Mga Hebreo 5 - Inkeanon

¹ Ro kada pinakapinuno nga *saserdote hay ginapili halin sa mga tawo agod magrepresentar kanda sa atubang it Dyos. Ro anang trabaho hay gahaead sa Dyos it mga sapat nga pangsakripisyo para sa kasae-anan it mga tawo ag iba pa nga mga haead nga andang ginatao sa Dyos.

² Ag dahil tawo man imaw nga may kahinaan ag kon amat hay indi man kasukoe sa tentasyon, antigo't-a imaw magtratar nga may kaeueo sa anang mga isigkatawo nga ginapataeang ay owa kasayod kon tama ro andang ginahimo.

³ Ag dahil nagakasaea man imaw mismo, kon maghaead imaw it mga sakripisyo para sa saea it mga tawo, dapat man imaw nga maghaead it mga sakripisyo para sa ana mismong mga saea.

⁴ Owa it makabutang ku anang kaugalingon sa dungganon nga katungdanan bilang pinakapinuno nga saserdote. Dapat 't-a hay tawgon ag ibutang imaw it Dyos sa ruyon nga katungdanan, parehas kay Aaron kato anay.

⁵ Si Kristo man ngani hay owa nagpadungog sa anang kaugalingon sa pagpungko bilang Pinakapinuno nga Saserdote kundi ro Dyos ro nagpadungog kana sa anang ginhambae nga, “Ikaw hay akon nga Unga ag makaron, ipakita ko nga ako ro Ama nimo.”

⁶ Ag may ginhambae pa gid imaw sa iba nga parti it Sagrado nga Kasueatan nga, “Ikaw hay saserdote hasta sa owa it katapusan, parehas ku pagkasaserdote ni Melkizedek.”

⁷ Tag iya pa si Jesus sa kalibutan, nagpangamuyo ag nagpakitluoy imaw nga may daeang ueahab ag pagpanangis sa Dyos ay sayod nana nga may gahom ro Dyos nga makaeuwas kana sa kamatayon. Ag tungod imaw hay matinahuron ag matinumanon sa Dyos ngani owa pagbaliwalaa it Dyos ro anang pangamuyo.

⁸ Bisan Unga imaw it Dyos hay nag-antos imaw ag paagi karon hay nasayran nana kon mauno ro pagtuman sa Dyos bisan ano ro matabo.

⁹ Ag dahil permi imaw nga nagtinuman sa Dyos it insakto ag owa it kueang, imaw ro perpekto nga sakripisyo para sa kasae-anan it tawo ngani nangin imaw ro ginahalinan it kaeuwasan nga owa it katapusan para sa tanan nga nagatuman kana.

¹⁰ Mahimo nana ron dahil halin pa't-a eagi kato hay ginbutang imaw it Dyos bilang Pinakapinuno nga Saserdote nga parehas ku pagkasaserdote ni Melkizedek.

Dapat nga mangin Hamtong Kita sa Atong Pagtuo ag Indi Magtalikod

¹¹ Abo pa't-a kunta ro akon nga ikahambae kinyo parti sa pagkasaserdote ni Melkizedek ag ni Jesus ugaling hay malisod kamo paathagan ay matamad kamo magpamati ag mageubot ku ginaturo kinyo.

¹² Mabuhay eon kamo nga nagtuo ag kamo eon kunta ro mga manogturo ku iba nga mga bukon it parehas kinyo nga mga mabuhay eon nga tumueuo, ugaling kamo't-a ro kinahangean nga tur-an it uman ku mga primero ag pinakamaeumo nga mga bagay sa mensahi nga halin sa Dyos. Matsa nagbalik 't-a kamo sa pagkaeapsag nga indi pa makakaon it matig-a nga pagkaon ay gatas eang ro inyong masarangan imnon.

¹³ Ro tumueuo nga matsa eapsag nga ginagatas pa hay owa it haeubtan ku mensahi parti sa pagkamatarong.

¹⁴ Pero ro mga tumueuo nga ikakompara sa mga may buot eon nga makakaon it matig-a hay ruyon ro mga hamtong eon sa pagtuo. Kaantigo eon sanda magtimbang-timbang kon ano ro mayad o maeain ay ginhanas sanda dikaron.