Mateo 8 - Inkeanon

Ginpamayad ni Jesus ro Isaeang ka Aruon

¹ Pagkapanaog ni Jesus sa manaba nga bukid ngato nga kon siin imaw nagturo sa mga tawo, kaabo nga mga tawo ro nagsunod kana.

² May aruon nga nagpaeapit kay Jesus ag naghapa sa anang atubang ag nagpakitluoy kana. Hambae ku aruon, “Ginuo, kasayod ako nga mapamayad mo ako kon gusto mo.”

³ Ginbuytan imaw ni Jesus ag ginhambae, “Gusto ko nga pamayron ka. Mayad ka eon!” Naduea eagi ro aro sa eawas ku rondato nga tawo.

⁴ Ginhambae imaw ni Jesus, “Ayaw gid magsugid kara bisan kanyo pero umadto ka dayon sa saserdote ag magpatan-aw. Maghaead ka dayon sa Dyos it mga haead sa pagtuman sa kasuguan nga ginsueat ni Moises, bilang pamatuod sa mga tawo nga mayad ka eon.”

Ginpamayad ni Jesus ro Sueuguon it Kapitan ku Soldado it Roma

⁵ Pag-abot ni Jesus sa Capernaum, may isaeang ka kapitan it soldado it Roma nga nagsueang-sueang kana ag nagpangabay.

⁶ Sinana, “Ginuo, ro akong sueuguon hay nagamasakit idto sa baeay ag grabi ro anang paeaea. Indi eon imaw kabangon ay paralisado ro anang eawas.”

⁷ Nagsabat si Jesus, “Sige, adtunan ko imaw ag pamayron.”

⁸ Pero nagsabat ro kapitan, “Ginuo, ayaw eon mag-adto sa amon ay bukon ako it bagay nga magbaton kimo sa akong baeay. Hambaean eang nga mayad eon imaw ag gamayad gid ro akong sueuguon.

⁹ Anad eo't-ang abi sa sugo dahil ako hay gasunod man sa mas mataas pa kakon it rangko, ag may mga soldado man ako nga ginapamunuan. Kon suguon ko ro sambilog nga magpanaw, gapanaw dayon imaw. Kon paadtunon ko kakon ro sambilog, gaadto dayon imaw. Kon may ipaobra ako sa akong sueuguon hay ginaobra nana dayon.”

¹⁰ Pagkabati kara ni Jesus hay hangawa gid imaw it duro. Naghambae dayon imaw sa mga tawo nga nagasunod kana, “Matuod dang ginahambae kinyo nga owa pa ako it hakita bisan sa mga inapo ni Israel nga makaraya it bahoe ro anang pagsalig kakon.

¹¹ Ginahambae ko eagi kinyo nga sa ulihi hay kaabo-abo nga tawo nga naghalin sa sari-sari nga lugar sa bilog nga kalibutan ro igatapoe sa mga sinakpan it Dyos nga anang ginaharian, ag magasaeo sanda permi kanday Abraham, Isaac, ag Jacob sa pagkaon.

¹² Pero ro mga inapo ni Israel nga dapat kunta nga matapoe sa mga sinakpan it Dyos, ro kaabo-abo kanda hay ihaboy sa kadueom-dueom nga lugar kon siin sanda mag-inueahab ag magpinagot.”

¹³ Ginhambae dayon ni Jesus ro kapitan, “Uli eon. Nagapati ka gid nga magamayad ro imong sueuguon kon hambaeon ko eang nga mayad eon imaw, ngani makaruyon gid ro matabo.” Ag paghambae eang karon ni Jesus hay nagmayad eagi ro sueuguon ku kapitan.

Abo ro Ginpamayad ni Jesus

¹⁴ Nag-adto dayon si Jesus sa baeay nanday Pedro. Haabutan nana idto ro ay Pedro nga panugangan nga bayi nga nagaeubog ay ginaeagnat.

¹⁵ Pinaeapitan imaw ni Jesus ag ginbuytan sa alima, ag naduea eagi ro anang eagnat. Nagbangon dayon ro magueang ag ginserbihan sanda.

¹⁶ Pagkatunod it adlaw, abo nga mga tawo ro nagdaea kay Jesus it mga ginsudlan it demonyo. Sa anang hambae eang hay ginsuboe ni Jesus ro mga maeain nga espirito sa mga tawo ngato, ag ana man nga ginpamayad ro tanan nga mga nagabaeatian.

¹⁷ Ro ana ngatong mga gin-obra hay katumanan ku ginsueat ni Propeta Isaias nga makaraya, “Ginpas-an nana ro mga kaeuyahon ku atong mga eawas ag ginpamayad ro atong mga masakit.”

Ro mga Dapat Isakripisyo ku Gustong Mangin Matuod nga Sumueunod ni Jesus

¹⁸ Pagkakita ni Jesus ku kaabo nga mga tawo nga nagtueumpok kana hay anang ginhambae ro anang mga sumueunod nga matabok sanda sa dagat.

¹⁹ Bago sanda nagpanaw hay may maestro it Kasuguan nga nagpaeapit kay Jesus ag naghambae, “Maestro, mamunot ako kimo bisan siin ka mag-adto bilang isaea sa imong mga sumueunod.”

²⁰ Nagsabat si Jesus, “Ro mga sapat sa taeon hay may buho nga ginaulian. Ro mga pispis hay may pugad, pero ako nga *Unga it Tawo hay owa gid it bisan maeugban.”

²¹ Tapos, may isaea sa mga nagasunod-sunod kana nga naghambae, “Ginuo, gusto ko nga mangin sumueunod nimo, pero mauli anay kunta ako ag ipaeubong ro akong ama.”

²² Nagsabat si Jesus, “Sunod eon kakon ag pabay-i't-a ro mga patay sa panueok it Dyos nga mageubong ku andang patay.”

Ginpapundo ni Jesus ro Hangin ag Ginpakalma ro Dagat

²³ Pagkatapos hay nagsakay si Jesus sa baroto. Nagsakay man dayon ro anang mga sumueunod ag pumanaw sanda.

²⁴ Tag nagapanakayon eon sanda, gulpi eang nga nagbaskog ro hangin ag nageagko ro humbak ag nagsinueod ro tubi sa andang baroto, ag madali lang sanda maeunod. Pero si Jesus ma't-a hay gakinatueog.

²⁵ Ginpukaw dayon imaw ku anang mga sumueunod. Hambae nanda kana, “Ginuo, tabang! Mamatay 't-a kita kara!”

²⁶ Naghambae dayon si Jesus kanda, “Ham-an it nahadlok kamo? Kueang 't-a gihapon ro inyong pagtuo kakon.” Bumangon dayon imaw, ginsugo nga magpundo ro hangin ag magkalma ro humbak, ag insigida hay nangin kalmado nga mayad ro dagat.

²⁷ Hangawa sanda ag sinanda, “Anong tawuha ra? Bisan ro hangin ag dagat hay nagatuman 't-a kana!”

Ginpamayad ni Jesus ro Daywang Ka Tawo nga Ginsudlan it Kaabo-abo nga Demonyo

²⁸ Pagkadungka nanday Jesus sa tabok, sa lugar it Gadara hay may nagsueang-sueang kanda nga daywang ka tawo nga ginsudlan it mga demonyo. Ro daywa ngato hay idto naghalin sa mga eungib nga ginaeubngan it mga patay. Mabangis gid sanda, ngani owa it makaagi rikato dapit.

²⁹ Pagkakita nanda kay Jesus hay nagsiyagit sanda nga daywa, “Ayaw kami pag-intrahi, Unga it Dyos. Imo eo't-a baea kami nga pasakitan bisan owa pa ro oras?”

³⁰ Idto sa maeayo-eayo hay may sangka panong it kaabo-abo nga baboy nga nagainukib.

³¹ Naghinyo gid kay Jesus ro mga demonyo nga una sa daywang ka tawo ngato. Hambae nanda, “Kon imo kami nga paguwaon sa mga eawas ngara, idto lang kami paadtuna sa mga baboy.”

³² Naghambae si Jesus, “Adto kamo idto.” Nagguwa dayon sanda sa daywang ka tawo ngato ag nagsueod sa mga baboy. Tapos, nagdaeaeagan dayon tanan ro mga baboy papanaog sa bukid hasta nagkaeahueog sa banglid ag tumugpa sa dagat ag nagkaeaeumos.

³³ Pagkakita ku mga nagabantay it mga baboy ngato sa natabo hay nagdaeaeagan sanda sa banwa, ag ginsinugid sa mga tawo ro tanan nga natabo ag kon haalin ro mga tawo ngato nga ginsudlan it mga demonyo.

³⁴ Ngani nag-adto ro tanan nga pumueuyo kay Jesus agod makighambae kana. Pag-abot idto kana, anda gid imaw nga ginhinyo nga maghalin sa andang lugar.