Mga Hebreo 4 - Inkeanon

Ro Parti sa Kapahuwayan nga Ginatao it Dyos sa anang Katawhan

¹ Ratong kapahuwayan nga ginatao it Dyos kato hay puydi gihapon nga masamitan ku anang katawhan makaron, pero dapat nga maghaeong gid kita nga owa it rason nga indi makasamit ro bisan sin-o katon sa kapahuwayan ngaron.

² Kita man hay nakabati ku mayad nga balita parti sa kapahuwayan nga ginatao it Dyos pero indi't-a dapat kita magtuead sa atong mga kalolo-lolohan nga nakabati karon ugaling hay owa man sanda nakapueos kato ay owa man sanda nagtuo sa Dyos.

³ Kita eang nga nagatuo sa Dyos ro makasamit sa rondatong kapahuwayan dahil raya't-a ro ginhambae it Dyos parti sa mga owa nagtuo kana, “Sa akong kaakig hay nagpanumpa ako nga indi gid sanda makasamit sa kapahuwayan nga itao ko kunta kanda.” Owa nanda nasamiti ro kapahuwayan ngato bisan una eon rato umpisa nga natapos nana ro pagtuga ku kalibutan.

⁴ Sayod naton ra dahil may ginpasueat ro Dyos sa Sagrado nga Kasueatan parti sa ikapitong adlaw nga, “Sa ikapitong adlaw hay nagpahuway ro Dyos ay gintapos eon nana ro anang pagtuga ku tanan sa kalibutan ag kaeangitan.”

⁵ Ag parti gihapon sa ginahambaean ngara nga kapahuwayan hay sinana, “Indi gid sanda makasamit sa kapahuwayan nga itao ko kunta kanda.”

⁶ Matuod nga ro mga hauna ngato nga nakabati ku mayad nga balita parti sa kapahuwayan ngaron hay owa karon kasamit dahil indi sanda magtuo sa Dyos. Pero sa kabubut-on it Dyos hay una pa ro kahigayunan nga makasamit ro tawo ku kapahuwayan ngaron nga anang ginatao.

⁷ Ngani nagtao it uman ro Dyos it ibang tyempo nga makasamit ro tawo ku ratong kapahuwayan. Ag makaron eon ngani ro tyempo ngaron. Sayod kita karon dahil pagkataliwan it abo nga mga dinag-on halin sa tyempo ku mga owa ngato nakasamit ku kapahuwayan ngato hay may ginpasueat ro Dyos kay Haring David, pareho ngani sa akon eon nga ginhambae nga, “Sa makaron nga tyempo, kada may ginahambae kinyo ro Dyos hay ayaw kamo magpatig-a it ueo.”

⁸ Rondayang kapahuwayan nga atong ginaistoryahan hay bukon it kapahuwayan sa lugar nga gindaehan ni Josue sa mga tawo kato anay. Kon ruyon abi ro ginapatungdan kato hay owa eon kunta naghambae ro Dyos pagkataliwan it abo nga dinag-on nga may una pa nga paeaabuton nga tyempo nga masamitan it tawo ro kapahuwayan nga anang itao.

⁹ Ngani sayod naton nga may ginatigana pa nga kapahuwayan nga masamitan ku mga katawhan it Dyos sa ulihi pareho ku anang pagpahuway sa ikapitong adlaw pagkatapos ku anang pagtuga it tanan.

¹⁰ Ro bisan sin-o nga nagaagi ku kapahuwayan nga halin sa Dyos hay nagapahuway eon sa ana nga mga pagkinabudlay, pareho sa Dyos nga nagpahuway man ay gintapos eon nana ro anang pagtuga.

¹¹ Ngani tinguhaan ta gid nga masamitan raya nga kapahuwayan. Indi kita magtuead sa mga kalolo-lolohan naton nga owa magtuman sa Dyos ngani owa sanda kasamit ku ratong kapahuwayan nga ana kunta nga itao kanda.

¹² Dapat nga pursigido gid kita sa pagtuman sa Hambae it Dyos dahil ro hambae it Dyos hay buhi ag epektibo sa pagpamunga sa atong kabuhi kon ano ro anang tinutuyo. Mas mataeom pa ra kaysa sa bisan ano nga daga nga doble it taeom. Kon mauno makadueot it madaeom ro sangka mataeom nga daga sa kasueud-sueuran it eawas it tawo hasta sa kaeuta-eutahan ag utok it tue-an, makaruyon man ro Hambae it Dyos. Makasueod ra sa kaidadaeman ku atong paino-ino ag espirito ag ikapakita nana kon tama o bukon ro atong mga ginaisip ag mga motibo.

¹³ Owa gid it gintuga nga matago sa Dyos. Makita nana ro tanan ag hayag ra sa ana nga panueok. Ag kana man kita magapanabat sa atong mga binuhatan.

Si Jesus ro Aton nga Pinakapinuno nga Saserdote

¹⁴ Ngani padayon nga huptan gid naton ro bilog nga doktrina nga atong ginapatihan dahil may aton nga owa it katupong nga Pinakapinuno it mga Saserdote nga nakasueod sa pinakabalaan nga parti it eangit agod magrepresentar katon sa Dyos Ama. Ag imaw ra hay owa't iba kundi si Jesus nga Unga it Dyos.

¹⁵ Ro aton ngara nga Pinakapinuno nga Saserdote hay nakaeubot kon maeuya kita sa pagsukoe sa tentasyon ag naeuoy imaw katon. Sayod nana ron ay tag nagpakatawo imaw iya sa kalibutan hay naagyan man nana tanan ro mga tentasyon kaparehas naton, pero owa gid imaw nagkasaea.

¹⁶ Ngani dahil ginarepresentar kita ni Jesus sa Dyos nga mabuot nga mayad, magdangop kita sa Dyos nga may kaisog it buot agod kaeuy-an ag buligan nana kita sa oras it aton nga pagkinahangean.