Mga Binuhatan 17 - Inkeanon

Nagkagulo ro mga Judio sa Tesalonica Pagkabati Nanda Ku Mensahi it Ginuo

¹ Sa pagpamanawon nanday Pablo ag Silas, nakaagi sanda sa Amfipolis ag Apolonia hasta nakaabot sanda sa Tesalonica kon siin may idto nga sinagoga it mga Judio.

² Ngani nag-adto idto si Pablo agod makig-istorya sa mga Judio pareho ku ana perming ginaobra sa kada lugar nga maagyan nanda nga may sinagoga. Idto imaw it tatlong ka pasunod nga Adlaw it Inogpahuway. Anang ginbase sa Sagrado nga Kasueatan

³ ro anang pagpaathag ag pagpamatuod nga dapat mag-antos, mamatay ag mabanhaw ro Maneueuwas nga ginpromisa it Dyos. Naghambae pa gid si Pablo, “Si Jesus ngara nga ginahinambae ko kinyo hay imaw gid ro Maneueuwas ngaron.”

⁴ Ro iba kanda hay nakumbinsi ag nag-iba kanday Pablo ag Silas, pati man ro kaabo-abo nga mga bukon it Judio nga nagaiba sa mga Judio sa pagsimba ag ro kaabo man nga mga ginakilaea sa sosyudad nga mga bayi.

⁵ Pero nahisa ro indi magtuo nga mga Judio ngani nagtipon sanda it kaabo nga mga istambay nga mga hurong ag andang ginpanggulo ro syudad. Anda man nga ginsukob ro baeay ni Jason ag gin-inusoy sanday Pablo ag Silas agod anda kunta nga ipaatubang sa andang konseho.

⁶ Tag owa nanda hakita idto sanday Pablo, gin-guyod nanda si Jason kaibahan ro pilang ka tumueuo, ag gindaea sa atubang it mga opisyales it syudad. Hambae nanda, “Ro mga tawo nga nagapanggulo sa tanan nga lugar hay iya eon sa atong syudad

⁷ ag ginpadayon sanda ni Jason sa anang baeay. Sanda tanan hay nagaeapas sa mga kasuguan ku Emperador ay sinanda hay may sambilog pa gid kuno nga hari nga si Jesus ro ngaean.”

⁸ Pagkabati kara ku mga tawo ag ku mga opisyales hay nagkaeagulo sanda.

⁹ Ginpabayad dayon ku mga opisyales si Jason ag ro anang mga kaibahan it piyansa bago ginbuhian.

Ro mga Judio sa Berea hay Mas Interisado sa Wali ni Pablo

¹⁰ Pagkagabii, ginpapanaw eagi ku mga tumueuo sanday Pablo ag Silas paBerea. Pag-abot idto hay nag-adto sanda sa sinagoga it mga Judio.

¹¹ Ro mga tawo idto hay mas bukas ro andang paino-ino kaysa sa mga tagaTesalonica. Naila gid sanda it duro nga magpamati sa mensahi ag adlaw-adlaw hay ginausisa nanda ro Sagrado nga Kasueatan kon matuod gid ro ginahambae ni Pablo.

¹² Ngani abo kanda nga mga Judio ro nagtuo. Abo man nga mga bukon it Judio ro nagtuo nga mga eaki ag mga bayi nga mga haeangdon.

¹³ Pero pagkasayod ku mga Judio nga indi magtuo sa Tesalonica nga nagwali man si Pablo ku mensahi it Dyos idto sa Berea hay nag-adto man sanda idto. Anda man nga ginsuesuean ro mga tagaBerea agod nga manggulo man.

¹⁴ Ngani ginpahatod eagi ku mga tumueuo si Pablo paadto sa dagat pero sanday Silas ag Timoteo hay inaywanan nana sa Berea.

¹⁵ Ginhatod si Pablo ku mga nag-iba kana hasta idto sa Atenas ag nagbalik dayon sanda sa Berea. Bago sanda naghalin hay ginbilinan sanda ni Pablo nga padali-dalion sanday Silas ag Timoteo sa pag-apas idto kana.

Nagturo si Pablo sa Atenas Parti sa Matuod nga Dyos

¹⁶ Tag nagahueat si Pablo kanday Silas ag Timoteo sa Atenas hay nagaeain gid ro anang buot magpuepamantaw nga puno gid-a it ribulto it mga diyos-diyos ro syudad.

¹⁷ Ngani idto imaw sa sinagoga nagapakig-istorya sa mga Judio ag sa mga bukon it Judio nga nagaiba sa mga Judio sa pagsimba sa Dyos. Adlaw-adlaw, nagaadto man imaw sa lugar sa syudad nga abo perming tawo ag nagapakig-istorya sa mga tawo nga hinamaan nga idto.

¹⁸ Ro iba kanda hay mga mangin-aeamon nga Epicureo ag Estoico kon tawgon. Hambae ku iba kanda, “Ano ro ginawinakae ku hanginon ngara?” Hambae man ku iba, “Matsa parti sa mga bag-o nga diyos nga owa pa naton habatii ro ana ngaron nga ginaturo.” Ruyon sinanda ay nagaturo abi si Pablo parti kay Jesus ag sa pagkabanhaw.

¹⁹ Ngani anda nga gindaea si Pablo sa tilipunan ku konseho it syudad nga Areopagus kon tawgon. Hambae nanda kay Pablo, “Gusto kunta namon masayran kon ano ro bag-o ngarang ginaturo nga imong ginahinambae.

²⁰ Eain gid-a kamon ro iba nimong mga ginahinambae ngaron, ag gusto namon nga masayran kon ano karon ro kahueugan.”

²¹ (Owa abi it ibang ginaobra ro mga tagaAtenas ag ro iba nga idto nagaistar kundi mag-inistorya ag magpinamati kon ano ro bag-o.)

²² Ngani nagtindog si Pablo sa atubang it konseho ag naghambae, “Mga tagaAtenas, napan-uhan ko nga mga relihiyoso gid-a kamo.

²³ Nakahambae ako kara dahil sa akong paglibot-libot hay akon nga ginatuetan-aw ro inyong mga ginasimba. May hakita ako nga altar nga ro nakasinsil hay ‘Para Sa Owa Makilaea nga Dyos’. Ngani ro akon nga ihambae kinyo makaron hay parti sa inyong ginasimba ngara nga owa ninyo makilaea.

²⁴ Imaw ra ro Dyos nga nagtuga ku kalibutan ag ku tanan nga iya sa kalibutan, ag imaw ro Ginuo nga nagabuot sa eangit ag eugta. Owa imaw nagaistar sa mga templo nga tawo malang ro nag-obra.

²⁵ Owa man imaw gakinahangean it bulig halin sa mga tawo ay owa imaw gakinahangean it bisan ano. Imaw ro Dyos nga nagatao sa tanan nga tawo it kabuhi ag ginhawa, ag ku tanan nga iba pa nandang kinahangeanon.

²⁶ Halin sa sangka tawo eang hay ana nga gintuga ro tanan nga rasa it tawo nga nagailistar sa bilog nga kalibutan. Ginplano na kato eagi kon man-o it eawig ro pagkabuhi it kada rasa sa kalibutan, ag kon hasta siin ro dueunan ku andang nasyon.

²⁷ Ginhimo ra it Dyos agod magtinguha sanda nga hikilaea imaw, bisan nga ro andang pag-usoy kana hay matsa bulag nga nagahulikap. Ag basi eon lang hikilaea nanda imaw ay sa minatuod, ro Dyos hay bukon it maeayo sa kada isaea katon.

²⁸ Pareho ku haeambaeon nga, ‘Imaw ro ginahalinan ku atong kabuhi ag imaw ro nagatao it kusog sa atong pagpangabuhi, ag dahil man kana hay iya kita sa ibabaw it kalibutan.’ Pareho man ku hambae it sambilog sa inyong mga manogpamalaybay, ‘Ana kita nga mga unga.’

²⁹ “Ag dahil mga unga kita it Dyos, indi kita dapat mag-isip nga ro Dyos hay kapareho it ribulto nga bueawan o pilak, o bato nga gin-imbento it isip ag gin-obra it tawo.

³⁰ Kato nga owa pa kasayod ro mga tawo parti sa Dyos hay owa nana pag-inatuha nga owa sanda kakilaea kana. Pero makaron hay ana nga ginasugo ro tanan nga mga tawo sa tanan nga lugar nga maghinuesoe ag magtalikod sa andang mga saea,

³¹ tungod may gintaeana eon eagi imaw nga adlaw, nga anang hukman it matarong ro mga tawo sa bilog nga kalibutan. May ginbutang eon eagi imaw nga sangka tawo nga magaobra karon. Ginpamatud-an it Dyos sa tanan, nga rayang tawo gid ro anang ginbutang, paagi sa pagbanhaw kana.”

³² Paghambae ni Pablo parti sa pagkabanhaw hay ginhibaygan imaw ku iba. Ro iba ma't-a hay naghambae, “Gusto namon nga mamati kimo it uman parti kara.”

³³ Dikato natapos ro pagdiskurso ni Pablo sa andang atubang ag inaywanan nana sanda.

³⁴ Pero may mga nag-iniba ma't-a kay Pablo ag nagtuo sa Dyos. Kaibahan eon kato si Dionisius nga myembro it konseho it Atenas, ag ro bayi nga si Damaris ro ngaean ag ro iba pa gid.