Mga Hebreo 3 - Inkeanon

Si Jesus hay Mas Eabaw pa Kaysa kay Moises

¹ Ngani mga igmanghod ko nga ginpaeain it Dyos nga mangin anang balaan nga mga katawhan, kamo nga parehas man kakon nga gintawag it Dyos agod mangin kaibahan nana idto sa eangit, paino-inoha gid ninyo it mayad si Jesus. Imaw ro ginpadaea iya it Dyos ag imaw man ro atong ginakilaea nga Pinakapinuno nga Saserdote ku doktrina nga atong ginatuuhan.

² Masaligan gid imaw sa pagtuman sa mga gintugyan kana it Dyos nga nagbutang kana dikaron, pareho man kay Moises sa anang pagserbi sa bilog nga panimaeay it Dyos.

³ Pero si Jesus hay ginabilang nga mas daeayawon pa kaysa kay Moises, dahil nga kon ihalimbawa sa sangka baeay hay mas daeayawon ro nag-obra it ruyong baeay kaysa sa mismong baeay.

⁴ Syempre, kon may una ngani nga baeay, may una gid-a nga nag-obra karon, pero ro Dyos ro nagtuga ku tanan nga butang.

⁵ Si Moises ma't-a hay masaligan sa anang pagdipara ku bilog nga panimaeay it Dyos pero sueuguon eang imaw sa ratong panimaeay ag ro anang gin-obra hay nagapamatuod parti sa mga ipahayag it Dyos sa ulihi.

⁶ Pero si Kristo ma't-a hay unga it tagbaeay ag masaligan imaw sa pagtatap ku panimaeay ku anang Ama. Ag kita ro panimaeay it Dyos, kon magpakalig-on kita sa atong pagkasigurado nga mabaton naton ro mga ginpromisa it Dyos nga atong ginapabugae nga maabot.

Ro Kapahuwayan Para sa mga Unga it Dyos

⁷ Ngani dapat nga dumdumon naton ro ginpasueat it Espirito Santo sa Sagradong Kasueatan nga, “Sa makaron nga tyempo, kada may ginahambae kinyo ro Dyos hay pamati kamo.

⁸ Ayaw kamo magpatig-a it ueo pareho ku gin-obra ku inyo nga mga kalolo-lolohan kato tag nagsinukoe sanda kakon ag gintinestingan ro akong pasensya idto sa *disyerto.

⁹ Owa't-a it pundo nga ginminakaruyon nanda ako bisan nakita eon nanda ro mga milagro nga akong ginpang-obra para kanda

¹⁰ sa sueod it kwarenta anyos. Ngani naakig ako kanda tanan dahil nagapinaeayo permi sanda sa akong ginahambae kanda, ag owa sanda naila magkaantigo kon paalin magkabuhi suno sa akong ginaturo kanda.

¹¹ Mawron ngani nga nagpanumpa ako nga indi gid sanda makasamit sa kapahuwayan nga itao ko kunta kanda.”

¹² Mga igmanghod, maghaeong kamo nga owa it bisan sin-o kinyo nga may maeain ag bukon it matinuuhon nga tagipusuon ay ruyon ro magatueod kinyo nga magtalikod sa buhi nga Dyos.

¹³ Agod indi matabo ro makaruyon kinyo hay dapat nga magbueuligan kamo sa pagpalig-on ku inyong pagtuo adlaw-adlaw myentras iya pa kita sa tyempo nga ginatawag nga “Makaron,” kon siin posible eon nga maeuwas ro tawo. Kon obrahon ninyo ron hay owa kinyo it hipapati nga owa it problema bisan magpinakasaea kamo. Pero kon nagapati kamo karon hay hapataeang eon kamo ay ro bunga karon hay mangin dungean kamo sa hambae it Dyos.

¹⁴ Magapadayon nga maeueot ro atong kaangtanan kay Kristo basta huptan naton it malig-on hasta sa katapusan ro atong pagkasigurado nga matuod ro atong ginapatihan parti kana.

¹⁵ Dumduma ninyo it uman ro ginhambae it Sagradong Kasueatan nga, “Sa makaron nga tyempo, kada may ginahambae kinyo ro Dyos hay pamati kamo. Ayaw kamo magpatig-a it ueo pareho ku gin-obra ku inyo nga mga kalolo-lolohan kato tag nagsinukoe sanda kakon.”

¹⁶ Sin-o ratong mga tawo nga nakabati kato ku ginhinambae it Dyos pero nagsinukoe kana? Bukon abi it tanan ngatong gindumaeahan ni Moises paguwa sa Egipto?

¹⁷ Ag sin-o baea ratong naakigan it Dyos sa sueod it 40 anyos? Bukon abi it rato man mismo nga mga tawo nga nagpinakasaea ag ro bunga kato hay nagkaeamatay sanda idto sa *disyerto?

¹⁸ Ag sin-o pa abi ro ginpatungdan it Dyos sa ana nga pagpanumpa nga indi gid sanda makasamit sa kapahuwayan nga ana kunta nga itao kanda? Bukon abi it rondatong mga bukon it matinumanon kana?

¹⁹ Makita naton dikaron nga owa sanda nakasamit kato dahil indi sanda magtuo ag masalig sa Dyos.