Mga Hebreo 12 - Inkeanon

Lig-unon Naton ro Atong Pagtuo Bisan Ano ro Matabo

¹ Ro atong kahalimbawa hay mga manogkarera sa oval nga ginatan-aw it rondatong kaabo-abo nga mga nagpakita kato anay kon mauno ro malig-on nga pagtuo. Ngani aywanan naton ro tanan nga nagapabug-at sa atong pagdaeagan ag sukean ta ro mga saea nga nagapadayon kunta nga magkontrol katon. Dapat nga tiison naton ro tanan nga kalisdanan ag padayunon naton ro atong pagdaeagan sa daean nga ginmarkahan it Dyos para katon.

² Isentro gid naton permi ro atong panueok kay Jesus, ro pasimuno ag manogpaperpekto it pagtuo. Dahil ana permi nga ginapaabot ro kalipay nga mangin ana sa ulihi, mawron nga ginbatas nana ro pageansang kana sa krus ag ginbaliwala ro kahuy-anan karon. Ag makaron hay nagalingkod imaw sa pinakadungganon nga pwesto sa tuo ku trono it Dyos.

³ Ngani isipa ninyo imaw nga nag-antos ku mga grabi ngatong pagkuntra kana ku mga makasasaea, agod indi kamo pagpangeuyahan it buot ag indi eon dayon magpadayon sa pagsunod sa Ginuo.

⁴ Sa inyong pagsukoe sa tentasyon nga magtalikod sa inyong pagtuo, owa pa kinyo it ginpatay por dahil sa inyong pagsukoe ngaron.

⁵ Basi halipat eon kamo sa ginpasueat it Dyos nga makapabaskog ku inyong buot bilang ana nga mga unga nga, “Abi toto, ayaw pag-isipa nga owa it pueos ro pagdisiplina kimo nakon nga Ginuong Dyos, ag ayaw mageuya ring buot kon ginasaway ko ikaw.

⁶ Ginadisiplina ko abi ro akong ginahigugma, ag ginapinahan ko ro ginabilang ko nga akong mga unga.”

⁷ Ngani, antusa eang ninyo ro mga kalisod nga ginaagyan ninyo ay ginadisiplina kamo it Dyos karon bilang anang mga unga. Sin-o eang abi nga unga ro owa kaagi it pagdisiplina it ama?

⁸ Kon owa abi kamo ginadisiplinaha it Dyos pareho ku ginaagyan ku tanan nana nga mga unga hay gakahueugan ron nga mga bastardo't-a kamo ag bukon it matuod nana nga mga unga.

⁹ Ag isaea pa, ro aton nga mga ama iya sa kalibutan hay gaturo katon kon ano ro tama o saea nga buhat ag gadisiplina katon ag nagataha kita kanda dahil karon. Kon ginataha naton ron sanda hay mas kapin pa gid nga dapat kita nga magpasakop sa pagdisiplina katon ku aton nga Ama nga nagtao katon it espirituhanon nga kabuhi. Kon magpasakop kita sa anang pagdisiplina katon hay magakabuhi kita nga nagakasinanto sa anang tuyo.

¹⁰ Ro aton abi nga mga ama iya sa kalibutan hay nagadisiplina katon myentras kita hay nagabahoe suno sa kon ano ro mayad sa andang pagtan-aw. Pero ro pagdisiplina 't-a it Dyos hay perming para sa atong ikamayad agod mangin pareho kita kana nga balaan.

¹¹ Pero myentras ginadisiplina kita hay owa kita nagabatyag it kalipay kundi kasakit it buot. Pero sa ulihi, raya nga pagdisiplina katon hay nagabunga it katawhay it buot ag matarong nga pagpangabuhi.

¹² Ngani, kamo nga matsa owa eon it kusog ro mga alima ag nagakueurog ro tuhod dahil sa kagaoy, magpakalig-on kamo sa inyong pagtuo.

¹³ Balik kamo sa inyong pagkarera ag sunda it tadlong ro daean, agod ro inyong mga kaibahan nga nagaisaea-daywa pa sa andang pagsunod sa Ginuo hay makasunod it matadlong ag indi eon magtaeang dahil sa inyong mayad nga halimbawa kanda.

Bantayan Naton ro Atong Pagtuo Agod Indi Kita Magtalikod Dikaron

¹⁴ Tinguhaa ninyo nga may inyong paghidait sa tanan, ag tinguhaa man nga magpangabuhi kamo it balaan, ay ro bisan sin-o nga owa gapangabuhi it balaan hay indi makakita sa Ginuo.

¹⁵ Mag-andam kamo nga owa kinyo it magbalik sa dating ginatuuhan ag indi eon kasamit it sobrang kabuot it Dyos. Mag-andam man kamo nga owa inha kinyo it magpaeapta it saea nga turo nga makadaea sa dagaya kinyo sa pagpakasaea, dahil pareho ron it makahieilo nga tanom nga nagatapon sa ibang tanom sa palibot.

¹⁶ Mag-andam man kamo nga owa kinyo it maghulid sa bukon ninyo it asawa ukon magtuead kay Esau nga nagbaliwala sa mga bagay nga mahaega sa Dyos. Bilang panganay, ro ginpromisa it Dyos sa anang lolo nga si Abraham hay kana kunta maadto, ugaling ginbaliwala nana ron ag ginbaylo nana sa sangka kaean-an eang.

¹⁷ Hasayran abi ninyo nga ku ulihi, tag gusto eon kunta nana nga mabaton sa anang ama ro bendisyon bilang panganay hay ginbalibaran eo't-a imaw ay bukon eon imaw it bagay magbaton kato. Bisan nagtilinangis imaw sa anang pagpangayo nga magbag-o ro isip ni tatay na hay owa gid it natabo.

¹⁸ Ro atong paagi sa pagdangop sa Dyos makaron nga tyempo it bag-o nga kasugtanan nga gintao it Dyos hay eain kaysa sa paagi kato ku atong mga kalolo-lolohan nga mga inapo ni Israel sa tyempo it hauna nga kasugtanan. Sa andang pagdangop sa Dyos hay may mga bagay nga puydi nanda mabuytan, makita ag mabatian. May bukid nga may nagadaba-daba nga kaeayo, may makahaeadlok nga kadueom bisan adlaw pa, ag may kabaskog nga hangin nga matsa may bagyo.

¹⁹ May mabaskog nga tunog it trumpeta nga nabatian nanda ag may una nga nagahambae. Pagkabati nanda ku limog ngato hay nagpakitluoy sanda nga indi eon rato magpadayon it hinambae kanda bisan sangka bisaea lang,

²⁰ ay matsa malipong abi sanda sa sugo nga bisan sin-o, tawo man o sapat, nga makaduot sa bukid hay batuhon hasta nga mamatay.

²¹ Ro mga haagyan ngara ku mga tawo hay grabi 't-a sa kakueueba nga bisan ngani si Moises hay nakahambae nga nagakueurog mana ako sa sobrang kahadlok.

²² Pero kita, ro aton ma't-a nga gindangpan hay ro Bukid it Zion kon tawgon, nga ruyon ro syudad ku buhi nga Dyos, ag ginatawag man nga ro Jerusalem nga idto sa eangit kon siin may linibo nga mga anghel nga nagakinasadya.

²³ Idto nagtililipon ro tanan nga mga ginakabig it Dyos nga mga panganay nana nga mga unga ag ruyon hay owa it iba kundi ro tanan nanang katawhan. Ro andang mga ngaean hay ginlista eon it Dyos idto sa eangit. Nagdangop kita sa Dyos nga hukom it tanan ag idto man ro mga espirito ku mga tawo nga nagpangabuhi it matarong, nga ginabilang it Dyos nga owa eon gid it saea.

²⁴ Nagdangop man kita kay Jesus, nga imaw ro manogpatunga katon ag sa Dyos sa bag-o nga kasugtanan. Ag matsa ginwisikan kita it anang dugo nga nag-agay pagpatay kana, ag paagi karon hay ginpatawad eon ro atong kasae-anan. Ngani ro dugo ni Jesus hay mas pa kaysa sa dugo ni Abel nga matsa nagapangayo eang it hustisya.

²⁵ Ngani mag-andam kamo nga indi magpabungoe-bungoe sa ginahambae it Dyos kinyo. Ro mga tawo abi kato anay nga nagpabungoe-bungoe sa ginhambae it Dyos halin sa bukid it Sinai iya sa kalibutan hay owa nakalikaw sa pina. Kon makaruyon hay mas kapin gid nga indi kita makalikaw sa pina kon pabungoe-bungoean ta man ro Dyos nga nagahambae katon halin sa eangit.

²⁶ Kato anay, tag naghambae ro Dyos sa Bukid it Sinai hay nag-uylog ro kalibutan dahil sa anang limog. Pero ginpasayod nana nga maabot ro adlaw nga pagauylugon nana ra it uman, ag bukon eang it ro kalibutan kundi pati ro kaeangitan.

²⁷ Ngani klaro suno dikaron nga kon obrahon nana ron hay ro tanan nga mga gintuga hay maduea. Ro mabilin lang hay ratong owa it pagkaduea, ag ruyon hay ro anang paghari sa anang mga katawhan.

²⁸ Ngani dahil gintapoe nana kita sa ana nga ginharian nga indi maduea, dapat nga mapinasaeamaton kita permi kana ag paagi karon, simbahon naton imaw nga may pagtahod ag kataha. Ruyon ro pagsimba nga makapalipay kana.

²⁹ Dapat nga tahuron gid naton imaw dahil ro aton nga Dyos kon magpina it saea hay matsa kaeayo nga nagadaba-daba nga nagapangtugbang.