga ritwal sa pagpalibanaw, ro pagtungtung it alima sa tawo kon gapangamuyo para kanda, ro pagkabanhaw it mga patay, ag ro owa't katapusan nga pina it Dyos sa mga owa nagtuo kana.

³ Ngani kon itugot it Dyos hay magatuon eon kita ku madaeom-daeom nga mga pagturo agod mangin hamtong kita sa atong pagtuo.

^4-6 Ginahambae ko ra dahil ro mga magtalikod sa andang pagtuo kay Kristo hay imposible eon nga kumbinsihon nga maghinuesoe ag magtalikod it uman sa andang mga saea. Kon nahayagan eon it Dyos ro andang paino-ino, kon hasamitan eon nanda ro mayad nga pagpakamaayo it Dyos, kon habaton nanda ro Espirito Santo pareho ku iba, kon hasamitan eon nanda ro kamayad ku hambae it Dyos ag kon hasamitan eon nanda ro gahom it Dyos nga ana man nga ipakita sa paeaabuton nga mga inadlaw, ag kon talikdan 't-a nanda ron tanan hay imposible eon nga mapahinuesoe ag mapatalikod pa sanda it uman sa andang mga saea. Matuod ron ay matsa anda man mismo nga ginaeansang sa krus ro Unga it Dyos ag ginapakahuy-an sa atubang it abong tawo.

^7-8 Ro anda nga kahalimbawa hay bulok nga eugta nga puro eang sari-saring kasiitan ro nagatubo. Ro makaraya nga klasi it eugta hay owa it pueos ag sa indi magbuhay hay maldisyunon it Dyos, ag owa it ibang dangaton kundi sunugon. Ro makarayang klasing tawo hay maldisyunon man. May eugta ma't-a nga perming ginaueanan ag ana karang ginasuyop ro uean ag ginapatubo nana dayon ro mga tanom nga mapuslanon para sa tag-ana kara. Pakamaayuhon it Dyos ro eugta nga makaraya ag pakamaayuhon man nana ro tawo nga pareho sa eugta ngara.

⁹ Pero mga pinalangga ko, nakasiguro ako nga bukon kamo it pareho sa bulok nga eugta ngaron ay mayad gid ro bunga ku inyong pagtuo ag magadaea ron kinyo sa inyong kaeuwasan.

¹⁰ Matarong abi ro Dyos ag indi nana paglipatan ro inyong mayad nga binuhatan ag ro inyo nga pagpakita ku inyong paghigugma kana paagi sa inyong padayon nga pagserbi sa katawhan it Dyos.

¹¹ Bug-os ro inyong paino-ino sa inyong pagserbi ngaron sa iba ag gusto ko gid nga bug-os man ro inyong paino-ino sa inyong pagkasigurado parti sa mga ginpromisa it Dyos hasta sa adlaw nga inyong mabaton ron.

¹² Gusto ko nga makaruyon ro inyong pagkasigurado agod indi kamo madueaan it gana sa inyong pagsunod sa Dyos, kundi tuearon ninyo ro mga tawo nga paagi sa andang malig-on nga pagtuo ag pagkamatiniison hay nagabaton ku mga ginpromisa it Dyos.

Tumanon Gid it Dyos ro Anang Ginpromisa

¹³ Isipa tuo ninyo si Abraham. May ginpromisa kana ro Dyos ag nagsumpa nga tumanon nana rato. Dahil owa eon it mas mataas pa kaysa sa kana nga Dyos, mawron nga ana nga gin-gamit ro ana mismo nga kaugalingon bilang garantiya nga tumanon nana ro anang ginsumpa.

¹⁴ Hambae it Dyos kay Abraham, “Ako mismo ro nagahambae kimo nga pakamaayuhon ko ikaw it todo-todo ag taw-an ko it kaabo-abo nga mga kaapo-apohan ag paabuon ko pa gid sanda.”

¹⁵ Ag ginhinueat ni Abraham ro ginpromisa it Dyos ag owa gid imaw nagkataka bisan mabuhay ro katumanan kato ngani habaton nana rato.

¹⁶ Kon gustong pamatud-an it sangka tawo nga matuod ro anang ginasumpa hay gamiton nana ro ngaean it mas eabaw pa kaysa kana, ag dahil karon hay owa eon dayon it kinahangean it kon ano pa nga sugilanon.

¹⁷ Paagi man sa pagsumpa hay ginpakita it Dyos kato anay sa anang mga ginpromisahan nga tumanon nana ro anang ginpromisa kanda. Ginpalig-on na ra paagi sa pagsumpa dahil gusto nanang ipakita kanda nga indi gid mabag-o ro anang desisyon parti sa anang ginpromisa ngaron.

¹⁸ Ro promisa ag ro sumpa ngaron hay indi gid magbag-o ay imposible gid nga magpinuril ro Dyos. Ngani paagi sa daywa ngara, kita nga nagdangop kana agod anang proteksyunan hay may grabi nga kabaskog it buot nga magpati it malig-on nga aton nga mabaton sa ulihi ro ginpromisa it Dyos.

¹⁹ Ro atong kasiguruhan nga mabaton naton ro ginpromisa it Dyos hay pareho it masaligan nga angkla nga nagapalig-on sa atong pagtuo agod indi kita mag-amat it paeayo sa kamatuuran. Dahil sa atong kasiguruhan ngaron hay makaatubang eon kita sa Dyos pareho sa pinakapinuno nga saserdote nga ginahawa ro kurtina ag nagasueod sa Pinakasagrado nga Kwarto idto sa Templo.

²⁰ Ro Pinakasagrado nga Kwarto ngaron hay nagasimbolo ku parti it eangit kon siin ro trono it Dyos Ama. Ag idto eon nag-una katon si Jesus bilang atong tigeawas sa atubang it Dyos Ama, dahil imaw ro aton nga Pinakapinuno nga Saserdote hasta sa owa it katapusan. Ro anang pagkasaserdote hay pareho ku pagkasaserdote ni Melkizedek kato anay.