Mga Binuhatan 12 - Inkeanon

Ginhingabot ni Haring Herodes ro mga Tumueuo sa Jerusalem

¹ Ku rato man nga tyempo hay ginpapadakop ni Haring Herodes ro iba sa mga tumueuo sa Jerusalem agod halitan.

² Anang ginpapugutan it ueo si Santiago nga igmanghod ni Juan.

³ Pagkasayod nana nga nalipay ro mga Judio sa ana ngatong ginhimo, ana pa gid nga ginpadakop si Pedro. Ginhimo ra nana tag Pagtililipon sa Pagdumdum ku Pagkaon it Tinapay nga Owa't Pangpaalsa.

⁴ Pagkadakop kay Pedro hay ginpapriso dayon imaw ni Herodes ag ginpabueos-bueosan it bantay sa ap-at nga ka grupo it soldado nga may tig ap-at man nga soldado sa kada grupo. Ro plano ni Herodes hay ana nga sintinsyahan si Pedro it kamatayon sa atubang it mga tawo pagkatapos it Pagtililipon.

⁵ Pero samtang idto si Pedro sa prisuhan hay ginpinangamuyuan gid imaw sa Dyos ku mga tumueuo.

Si Pedro hay Ginpaguwa it Sangka Anghel sa Prisuhan

⁶ Ku gabii nga bago ro adlaw nga paguwaon imaw ni Herodes agod sintinsyahan, si Pedro hay nagakatueog nga nakakadena sa soldado nga una sa anang mansigka kilid. Ag may idto man nga mga gwardya sa pwertahan.

⁷ Gulpi eang nga may anghel it Ginuo nga nag-abot ag naghayag ro sueod it prisuhan. Ana dayon nga ginsampok si Pedro sa kilid agod pukawon. Hambae nana, “Bangon eon! Dali!” Gulpi eang nga nahukas ro kadena sa mga alima ni Pedro.

⁸ Ginhambae imaw it anghel, “Kaadyana ring mahaba ngaron nga eambong agod maeumo ka magtikang ag suksukan ro imong sandalyas.” Nagtuman si Pedro. Naghambae pa gid ro anghel, “Suksukan ro imong pangsanib ag magsunod ka kakon.”

⁹ Nagsunod kana si Pedro paguwa sa prisuhan pero owa imaw kasayod nga matuod gali ro nagakaeanabo. Eaom nana hay panan-awon eang rato.

¹⁰ Haagyan nanda ro primero ag ro pangaywa nga gwardya ag nakaabot eon dayon sanda sa saesaeon nga pwertahan paguwa sa prisuhan. Nagbukas eang rato nga owa man it nagbukas ag nagguwa dayon sanda. Pag-abot nanda sa masunod nga kanto hay naduea it gulpi ro anghel.

¹¹ Nakamaeasmas dayon si Pedro. Hambae nana sa anang kaugalingon, “Sigurado ko eon gid nga ginpaadto it Ginuo ro anang anghel agod euwason ako sa alima ni Herodes, ag agod indi matabo ro ginapaabot it mga Judio nga matabo kakon.”

¹² Tag haeubtan eon nana ro natabo, nag-adto imaw sa baeay ni Maria nga nanay ni Juan nga ginatawag man nga Marcos. Idto nagatilipon ro mga tumueuo ag nagapangamuyo para kana.

¹³ Pagpanuktok ni Pedro sa pwertahan it pader, nag-adto sa pwertahan ro kabulig nga si Roda ro ngaean agod tan-awon kon sin-o ro nagapanuktok.

¹⁴ Hakilan-an 't-a eagi nana ro limog ni Pedro. Pero sa anang kalipay hay owa't-a nana pagbuksi ro pwertahan kundi dumaeagan 't-a imaw pabalik sa sueod ag ginsugid sa iba nga idto si Pedro sa guwa.

¹⁵ Ginhambae imaw nanda, “Gapinaumang ka't-ing!” Pero nagpinilit imaw nga si Pedro gid rato. Sinanda eon man kana, “Basi kon ana't-a ron nga anghel.”

¹⁶ Nagpinanuktok pa gid si Pedro ngani anda nga ginbuksan ro pwertahan. Pagkakita nanda kana hay hangawa gid sanda.

¹⁷ Ginsinyasan sanda ni Pedro nga maghipos. Pagkatapos, ginsugid nana kon paalin imaw ginpaguwa it Ginuo sa prisuhan. Ana dayon sanda nga ginbilinan, “Sugiri ninyo kara si Santiago ag ro mga kaigmanghuran naton sa pagtuo.” Nagpanaw dayon imaw sa ibang lugar.

¹⁸ Pagkaagahon, grabi ro kagubot ku mga gwardya ay owa gid sanda kasayod kon ano ro natabo kay Pedro.

¹⁹ Nagmando dayon si Herodes nga usuyon gid si Pedro pero owa gid nanda imaw hakita. Ginpaimbistigar ni Herodes ro mga gwardya ag ana dayon nga ginpabitay. Pagkatapos, naghalin si Herodes sa Judea ag idto anay imaw nag-istar sa Cesarea.

Ginpinahan it Dyos si Herodes it Makangingidlis nga Kamatayon

²⁰ Ku ratong tyempo hay naakig it duro si Herodes sa mga tagasyudad it Tiro ag Sidon. Ngani nagkaeasugot sanda nga makigkita kay Herodes agod makig-ariglo kana, tungod ro kaeabanan it pagkaon nga kinahangean it andang mga syudad hay halin sa mga lugar nga ginadumaeahan ni Herodes. Pag-abot nanda sa palasyo hay anda anay nga gin-amigo si Blastus nga mayordomo ni Herodes ag nagpabulig kana agod makaatubang sanda kay Herodes.

²¹ Pag-abot ku adlaw nga gintaeana ni Herodes nga mag-atubang sanda kana, anang ginsuksuk ro anang harianon nga eambong ag pumungko sa anang lingkuran kon imaw hay gahusgar. Tag nagadiskurso imaw,

²² nagsilinggit ro mga tawo, “Bukon 't-a it tawo ro nagahambae ngara katon kundi isaea sa mga diyos!”

²³ Ku rato mismo nga oras hay gintaw-an it baeatian si Herodes ku anghel it Dyos, ay ana nga ginbaton ro anda ngatong pagdayaw imbis nga hambaeon na sanda nga ro Dyos eang dapat ro andang dayawon, bukon it tawo. Gin-ueod imaw hasta nga namatay.

²⁴ Sa pihak ku mga paghingabot ngato hay mas nageapnaag pa gid ro mensahi it Dyos ag nag-inabo pa gid ro mga tumueuo.

²⁵ Sanday Barnabas ag Saulo ma't-a, kat natapos eon nanda ro andang panaw sa Jerusalem hay nagbalik sa Antioc, daea si Juan nga ginatawag man nga Marcos.