Mga Binuhatan 14 - Inkeanon

Nagwali sanday Pablo sa Iconium

¹ Pag-abot nanday Pablo ag Barnabas sa Iconium hay nag-adto sanda sa sinagoga it mga Judio ag nagturo pareho man ku gin-obra nanda idto sa Antioc. Mayad gid ro andang paghambae ngani kaabo-abo gid ro nagtuo nga mga Judio ag mga bukon it Judio.

² Pero ginsuesuean ku mga indi magtuo nga Judio ro mga owa gatuo nga bukon it Judio ag ginhiluan ro andang paino-ino kuntra sa mga tumueuo ngato.

³ Ngani nagpabilin anay idto it mabuhay-buhay sanday Pablo ag owa it hadlok nga nagwali parti sa Ginuo. Ginpakita it Ginuo nga matuod ro andang mensahi parti sa anang sobrang kabuot paagi sa pagtao kanda it gahom nga maghimo it mga makangawa-ngawa ag milagroso nga pamatuod.

⁴ Bisan makarato ro natabo, ro mga tawo sa syudad hay naggrupo-grupo. Ro iba hay apin sa mga Judio nga indi magtuo ag ro iba ma't-a hay apin sa mga apostoles.

⁵ Ku ulihi, nagkaeasugot ro mga Judio ngato ag ro andang mga pinuno, pati ro mga bukon it Judio nga owa nagtuo, nga sakiton ro mga apostoles ag batuhon hasta mamatay.

⁶ Pagkasayod kara ku mga apostoles hay pumaeagiw sanda sa mga syudad it Listra ag Derbe sa probinsya it Licaonya ag sa palibot nga mga lugar.

⁷ Nagwinali sanda idto ku Mayad nga Balita.

Sanday Pablo hay Ginsimba ag Ginhingabot Man Dayon sa Listra

⁸ Idto sa Listra hay may tawo nga eupog halin ku anang pagkatawo. Indi imaw katindog o katikang ngani nagaliningkod lang imaw.

⁹ Nagapamati imaw sa ginahambae ni Pablo. Gintueok imaw ni Pablo ag hakita nana nga nagapati ro tawo ngato nga mapamayad imaw.

¹⁰ Ngani ginhambae imaw it mabaskog ni Pablo, “Tindog!” Matsa pumisik ro tawo ngato halin sa anang ginalingkuran ag nagtinikang paadto-pabalik.

¹¹ Pagkakita ku kaabo nga tawo nga idto ku ginhimo ni Pablo hay nagsininggit sanda sa anda mismong linggwahe sa Licaonya. Hambae nanda, “Mga diyos ro daywa ngara nga nagpakatawo ag nagpanaog iya katon!”

¹² Gintinawag nanda si Barnabas nga Zeus ag si Pablo hay Hermes ay imaw ro manoghambae.

¹³ Ro templo nga andang ginasimbahan kay Zeus hay idto man lang sa guwa it syudad. Ngani ro saserdote sa ratong templo hay nagdaea it mga toro nga baka nga ginkulintasan it bueak sa pwertahan it syudad ay gusto kunta nana nga pangunahan ro mga tawo sa pagpatay ku mga turo ngato ag ihaead sa mga apostoles.

¹⁴ Pagkaeubot nanday Barnabas ag Pablo ku tuyo ku mga tawo ngato hay gin-gisi nanda ro andang eambong sa pagpakita nga nangidlisan sanda sa ginaobra ngato ku mga tawo. Pagkatapos, dumaeagan sanda sa tunga it mga tawo ag nagsinggit,

¹⁵ “Ano't-a ro inyong ginaobra ngara? Mga tawo man kami pareho kinyo. Iya kami sa pagsugid kinyo ku Mayad nga Balita agod talikdan eon ninyo ro pagsimba sa mga bagay nga owa it pueos, ag magsimba eon kamo sa buhi nga Dyos nga nagtuga ku eangit, eugta, dagat ag ku tanan nga una nga nagakabuhi.

¹⁶ Kato anay, ginpabay-an it Dyos nga obrahon ninyo tanan nga mga bukon it Judio ro inyong eaom nga husto nga obrahon.

¹⁷ Pero may ginahimo imaw permi nga nagapamatuod nga una imaw ag mayad imaw. Ginataw-an nana kamo it uean halin sa eangit, ag tig-aeani sa tama nga oras para sa inyong kabueusgan ag kalipayan.”

¹⁸ Pero bisan makarato eon ro andang ginhambae hay binudlayan gihapon sanda bago nanda mapugngan ro mga tawo sa paghaead ku andang mga toro kanda.

¹⁹ Pagkataliwan it pilang adlaw hay may mga Judio nga halin sa Antioc ag Iconium nga nag-abot idto. Anda nga ginsuesuean ro mga tagaidto ngani anda karang gineapog it bato si Pablo ag gin-guyod paguwa sa syudad ag inaywanan ay eaom nanda hay patay eon imaw.

²⁰ Pero tag ginpalibutan imaw ku mga sumueunod hay nagbangon imaw ag nagsueod it uman sa syudad. Pagkamasunod nga adlaw hay nag-adto imaw sa syudad it Derbe kaibahan si Barnabas.

Ginbalikan Nanday Pablo ro mga Lugar nga Andang Ginwalihan ag Ginpabaskog ro Buot ku mga Tumueuo Idto

²¹ Nagwali sanday Pablo ag Barnabas sa Derbe it Mayad nga Balita ag abo ro andang hakumbinsi idto nga mangin sumueunod ni Jesus. Nagbalik dayon sanda sa Listra, sa Iconium ag sa Antioc nga maeapit sa Pisidia.

²² Sa mga lugar ngato hay anda nga ginpabaskog ro buot ku mga sumueunod ag gineaygayan nga magpadayon sa andang pagtuo bisan ano ro matabo. Hambae nanda, “Dapat nga magaagi kita it abo nga kalisod bago kita makaabot sa eangit bilang mga sinakpan it Dyos.”

²³ Ro mga tumueuo sa kada lugar ngato hay ginbutangan nanday Pablo it mga magadumaea kanda. Nagpuasa dayon sanda ag pagkatapos hay ginpangamuyuan ag gintugyan ro mga tumueuo ngato sa Ginuo nga andang ginatuuhan.

²⁴ Pagkatapos hay nagpadayon sanday Pablo sa andang pagpamanawon ag nag-agi sanda it uman sa mga probinsya it Pisidia ag Pamfilia.

²⁵ Tag idto sanda sa Pamfilia hay nagwali sanda ku mensahi it Dyos sa Perga. Tapos, nagdiritso sanda sa Atalia.

²⁶ Halin sa Atalia hay nagsakay sanda sa barko pabalik sa Antioc sa Syria. Idto sanda kato anay gintugyan sa Dyos agod tatapon ag buligan sanda sa oeobrahon nga sa makaron hay anda eon ngani nga natapos.

²⁷ Pag-abot idto, gintilipon nanda ro mga grupo it mga tumueuo ag andang ginsugiran ku tanan nga ginhimo it Dyos paagi kanda ag kon paalin nana ginbuksan ro daean para sa mga bukon it Judio agod magtuo man sanda kay Jesus.

²⁸ Idto dayon sanda nagbuhay kaibahan ku mga sumueunod.