Mga Hebreo 11 - Inkeanon

Mga Ehemplo it mga Tawo na Nagtuo it Malig-on Gid Kato Anay

¹ Ano ro kahueugan it pagtuo? Paagi sa pagtuo hay sigurado kita nga ro atong mga ginapaabot hay matabo. Ro pagtuo ro atong pamatuod nga matabo sanda ron bisan owa pa naton hikita.

² Dahil sa pagtuo sa Dyos ku aton nga mga kalolo-lolohan kato, mawron nga aprubado sanda kana.

³ Dahil man sa atong pagtuo sa Dyos, mawron nga naeubtan naton nga gintuga it Dyos ro tanan sa kalibutan ag sa kaeangitan paagi sa anang paghambae. Nagakahueugan ra nga ro mga butang nga makita hay owa natuga halin sa mga bagay nga una eon eagi, dahil naghambae eang imaw ag natuga eagi sanda.

⁴ Aton nga dumdumon si Abel. Dahil sa anang pagtuo, naghaead imaw it haead nga mas mahaega sa mata it Dyos kaysa sa haead ni Cain. Dahil man sa anang pagtuo, ginbilang imaw nga matarong ay ginbaton it Dyos ro anang haead. Ngani mahambae naton nga bisan patay eon si Abel hay nagahambae gihapon imaw katon paagi sa ehemplo ku anang pagtuo.

⁵ Dahil sa pagtuo ni Enoc hay owa imaw nakaagi it kamatayon. Imbis nga mamatay hay ginbuoe 't-a imaw it Dyos ngani nga owa eon imaw hikit-i. Bago abi imaw ginbuoe hay kilaea eon imaw bilang tawo nga perming nagatao it kalipay sa Dyos.

⁶ Kon owa it pagtuo ro sangka tawo hay imposible nga mapalipay nana ro Dyos. Ro bisan sin-o abi nga nagadangop sa Dyos hay dapat magpati nga may Dyos gid ag nagatuo nga sa mga nagausoy it paagi nga makilaea imaw hay ana sanda nga premyuhan kon ano ro andang ginausoy.

⁷ Dahil sa pagtuo ni Noe, mawron nga nagpati imaw sa paandam it Dyos parti sa anang obrahon sa ulihi. Bisan owa pa imaw it hakita nga makato nga natabo hay nagtuo gid imaw nga matabo gid rato. Ag dahil sa anang pagtaha sa Dyos hay gintuman nana ro sugo it Dyos nga mag-obra it arka agod maeuwas ro anang panimaeay. Ro anang pagtuo ro nagpakita man nga bagay eang nga pinahan it Dyos it kamatayon ratong mga indi magtuman kana. Ag ginpremyuhan it Dyos si Noe it pagkamatarong sa anang panueok nga mabaton man ku bisan sin-o nga may pagtuo nga makaruyon.

⁸ Dahil sa pagtuo ni Abraham hay nagtuman imaw kat ginhambaean imaw it Dyos nga magpanaw sa sangka lugar nga ginpromisa it Dyos nga ipapanubli kana. Nagpanaw imaw bisan owa nana hisayri kon siin imaw maadto.

⁹ Dahil man sa anang pagtuo, nagsaylo imaw sa nasyon nga ginpromisa it Dyos nga mangin ana. Pero samtang nagahueat imaw karon hay nagmantenir anay imaw nga mag-istar sa torda ag maghinalin-halin it lugar nga maistaran nga matsa bukon 't-a it imaw ro tag-ana ku ratong nasyon. Makaruyon man ro gin-obra ku anang unga nga si Isaac ag ku ulihi, pati man ro anang apo nga si Jacob nga mga kapareho nana nga mga manunubli man ku ginpromisa ngato it Dyos.

¹⁰ Nagmantenir si Abraham nga mag-istar sa torda ay ginapaabot nana nga makaistar sa syudad nga owa it pagkaduea nga ro Dyos mismo ro nagdesinyo ag nagpatindog.

¹¹ Dahil man sa pagtuo, bisan si Sara nga asawa ni Abraham hay baog ag sobra eon sa normal nga idad it pagpangunga hay gintaw-an it Dyos it ikasarang nga makaunga pa dahil nagtuo imaw nga ro Dyos nga nagpromisa nga makaunga sanda hay masaligan.

¹² Ngani bisan mahambae nga si Abraham hay pareho eon it patay dahil sa sobrang kagueangon, ro inapo ku sangka tawo eang ngara hay pareho sa kaabuon ku mga bituon sa kaeangitan ag ku baeas sa baybayon nga indi mahuyap.

¹³ Hasta namatay sanday Abraham, Sara, Isaac, ag Jacob hay nagtuo sanda nga tumanon it Dyos ro anang ginpromisa bisan owa nanda rato habaton. Pero matsa hakita eon nanda ro tyempo sa ulihi nga mabaton ku andang mga inapo ro katumanan ku ratong promisa ag nalipay sanda karon. Ginkilaea nanda nga mga estranghero eang ag mga umaeagi sanda sa rayang kalibutan.

¹⁴ Ro mga tawo nga nagahambae nga mga umaeagi eang sanda sa rayang kalibutan hay nagapakita nga ginausoy nanda ro nasyon nga anda gid ag kon siin bukon eon sanda it mga estranghero.

¹⁵ Kon rondatong nasyon nga andang ginhalinan ro andang ginadumdum hay nagbalik eo't-a kunta sanda idto.

¹⁶ Pero bukon 't-a it rondato ro andang ginahandom gid kundi ro mas manami pa gid nga maistaran idto sa eangit. Ngani owa nahuya ro Dyos nga tawgon imaw nga Dyos nanda ay ginpreparahan nana sanda it andang maistaran nga syudad sa ulihi.

¹⁷ Dahil man sa anang pagtuo, haom si Abraham magsakripisyo ku anang unga nga si Isaac tag gintestingan imaw it Dyos nga himuon ron. Haom imaw nga isakripisyo si Isaac bisan bugtong nana ra nga unga ag imaw man ro ginapatungdan sa ginpromisa it Dyos nga,

¹⁸ “Ro mga inapo eang ni Isaac ro bilangon nga mga inapo nimo nga magabaton ku akong mga ginpromisa.”

¹⁹ Haom si Abraham nga isakripisyo si Isaac dahil nga sa anang paino-ino hay sarang man gihapon ra banhawon it Dyos. Kon owa pagpunggi it Dyos si Abraham hay ana gid nga isakripisyo si Isaac ngani mahambae nga matsa nabanhaw man ra ag nagbalik kay Abraham.

²⁰ Dahil sa pagtuo ni Isaac hay gintuman nana ro kabubut-on it Dyos sa anang paghambae sa anang mga unga nga si Jacob ag si Esau kon ano ro matabo kanda sa ulihi.

²¹ Makaruyon man si Jacob, dahil sa anang pagtuo, kat maeapit lang imaw mamatay hay ginbendisyunan nana ro anang daywang ka apo kay Jose. Pakatapos hay nagsimba imaw sa Dyos samtang gahumbabay sa anang baston.

²² Dahil man sa pagtuo ni Jose, tag magueang eon imaw ag madali lang mamatay hay gintagna nana nga maabot ro adlaw nga ro tanan nga inapo ni Israel hay magahalin sa Egipto. Nagbilin man imaw nga daehon ro anang tue-an kon magpanaw eon sanda, agod ieubong sa nasyon nga ginpromisa it Dyos kanda.

²³ Dahil sa andang pagtuo hay owa paghadluki ro mga ginikanan ni Moises sa sugo it hari nga dapat pamatyon ro mga eapsag nga eaki nga mga Hebreo. Ngani pagkatawo ni Moises hay gintago nanda ra it mga tatlong buean dahil hakita nanda nga gwapo gid imaw nga eapsag.

²⁴ Dahil sa pagtuo ni Moises, tag hamtong eon ro anang idad hay gintalikdan nana ro masadya nga kabuhi bilang matsa unga ku prinsesa nga unga ku hari it Egipto.

²⁵ Ginpaeabi pa nana nga mag-antos, kaibahan ku anang mga kadugo nga mga katawhan it Dyos kaysa sa magpanami-nami sa pagkabuhi sa saea nga ro kalipay dikaron hay owa nagabuhay.

²⁶ Nagdesidir imaw nga bisan pakaeainon imaw dahil sa anang pagtuo sa Maneueuwas nga ipadaea it Dyos sa ulihi hay mas mahaega ron nga kamaeayran kaysa sa tanan-tanan nga manggad sa Egipto, dahil ginaisip nana permi ro premyo nga itao it Dyos kana sa ulihi.

²⁷ Ngani inaywanan nana ro Egipto, bukon it dahil sa anang kahadlok sa kaakig it hari kundi dahil sa anang pagtuo sa plano it Dyos. Ag owa imaw nagkataka sa paghinueat ku katumanan karon, ay parehas eang nga hakita gid nana ro Dyos nga indi makita.

²⁸ Dahil man sa anang pagtuo sa Dyos, ana nga ginsugo ro anang mga kadugo nga mga inapo ni Israel nga wisikan it dugo it tiyo it karnero ro anda nga mga pwertahan, agod taliwanan sanda ku anghel nga ginpadaea it Dyos agod pamatyon ro mga panganay nga eaki sa Egipto. Dikato man nag-umpisa ro andang pagselebrar it Pagtililipon sa Pagdumdum ku *Pagtaliwan suno sa bilin it Dyos kanda.

²⁹ Dahil sa pagtuo ku mga inapo ngato ni Israel, nagtikang sanda sa tunga it Dagat nga Puea hasta nakatabok sanda sa pihak, nga ro andang gintikangan hay mamaea nga eugta ay ginpihak it Dyos ro dagat. Pero tag ginaeagas kunta sanda it mga tagaEgipto hay nagkaeaeumos 't-a rato sanda ay ginpabalik 't-a it Dyos ro anang ginpihak ngato nga dagat.

³⁰ Dahil man sa pagtuo nanda nga mga inapo ni Israel, natumba ro mataas nga pader ku syudad it Jerico sa ikapitong adlaw nga ginlibot nanda ra.

³¹ Dumduma man ninyo si Rahab nga sangka bayi sa Jerico ku rato man nga tyempo nga nagabaligya ku ana nga eawas. Dahil sa anang pagtuo hay owa namatay kaibahan ku anang mga kasimanwa nga indi magtuo sa Dyos, ay anang gindipara it mayad ag ginbuligan ro mga tawo nga ginpadaea idto ni Josue agod magpang-espiya.

³² Abo pa't-a ro akong ikahambae parti sa mga tawo kato nga malig-on ro pagtuo sa Dyos, ugaling hay kueangon ako sa oras kon idetalye ko ro parti kanday Gideon, Barak, Samson, Jefta, David, Samuel ag sa mga propeta.

³³ Dahil sa andang malig-on nga pagtuo, may iba kanda nga nagperdi it mga hari ku ibang mga nasyon, may nagdumaea it matarong, may nagbaton ku mga ginpromisa it Dyos kanda, ag may nakaperdi it liyon ngani owa sanda haeapa.

³⁴ May iba kanda nga owa nasunog tag gin-itsa sanda sa nagadaba-daba nga kaeayo. May iba man kanda nga nakalikaw sa kamatayon sa alima ku mga tawo nga gapamatay kunta kanda paagi sa espada. May iba kanda nga maeuya eon pero gintaw-an sanda it Dyos it kabaskog. May iba man kanda nga nangin maisog sa gira ngani pinerdi nanda ro mga kasuldaduhan nga nagpanggubat kanda.

³⁵ May mga bayi man kato nga dahil sa andang pagtuo, ro andang mga hinigugma nga namatay eon hay nabuhi it uman. Pero may iba ma't-a nga gin-antos ro pagsakit kanda hasta mamatay dahil indi nanda pagtalikdan ro andang pagtuo agod makahilway sa pagpasakit kanda. Ro andang ginapaabot abi hay ro mas mayad nga kabuhi sa eangit pagkabanhaw nanda.

³⁶ May iba nga nag-antos it pag-intrimis ag paglatigo. May iba man nga ginpriso ag ginkadenahan pa idto sa sueod it prisuhan.

³⁷ May iba nga gineinapog it bato hasta namatay. May iba man nga gineagari ro andang eawas hasta nautod. May iba nga ginpatay paagi sa espada. May iba nga ginpinakalisdan ag ginpinintasan it tawo. Ginpaeayas sa andang kaugalingon nga banwa ngani nagtiniis sanda sa sobrang kapobrehon. Nagpalaboy-laboy ag nageambong eon lang it panit it karnero ag kanding.

³⁸ Naglinibot-libot sanda sa mga *disyerto ag sa mga bukid. Idto lang sa mga eungib ag sa mga buho sanda nagpaaeang-aeang. Sa minatuod eang ro mga tawo sa rayang kalibutan hay bukon it takos nga mag-iba kanda dahil sa kalig-on ku anda nga pagtuo.

³⁹ Nalipay kanda tanan ro Dyos dahil nagpadayon sanda nga malig-on ro andang pagtuo bisan owa nanda habaton ro ginpromisa nana.

⁴⁰ May mas mayad pa abi nga plano ro Dyos ag ro anang plano ngaron hay nga indi matuman ro anang ginpromisa kanda myentras indi pa kita ikatapoe karon, agod kita tanan hay dueungan nga makabaton ku atong premyo bilang anang mga katawhan nga owa eon gid it saea sa anang panueok.