Mateo 4 - Inkeanon

Gintinentar ni Satanas si Jesus

¹ Pagkabawtismo kay Jesus hay gin-giyahan imaw it Espirito Santo nga mag-adto sa *disyerto agod tentaron ni Satanas.

² Nagpuasa idto si Jesus it kwarenta diyas ngani gin-gutom gid imaw.

³ Pagkatapos, nag-abot ro Panueay ag naghambae kana, “Dahil Unga ka it Dyos, sugua rondayang mga bato nga mangin tinapay.”

⁴ Pero nagsabat si Jesus, “Nasueat sa Sagrado nga Kasueatan nga ‘Bukon eang it sa pagkaon mabuhi ro tawo kundi sa kada pamisaea nga ginahambae it Dyos.’ ”

⁵ Pagkatapos kara hay gindaea imaw ni Satanas sa Jerusalem ag ginpatindog sa pinakamataas nga parti it Templo.

⁶ Ginhambae imaw ni Satanas, “Dahil Unga ka it Dyos, abi eumpat ay nasueat sa Sagrado nga Kasueatan nga, ‘Suguon it Dyos ro anang mga anghel nga bantayan ka.’ Ag nasueat man nga, ‘Anda ka nga sapnayon agod owa it matabo kimo, ag bisan ro imong siki hay indi hinandad sa bato.’ ”

⁷ Nagsabat si Jesus kana, “Nasueat man sa Sagrado nga Kasueatan nga ‘Ayaw pagsamiti ro Ginuo nga imong Dyos.’ ”

⁸ Pagkatapos hay gindaea imaw ni Satanas sa kataas-taas nga bukid ag ginpakita kana ro tanan nga nasyon sa bilog nga kalibutan ag ro andang kadungganan.

⁹ Hambae kana ni Satanas, “Itao ko ron tanan kimo kon mageuhod ka sa pagsimba kakon.”

¹⁰ Nagsabat si Jesus, “Halin iya, Satanas! Nasueat sa Sagrado nga Kasueatan nga ‘Ro Ginuo nga imong Dyos eang ro imong simbahon ag imaw eang ro imong serbihan.’ ”

¹¹ Tapos, naghalin si Satanas ag nag-abot dayon ro mga anghel it Dyos ag andang gintatap si Jesus.

Nag-umpisa si Jesus sa Anang mga Oeobrahon sa Galilea

¹² Owa mabuhayi, nakabati si Jesus nga ginpriso si Juan nga Manogbawtismo. Pagkabati nana kato hay nagbalik dayon imaw sa probinsya it Galilea

¹³ sa anang banwa nga Nazaret pero owa imaw idto mag-istar, kundi idto sa Capernaum nga maeapit sa *Dagat it Galilea, sa lugar nga ginaistaran ku mga inapo nanday Zabulon ag Naftali.

¹⁴ Ro pag-istar idto ni Jesus hay natabo agod matuman ro ginhambae kato ni Propeta Isaias nga,

¹⁵ “Idto sa mga lugar nga ginaistaran ku mga inapo nanday Zabulon ag Naftali, sa lugar man nga paadto sa dagat, sa lugar nga idto man sa tabok it suba it Jordan, ag sa lugar pa gid it Galilea kon siin nagaistar ro abo nga mga owa nagakilaea sa Dyos,

¹⁶ ro mga tawo sa mga lugar ngato hay matsa nagakabuhi sa kadueom pero may hakita eon sanda nga grabing kahayag. Owa sanda it pageaom dahil owa sanda it ibang dangaton kundi kamatayon, pero pareho man ku pagbutlak it adlaw sa agahon hay nahayagan man ro andang paino-ino.”

¹⁷ Ku ratong tyempo hay nag-umpisa si Jesus it pagwali. Hambae nana sa mga tawo, “Maghinuesoe kamo ag magtalikod sa inyong mga saea ay madali lang ro oras nga pagaharian it Dyos ro tagipusuon ku anang mga sinakpan.”

Ro Pagtawag ni Jesus ku Hauna Nana nga mga Sumueunod

¹⁸ Isaeang adlaw, tag nagatikang si Jesus sa baybayon ku Dagat it Galilea hay hakita nana ro magmanghod nga sanday Simon nga ginatawag man nga Pedro ag si Andres nga nagaitsa ku andang eaya sa dagat. Pagpangisda ro pangita ku magmanghod ngara.

¹⁹ Ginhambae sanda ni Jesus, “Munot kamo kakon. Akon kamo nga tur-an agod imbis nga isda ro inyong dakpon hay tawo ro inyong kumbinsihon nga magtuo kakon.”

²⁰ Ngani inaywan eagi nanda ro andang pagpangisda ag nagsunod kana agod mangin anang mga sumueunod.

²¹ Nagtinikang sanda ag pag-abot sa unahan hay hakita man ni Jesus sanday Santiago ag ro anang igmanghod nga si Juan kaibahan ro andang ama nga si Zebedeo sa andang baroto nga nagakaayad ku andang mga eaya. Gintawag ni Jesus ro magmanghod agod mangin anang mga sumueunod.

²² Ag insigida hay inaywan nanday Santiago ag Juan ro andang baroto ag ro andang ama ag nagsunod kay Jesus.

Nagturo si Jesus ag Nagpangmayad it Kaabo-abo nga Masakiton

²³ Naglinibot si Jesus sa bilog nga probinsya it Galilea ag nagturo sa mga *sinagoga. Ana nga ginwinali sa mga tawo ro Mayad nga Balita parti sa paghari it Dyos sa tagipusuon it anang mga sinakpan, ag ana man nga ginpamayad ro tanang klasi it baeatian ag masakit ku mga tawo.

²⁴ Nangin bantog si Jesus hasta sa lugar it Syria ngani nag-adto kana ro mga tawo daea ro tanan nga mga masakiton, ro mga nagaantos it grabi nga kasakit sa sari-sari nga baeatian, ro mga ginsudlan it demonyo, ro mga kueueuon, ag ro mga paralitiko. Ginpamayad sanda tanan ni Jesus.

²⁵ Tungod kara, kaabo-abo gid nga mga tawo ro nagsunod kana nga naghalin sa mga lugar it Galilea, Judea, Jerusalem, Decapolis ag pati man sa tabok ku suba it Jordan.