Mga Binuhatan 11 - Inkeanon

Ginsaysay ni Pedro kon Paalin Nagtuo kay Jesus ro mga tagaCesarea nga Bukon it Judio

¹ Ku ulihi, nakabalita ro mga apostoles ag ro ibang mga tumueuo sa bilog nga Judea nga may mga bukon it Judio man nga nagpati eon sa mensahi it Dyos.

² Pero pagbalik ni Pedro sa Jerusalem hay ginbuslahan imaw ku mga tumueuo nga Judio nga nagapati nga dapat gihapon tumanon ro Kasuguan it mga Judio.

³ Hambae nanda kay Pedro, “Nag-adto ka gali sa baeay it bukon it Judio ag nagsaeo ka pa kanda sa pagkaon!”

⁴ Ginsaysay dayon kanda ni Pedro kon ano ro natabo, halin sa puno.

⁵ Hambae ni Pedro, “Tag idto ako sa banwa it Joppa nga nagapangamuyo hay may ginpakita kakon nga sangka paeanan-awon. Nakakita ako it matsa maeapad nga tela nga may higot sa ap-at nga pamusod kato nga gintuntun halin sa eangit. Nagpundo rato sa atubang nakon.

⁶ Gintan-aw ko rato it mayad ag hakita ko nga may sueod rato nga mga sari-saring klasi it sapat, mga nagatikang, mga nagakamang ag mga ilahas nga sapat ag pispis.

⁷ Nakabati man ako it naghambae kakon nga Pedro, tindog mana ag pagpatay it bisan ano karon ag magkaon.

⁸ Pero nagsabat ako nga indi makon ako, Ginuo. Owa pa gid abi makon ako nakasamit it mahigko ag ginabawae kamon nga mga Judio.

⁹ Naghambae it uman rondatong limog halin sa eangit. Hambae nana, ‘Ayaw pagbilanga nga mahigko ro ginlimpyuhan eon it Dyos.’

¹⁰ Nauman pa it daywang beses ro amon ngarang istorya nga imaw manlang gihapon. Pagkatapos hay ginbatak pabalik sa eangit ro tanan ngatong gintuntun.

¹¹ Ku rato mismo nga oras hay may tatlong ka tawo nga halin sa banwa it Cesarea nga nag-abot sa baeay nga akon nga ginadayunan. Ginpaadto sanda idto agod sueangon ako.

¹² Ginhambae ako it Espirito Santo nga indi ako magbalibad kundi magmunot ako kanda, bisan bukon sanda it Judio. Ngani nagmunot ako kanda sa baeay ku nagpasueang kakon, kaibahan ro an-om ngara natong ka igmanghod halin sa Joppa.

¹³ Ginsugiran nana kami nga may nagpakita kana nga anghel idto sa anang baeay ag ginhambae imaw nga magpaadto ka mana it tawo sa Joppa ag ipasueang si Simon nga ginatawag man nga Pedro.

¹⁴ Ihambae mana nana kimo kon paalin ka maeuwas ag ro imong bilog nga panimaeay.

¹⁵ Bag-o pa eang ako kato nga nakaumpisa it paghambae hay nagkunsad eo't-a kanda ro Espirito Santo, pareho man kato katon.

¹⁶ Ag hadumduman ko dayon ro ginhambae it Ginuo, ‘Nagbawtismo si Juan it tubi pero kamo't-a hay ro Espirito Santo't-a ro ibawtismo kinyo.’

¹⁷ Kon ginregaluhan sanda it Dyos it Espirito Santo pareho katon kat nagtuo kita kay Ginuong Jesu-Kristo, sin-o gid abi ako nga magpugong sa Dyos?”

¹⁸ Owa kasabat ratong mga nagbusla kay Pedro pagkabati nanda kara. Gindayaw dayon nanda ro Dyos ag sinanda, “Gintaw-an ma't-a gali ku Dyos it kahigayunan ro mga bukon it Judio agod maghinuesoe ag magtalikod sa andang mga saea agod makabaton it kabuhi nga owa it katapusan.”

Abo nga mga Bukon it Judio ro Nagtuo kay Jesus Idto sa Antioc

¹⁹ Rondatong mga tumueuo sa Jerusalem nga ginhingabot halin ku pagkapatay kay Esteban hay nagtaeapeaag sa mga maeayo nga lugar. May haadto kanda sa Fenicia, sa isla it Cyprus ag sa syudad it Antioc sa probinsya it Syria. Ginwali nanda ro mensahi it Dyos bisan siin sanda haadto, ugaling hay sa mga Judio eang.

²⁰ Pero sa mga nag-adto ngato sa Antioc hay may iba nga tagaCyprus ag tagaCyrene. Pag-abot nanda sa Antioc hay nagwinali sanda ku Mayad nga Balita parti kay Ginuong Jesus. Pero ro andang ginwinalihan hay pati man ro mga bukon it Judio.

²¹ Una gid kanda ro pagbulig it Dyos sa pagwali nanda ngani kaabo-abo nga mga bukon it Judio ro nagtuo ag nagsalig sa Ginuo.

²² Habalitaan ra ku mga tumueuo sa Jerusalem ngani ginpaadto nanda si Barnabas sa Antioc.

²³ Pag-abot idto ni Barnabas hay nalipay gid-a imaw ay hakita nana nga ginpakamaayo gid sanda it Dyos. Ana dayon nga ginpabaskog ro andang buot nga magpadayon sa andang pagtuo sa Ginuo it hantop sa andang tagipusuon.

²⁴ Mayad nga tawo si Barnabas ag ginagamhan imaw permi it Espirito Santo ag hugot ro anang pagtuo sa Dyos ngani abo pa gid ro nagtuo sa Ginuo idto.

²⁵ Tapos, nag-adto si Barnabas sa Tarsus agod usuyon si Saulo.

²⁶ Pagkakita nana kay Saulo hay gindaea ra nana sa Antioc. Sang dag-on gid sanda nga nag-iba sa mga sumueunod idto sa andang mga pagtililipon agod magsimba ag kaabo-abo ro andang ginpangtud-an. Idto sa Antioc primero nga gintawag nga Kristyano ro mga sumueunod.

²⁷ Ku rato man nga tyempo, may mga propeta halin sa Jerusalem nga nag-abot sa Antioc.

²⁸ Sambilog kanda hay si Agabus. Paagi sa paggiya it Espirito Santo hay naghambae imaw nga may grabi nga tiggueutom nga maabot sa tanan nga nasyon nga sakop it Roma. (Natabo matuod rato ku tyempo nga si Claudius ro Emperador it Roma.)

²⁹ Ngani ro mga sumueunod idto sa Antioc hay nagdesidir nga ro kada isaea kanda hay magtao ku anang masarangan nga ikabulig sa mga kaigmanghuran nga idto nagaistar sa Judea.

³⁰ Gin-obra nanda ra ag andang ginpadaea ro andang bulig sa mga manogdumaea it mga tumueuo sa Judea paagi kanday Barnabas ag Saulo.