Mga Hebreo 10 - Inkeanon

Ro Kasae-anan it mga Tawo hay Mapatawad Eang Paagi sa Kamatayon ni Jesus

¹ Ro sistema it pagtuman sa mga kasuguan nga gintao it Dyos paagi kay Moises kato hay nagdaea it sangkiri eang nga pag-intindi ku mga mayad nga butang nga mabaton paagi kay Kristo sa ulihi. Pareho eang sanda it anino ku mga mayad nga butang ngato, pero bukon gid it mga rato mismo. Bisan may ginahaead nga mga sapat nga sakripisyo kada dag-on sa kabuhay-buhay nga tyempo, ro mga sakripisyo ngato hay owa nakahimo sa mga tawo nga nagapahaead kato nga mangin owa eon it saea sa mata it Dyos.

² Kon ro mga sakripisyo abi ngato hay nakahimo kanda nga owa eon it saea sa mata it Dyos, nagpundo eon kunta ro mga saserdote sa pagsinakripisyo, dahil ro mga nagapahaead hay ginlimpyuhan eo't-a sa andang mga saea ag owa eon sanda ginakonsensyaha karon ugaling owa ron natabo.

³ Ag rato nga mga paghaead it sakripisyo hay nagapadumdum kanda kada dag-on nga makasasaea't-a gihapon sanda.

⁴ Imposible abi nga paagi sa dugo it toro nga baka ag dugo it kanding hay mapatawad ro atong mga saea.

^5-6 Mawron nga tag madali eon lang magpakatawo si Kristo iya sa kalibutan hay naghambae imaw sa Dyos Ama, “Owa ka nalipay ku mga ginasakripisyo nga sapat, pati man ku mga ginasunog nga sapat sa altar ag ku iba pa nga mga haead, dahil indi ron makahimo sa tawo nga owa eon it saea sa imong mata. Ro kinahangean hay eawas it tawo nga owa it saea ngani ginpahauman mo ako it eawas nga makaruyon.

⁷ Ngani hayra ako, Dyos ko, agod tumanon ro imo nga pagbuot suno sa nasueat sa binaeueon nga kasueatan parti kakon.”

⁸ Ano ro matun-an naton sa mga ginhambae ngara ni Kristo dikara? Ro hauna nanang ginhambae hay owa nagahandom ro Dyos it mga sari-sari nga mga sakripisyo pareho it mga sapat ag iba pa nga mga ginahaead kato anay para sa mga saea it mga tawo, ag owa man imaw nalipay sa mga ruyon ngaron. Ginhambae ni Kristo ron bisan ro mga ruyon hay ginasugo it Kasuguan.

⁹ Pagkatapos hay naghambae pa gid si Kristo nga, “Hayra ako, agod tumanon ro imo nga pagbuot.” Ngani hasayran naton dikaron nga ginduea eon ro kinato-kato pa nga sistema it paghaead it ginasakripisyo nga mga sapat ag ginbayluhan eon it pagsakripisyo ku eawas ni Kristo mismo suno sa kabubut-on it Dyos.

¹⁰ Ag dahil gintuman ni Jesu-Kristo ro kabubut-on it Dyos, ngani kita hay nangin mga balaan eon nga katawhan it Dyos paagi sa kaisaea gid lang nga pagsakripisyo nana ku ana nga eawas.

¹¹ Sa dati nga sistema it pagsimba ro mga saserdote hay adlaw-adlaw nga nagahimo ku anda nga bueuhaton ag nagahaead it ginsakripisyo nga sapat it pauman-uman, pero ro mga sakripisyo ngaron hay indi gid makahimo sa mga tawo nga owa eon it saea sa mata it Dyos.

¹² Pero si Kristo ma't-a hay kaisaea eang magsakripisyo ku anang kaugalingon para sa kasae-anan it tawo ag owa eon it kinahangean nga uman-umanon pa rato bisan hasta hin-uno. Pagkatapos hay nagpungko dayon imaw sa pinakadungganon nga pwesto sa tuo it Dyos Ama.

¹³ Makaron hay idto eon imaw nagahueat hasta obrahon it Dyos nga tueungtungan ku anang siki ro anang mga kaaway.

¹⁴ Ngani paagi sa ana nga sang beses eang nga pagsakripisyo, kita nga mga ginpaeain agod mangin katawhan it Dyos hay gin-obra nana nga owa eon gid it bisan ano nga saea sa panueok it Dyos hasta sa owa it katapusan.

¹⁵ Ro Espirito Santo hay nagapamatuod kamon parti kara sa anang ginpasueat kato nga,

¹⁶ “Hambae it Ginuong Dyos, ‘Raya ro akong promisa sa bag-o nga kasugtanan nga akong itao kanda sa paeaabuton nga tyempo. Akon nga ibutang sa anda nga tagipusuon ro akon nga kasuguan ag isueat ko ron sa andang paino-ino.’ ”

¹⁷ Naghambae pa gid imaw, “Indi ko eon gid pagdumdumon ro anda nga mga saea ag pagbaliwala sa akong kasuguan.”

¹⁸ Kon mawron nga nahapatawad eon ro mga saea it mga tawo, owa eon it kinahangean nga maghaead pa it sakripisyo para sa saea.

Dahil sa Kamatayon ni Jesus hay Makapaeapit Kita Permi sa Dyos

¹⁹ Ngani mga igmanghod, dahil sa pagpatueo ni Jesus ku anang dugo para katon hay may kaisog eon kita it buot nga magpaeapit sa Dyos kon siin imaw sa eangit nga ginasimbolo ku Pinakasagrado nga Kwarto idto sa torda anay kato.

²⁰ Paagi sa anang kamatayon hay nag-obra imaw it bag-o nga daean agod makapaeapit eon kita sa Dyos. Ginpakita it Dyos nga makapaeapit eon kita kana dahil tag namatay si Jesus hay gin-gisi it Dyos ro kurtina nga nagaabang sa tawo nga makasueod sa anang atubang sa Pinakasagrado nga Kwarto idto sa Templo. Ag mahambae naton nga ro bag-o ngara nga daean hay buhi nga daean dahil si Jesus mismo ro daean, ag nabanhaw imaw, ag buhi hasta sa owa it katapusan.

²¹ Ag dahil imaw ro atong owa it katupong nga Pinakapinuno nga Saserdote nga nagadumaea sa panimaeay it Dyos,

²² magpaeapit kita sa Dyos nga may sinsiro nga tagipusuon ag malig-on nga pagsalig ag pagtuo kana, ay ro atong tagipusuon hay pareho it ginwisikan it dugo ni Jesus, ag ro atong eawas hay pareho it ginhugasan eon it malimpyo nga tubi. Ngani malimpyo eo't-a ro atong konsensya.

²³ Padayunon man naton ro pagsugid sa iba nga may kaisog it buot ku mga mayad nga butang nga ginpromisa it Dyos katon ag indi kita mag-isaea-daywa nga mabaton naton ron ay sayod kita nga masaligan gid imaw nga nagpromisa karon.

²⁴ Aton man nga paino-inohon kon paalin ganahan ro kada isaea katon sa pagpakita it paghigugma sa atong isigkatawo ag sa paghimo it mayad.

²⁵ Indi naton dapat pagpunduhon ro atong mga pagtililipon agod magsimba, pareho ku ginaobra it iba nga nagpundo eo't-a. Padayunon 't-a naton ro atong pagtililipon agod mapabaskog naton ro buot it kada isaea sa pagsunod sa Ginuo. Mas kapin nga importanti ra dahil makita eon naton ro mga paeatandaan nga nagapinaeapit eon ro adlaw nga magabalik iya ro Ginuo.

Grabi Gid ro Ipina it Dyos sa mga Nagabaliwala ku Kamatayon ni Jesus

²⁶ Kon nakasayod eon abi kita it kamatuuran parti sa pagsakripisyo ni Jesus ku anang kaugalingon ag hungod kita nga magbaliwala karon hay owa eon it ibang pangsakripisyo nga sarang ihaead agod mapatawad ro atong mga saea.

²⁷ Owa eon it iba pang mapaabot ro tanan nga nagakuntra sa Dyos kundi ro anang makahaeadlok nga paghukom ag ro anang grabi nga pina nga pareho it nagadaba-daba nga kaeayo nga gapangtugbang it bisan ano nga anang maagyan.

²⁸ Kato anay, ro bisan sin-o nga nagabaliwala sa kasuguan ni Moises hay ginapatay nga owa it euoy-euoy kon may daywa o tatlo nga ka saksi kuntra kana.

²⁹ Kon makaruyon ngani kato hay mauno man ro mat nagaeusak sa Unga it Dyos ay ginabaliwala nana ro dugo nga ana karang gin-uea, bisan nga sa bag-o nga kasugtanan nga gintao it Dyos, ro dugo ngaron ro naglimpyo kana sa anang mga kasae-anan? Ro nagahimo karon hay nagainsulto man sa Espirito Santo nga nagapakita katon ku sobrang kabuot it Dyos. Ro makaruyong klasing tawo hay bagay eang nga pinahan it mas mabug-at pa kaysa sa mga nagbaliwala ngato ku kasuguan ni Moises kato anay.

³⁰ Kilaea abi naton ro Dyos nga naghambae, “Ako ro magabaeos. Ako man ro magapina.” Ag naghambae pa gid imaw, “Ako nga Ginuong Dyos ro magahusgar sa akong mga katawhan.”

³¹ Makahaeadlok gid kon nagaatubang eon ro tawo sa buhi nga Dyos nga nagahueat ku anang sintinsya.

³² Dumduma ninyo kon mauno kamo kato tag bag-o pa eang kamo nga nahayagan ku Mayad nga Balita. Nakaagi kamo it grabi nga kalisdanan pero owa gid kamo maperdi.

³³ Kon amat hay ginapakaeain ag ginahingabot kamo sa atubang it kadagayaan ag kon amat man hay nagaunong kamo sa mga ginahimuan it makaruyon.

³⁴ Nag-unong man kamo sa mga hapriso dahil sa andang pagtuo. Ag tag ginbuoe ku mga may otoridad ro inyo nga mga pagkabutang hay nalipay 't-a kamo nga makaagi karon dahil sayod kamo nga taw-an kamo it Dyos sa ulihi it mas pa karon nga mga butang nga magapabilin hasta sa owa it katapusan.

³⁵ Ayaw ninyo pagpabay-i nga maduea ro inyo ngarong kaisog it buot dahil ro premyo karon hay mabahoe gid.

³⁶ Dapat nga padayon kamo sa inyong pagtuo kay Jesus agod mabaton ninyo ro ginpromisa it Dyos dahil gintuman ninyo ro anang kabubut-on.

³⁷ Nasueat abi sa Sagrado nga Kasueatan nga, “Sa indi magbuhay, imaw nga ginapaabot nga mabalik hay maabot gid ag indi imaw maulihi.

³⁸ Ro akong mga balaan nga katawhan nga nangin balaan paagi sa andang pagtuo kakon hay magakabuhi hasta sa owa it katapusan. Pero kon magtalikod sanda kakon hay indi ako malipay kanda.”

³⁹ Pero bukon kita it mga tawo nga nagatalikod sa Dyos ag ro dangatan hay pina sa impyerno hasta sa owa it katapusan kundi kita't-a hay mga tawo nga malig-on ro pagtuo ag maeuwas.