Mga Binuhatan 8 - Inkeanon

Ginhingabot ni Saulo ro mga Tumueuo ni Jesus

^1-3 Ku rato mismo nga adlaw nga ginpatay si Esteban hay nag-umpisa man ro grabi nga paghingabot sa mga tumueuo idto sa Jerusalem. Gineubong si Esteban ku mga tawo nga matinumanon sa Dyos ag grabi ro andang pagtinangis sa anang pagkamatay. Pero si Saulo hay kompormi gid sa pagpatay ngato kay Esteban. Ana gid nga ginhiningabot ro tanan nga mga tumueuo agod owa it mabilin kanda. Sige ro anang pagpamaeay-baeay ag pagpinangguyod ku mga tumueuo, eaki man o bayi, agod ipapriso. Mawron nga nagtaeapeaag ro tanan nga mga tumueuo sa kon siin-siin nga mga lugar sa mga probinsya it Judea ag Samaria. Ro owa eang maghalin sa Jerusalem hay ro mga apostoles.

Nagwali si Felipe Parti sa Mayad nga Balita Idto sa Samaria

⁴ Ro mga tumueuo nga nagtaeapeaag hay naglinibot ag nagwinali ku Mayad nga Balita parti kay Jesus.

⁵ Sambilog kanda hay si Felipe. Nag-adto imaw sa sangka syudad it Samaria ag nagwali parti kay Jesus, ro Maneueuwas nga ginpromisa it Dyos.

⁶ Pagkabati ku kaabo nga mga tawo ku mga ginhinambae ni Felipe ag pagkakita nanda ku mga milagrosong pamatuod nga anang ginahimo hay nagbilog sanda sa pagpamati kana.

⁷ Nagapamati gid sanda ay abo nga mga maeain nga espirito ro anang ginpangsuboe sa mga tawo nga nagasiyagit kon magguwa. Abo man nga mga paralitiko ag mga eupog ro anang ginpamayad.

⁸ Ngani nalipay gid ro mga tawo sa lugar ngato.

⁹ May tagaidto nga si Simon ro anang ngaean. Babaylan ra imaw sa ratong lugar ag mabuhay eon nga nangawa kana ro mga tagaidto dahil sa anang gahom. Ginapabugae nana nga bukon imaw it basta-basta nga tawo.

¹⁰ Nagapamati gid kana ro tanan nga mga tawo, halin sa pinakakubos hasta sa pinakadungganon. Sinanda, “Ro tawo ngara hay may gahom it Dyos ag bagay eang nga tawgon imaw nga ‘Ro Gamhanan.’ ”

¹¹ Mabuhay eon nga ginakangaw-an ku mga tawo ro anang mga ginaobra nga makangawa-ngawa ngani nagapati gid sanda kana.

¹² Pero tag nagpati eon sanda sa mayad nga balita nga ginawali ni Felipe parti sa paghari it Dyos sa anang mga sinakpan ag parti kay Jesus nga imaw ro Maneueuwas nga anang ginpromisa hay nagpabawtismo sanda, eaki man o bayi.

¹³ Pati man ngani si Simon hay nagpati ag nagpabawtismo man. Nagsinunod eon dayon imaw kay Felipe. Hangawa gid imaw sa hakita nana nga makangawa-ngawang mga butang ag mga milagrosong pamatuod nga ginahimo ni Felipe.

¹⁴ Tag habatian ku mga apostoles sa Jerusalem nga ginbaton it mga tagaSamaria ro mensahi it Dyos hay ginpaadto nanda idto sanday Pedro ag Juan.

¹⁵ Pag-abot nanda idto hay ginpangamuyuan nanda ro mga tumueuo agod mabaton nanda ro Espirito Santo

¹⁶ dahil owa pa rato nagkunsad bisan kanyo kanda. Ginbawtismuhan pa eang sanda sa ngaean ni Ginuong Jesus.

¹⁷ Tag gintungtung nanday Pedro ag Juan ro andang mga alima sa kada isaea kanda hay nabaton dayon nanda ro Espirito Santo.

¹⁸ Pagkakita ni Simon nga ro pagtungtung it alima ku mga apostoles ro paagi nga ikatao nanda ro Espirito Santo hay gintunghuean nana sanda it kwarta.

¹⁹ Hambae dayon ni Simon kanda, “Pabakea man abi ako ninyo ku gahom ngaron agod makabaton ku Espirito Santo ro bisan sin-o nga tungtungan nakon ku akong mga alima.”

²⁰ Pero ginsabat imaw ni Pedro, “Mapaimpyerno ka gid pati ku imong kwarta ay eaom mo't-a hay mabakae mo ro gahom nga ginatao it Dyos!

²¹ Owa ka hatapoe sa raya nga bueuhaton ay ro imong kabubut-on hay maeain sa mata it Dyos!

²² Hinuesuei ag talikdi ro imo ngarong kaeainan, ag magpangamuyo ka sa Ginuo nga kabay pa nga patawaron ka nana sa imong maeain ngaron nga motibo.

²³ Ginahambae ko ra ay sayod ko nga nahikaw ka gid it duro ag ginaulipon ka it saea.”

²⁴ Nagsabat si Simon, “Maeuoy kamo! Pangamuyua man ninyo sa Ginuo nga indi matabo kakon ro inyo ngarong ginhambae.”

²⁵ Nagpamatuod dayon sanday Pedro ag Juan sa mga tawo idto parti sa ginturo ag ginhimo ni Ginuong Jesus ag anda man nga ginwali ro mensahi parti kana. Pagkatapos hay nagbalik sanda sa Jerusalem. Nagwinali man sanda ku Mayad nga Balita sa mga kabaryuhan nga sakop it Samaria nga andang maagyan.

Gintud-an ni Felipe ro Sangka Opisyal nga tagaEtiopia Parti kay Jesus

²⁶ Tag nakahalin eon sanday Pedro, may anghel it Ginuong Dyos nga nagpakita kay Felipe ag naghambae, “Adto makaron eagi sa Jerusalem ag sundon mo dayon ro karsada nga paadto sa Gaza.” Ro karsada ngato hay idto sa *disyerto.

²⁷ Ngani pumanaw eagi si Felipe. Tag idto eon imaw sa karsada ngato hay may nagaagi man nga isaeang ka mataas nga opisyal ku candace o rayna it Etiopia. Idto imaw rato naghalin sa Jerusalem. Nagsimba imaw idto. Mabahoe ro responsibilidad ku tawo ngato ay imaw ro nagatatap ku manggad ku rayna.

²⁸ Nagapauli eon imaw kato sakay sa anang karwahe. Nagabasa imaw ku ginsueat ni Propeta Isaias.

²⁹ Naghambae ro Espirito Santo kay Felipe, “Subeanga ro karwahe ngaron ag dunganan mo dayon.”

³⁰ Dumaeagan si Felipe ag tinuparan ro karwahe. Habatian nana nga ginabasa it opisyal ro ginsueat ni Propeta Isaias. Ginpangutana imaw ni Felipe, “Haeubtan mo ma't-a ro imong ginabasa ngaron?”

³¹ Nagsabat imaw, “Paalin ko ra maeubtan ay owa man it gaturo kakon?” Ana dayon nga ginsampit si Felipe nga magsakay sa anang karwahe.

³² Ro parti ngato it Sagrado nga Kasueatan nga ginabasa ku opisyal hay raya: “Owa gid imaw magreklamo bisan ginapaantos. Pareho imaw it karnero nga bisan ginadaea sa matansahan hay nagasunod ea't-a. Ag pareho man imaw it tiyo it karnero nga owa gid nagakalimog kon ginabueog ro anang baeahibo.

³³ Ginpakahuy-an imaw ag ro pagsintinsya kana hay bukon it tama. Owa gid it isugid nga may anang inapo ay temprano pa nga binawi ro anang hueam nga kabuhi.”

³⁴ Ginpangutana it opisyal si Felipe, “Sin-o baea ro ginapatungdan ku propeta sa ana ngarang ginhambae? Ro anang kaugalingon o may iba pa?”

³⁵ Ginsabat imaw ni Felipe ag ginpaathag nana nga ro ginapatungdan ku ratong parti it Sagrado nga Kasueatan hay si Jesus. Ana dayon nga ginpaathag tanan kana ro Mayad nga Balita parti kay Jesus.

³⁶ Sa andang pagbiyahe ngato, nakaabot sanda sa sangka lugar nga may tubi. Naghambae ro opisyal, “Hato, may tubi. Puydi eon baea ako nga bawtismuhan?”

³⁷ [Nagsabat si Felipe, “Kon nagatuo ka it hugot sa imong tagipusuon, puydi ka mabawtismuhan.” Nagsabat ro opisyal, “Nagatuo ako nga si Jesu-Kristo hay Unga it Dyos.”]

³⁸ Ginpapundo ku opisyal ro anang karwahe. Nagpanaog sanda ag nageusob sa tubi ag ginbawtismuhan dayon imaw ni Felipe.

³⁹ Pagkatakas nanda hay gulpi eang nga naduea si Felipe ay ginbuoe imaw it Espirito it Ginuong Dyos. Owa eon imaw hakita it opisyal pero nagpadayon imaw sa anang pagpamanawon nga nalipay it duro.

⁴⁰ Nakapan-o si Felipe nga idto eo't-a gali imaw nakaabot sa banwa it Azotus. Nagwali imaw ku Mayad nga Balita sa tanan nga banwa nga anang maagyan hasta nga nakaabot imaw sa Cesarea.