Mateo 24 - Inkeanon

Ro Pagsamad it Templo

¹ Naghalin eon si Jesus sa Templo ag tag nakaguwa eon imaw, ginhingabutan imaw ku anang mga sumueunod ag ginturo nanda kana ro kanamion ku Templo ag ku mga bilding nga hasakpan ku pader nga nagapalibot sa Templo.

² Pero ginsabat sanda ni Jesus, “Nanamian gid kamo sa inyong ginapamantaw ngaron tanan pero matuod rang ginahambae kinyo nga maabot ro oras nga mawasak gid ron tanan, ag owa gid it hibinlan nga nagataeangkas ku mga bato ngaron nga gin-gamit sa pagpatindog ku Templo.”

Ro mga Paeatandaan ku Pagkawasak it Jerusalem ag ku Katapusan it Kalibutan

³ Ku ulihi, tag nagapungko si Jesus sa Bukid it Olibo, ginpaeapitan imaw ku anang mga sumueunod nga sanda-sanda eang. Anda dayon imaw nga ginpangutana, “Sugiri abi kami kon hin-uno matabo ro imo ngatong ginhambae, ag kon ano ro paeatandaan ku imong pagbalik ag ku katapusan it kalibutan.”

⁴ Nagsabat si Jesus, “Mag-andam gid kamo agod indi kamo hipataeang

⁵ ay abo ro magaabot sa ulihi nga magagamit ku akon nga ngaean. Akuon nanda nga sanda gid ro Maneueuwas nga ginpromisa it Dyos ag abo gid ro andang pataeangon.

⁶ Makabati man kamo it linupok it gira nga maeapit kinyo ag ku mga balita nga may gira sa ibang mga lugar, pero ayaw gid kamo it pakueba. Dapat gid-a nga matabo ron pero bukon pa it duyon ro katapusan it kalibutan.

⁷ Magagira ro mga nasyon ag imaw man ro mga ginharian. Magalinog sa iba-ibang mga lugar ag may grabi man nga tiggueutom.

⁸ Pero bukon pa it ruyon ro katapusan it kalibutan. Kon ikompara ra tanan sa pag-unga hay umpisa pa eang ra it pagpasaeapo.

⁹ “Sa ulihi, pagakaugtan kamo ku tanan nga mga tawo bangod mga sumueunod nakon kamo. Pagadakpon kamo ag itugyan sa mga magapasakit ag magapatay kinyo.

¹⁰ Sa oras ngato, abo ro magatalikod sa andang pagtuo kakon dahil sa mga paghingabot. Pagatraiduron man nanda ro andang isigkapareho nga mga tumueuo ag ro iba hay andang pagakaugtan.

¹¹ Abo man ro magaabot nga mga magapakuno-kuno nga mga propeta it Dyos ag abo ro andang hipataeang.

¹² Dahil sa nagainabo nga nagabaliwala sa Kasuguan it Dyos, magatahaw ro paghigugma ku abo nga mga tawo.

¹³ Pero ro nagapadayon nga nagatuo kakon hasta sa kamatayon hay maeuwas.

¹⁴ Ag ro Mayad nga Balita ngara parti sa paghari it Dyos hay igawali sa bilog nga kalibutan agod ipasayod sa tanan nga mga rasa it tawo kon paalin sanda matapoe sa anang mga sinakpan. Pagkatapos hay maabot eon dayon ro katapusan it kalibutan.”

¹⁵ Naghambae pa gid si Jesus, “Sa ulihi hay matuman ro ginsueat kato ni Propeta Daniel nga may ‘bagay nga makangingil-ad’ nga nagatindog sa sagrado nga Templo, (sa manogbasa, eubta ro kahueugan kara).

¹⁶ Kon hikita eon ninyo ron, ro mga nagaistar sa Judea hay dapat nga magpaeagiw eagi sa kabukiran.

¹⁷ Kon may tawo nga idto sa atop ku anang baeay, dapat nga magpaeagiw eagi imaw ag indi eon magsaylo sa baeay agod bue-on ro anang pagkabutang.

¹⁸ Ag ro nagaobra sa eanas hay indi eon dapat mag-uli pa agod magbuoe it ilislan.

¹⁹ Malisdan gid it duro ro mga nabdos ag ro mga may ginapasuso kon mag-abot eon ruyong tyempo.

²⁰ Pangamuyua ninyo nga kon magpaeagiw kamo hay bukon it tigeaeamig o Adlaw it Inogpahuway,

²¹ bangod ro kaeaeat-an nga maabot sa tyempo ngaron hay owa it kapareho sa mga kalisdanan nga haagyan it tawo halin pa ku pagtuga it kalibutan, hasta makaron o bisan pa sa paeaabuton.

²² Kon indi pagtag-uran it Dyos ro mga inadlaw ngaron hay owa it hibilin nga buhi sa ibabaw it kalibutan. Pero tag-uran gid man nana ro mga inadlaw ngaron por dahil sa mga ginpili nana nga anang mga katawhan.

²³ Sa ruyon man nga tyempo, kon may magahambae kinyo, ‘Hara eon ro Maneueuwas nga ginpromisa it Dyos!’ o ‘Idto imaw sa rikato nga lugar,’ ayaw gid kamo it pati.

²⁴ Ginapauna ko eagi ra kinyo dahil may mga magapakuno-kuno nga sanda ro Maneueuwas nga ginpromisa it Dyos. Ro iba ma't-a kanda hay magapakuno-kuno nga mga propeta it Dyos. Magahimo sanda it mga grabi nga milagro ag mga makangawa-ngawa nga mga bagay, bilang pamatuod kon sin-o kuno sanda agod hipataeang ro mga tawo ag kon mahimo, bisan pa ro mga pinili it Dyos nga anang mga katawhan.

²⁵ Ngani tandai gid ninyo ra! Ginapaunahan ko eagi kamo parti sa rayang mga butang bago ra matabo.

²⁶ Ngani kon may maghambae kinyo, ‘Ro Maneueuwas hay idto sa *disyerto,’ ayaw kamo rito it adto. Ag kon may maghambae, ‘Idto imaw sa sangka sekreto nga kwarto,’ ayaw kamo it pati

²⁷ tungod ro pagbalik nakon nga Unga it Tawo hay pareho it kilat nga gaguhit ro hayag sa bilog nga kaeangitan ag makita it tanan nga tawo.

²⁸ Matabo gid ra pareho it haeambaeunon nga madali hikita kon siin kampi ro may patay nga eawas tungod idto ro mga pispis nga buwitri nagadaeapo agod magtuka.”

Ro mga Gakaeatabo Kon Magbalik Eon si Jesus, ro Unga it Tawo

²⁹ Nagpadayon si Jesus it paghambae, “Pagkatapos eagi ku mga inadlaw ngato nga malisod hay magadueom ro adlaw ag indi eon maghayag ro buean. Ro tanan nga una sa kaeangitan hay pagauyugon ag magakaeahueog ro mga bituon.

³⁰ Ag may makita dayon sa kaeangitan nga tanda nga magabalik eon ako nga Unga it Tawo. Magaueahab dayon ro tanan nga mga tawo sa kalibutan kon hikita nanda ako sa daeaura sa pagbalik nakon iya, ag kon hikita man nanda ro akong gahom ag pwerting pagkadaeayawon.

³¹ Matunog dayon ro trumpeta ag pagkatapos hay suguon nakon ro akong mga anghel nga tipunon ro akong mga pinili nga katawhan halin sa tanang parti it kalibutan.”

³² “Tan-awa tuo ninyo ro kahoy nga higera ay may matun-an gid kamo. Kon maghumok eon ngani ro sanga it higera ag magpangeumbay eon hay sayod gid rayon ninyo nga madali lang ro tigsililak.

³³ Pareho man karon nga may paeatandaan ro akong pag-abot. Kon hikita eon ngani ninyo nga nagakatabo eon ro akong ginahambae kinyo hay masayran ninyo nga madali lang gid ako mag-abot.

³⁴ Matuod rang ginahambae kinyo nga ro mga tawo sa makarong tyempo hay indi maubos it kaeamatay bago matabo raya tanang mga butang.

³⁵ Maduea eang ro eangit ag kalibutan pero ro akon tanan nga ginpangturo hay owa gid it pagkaduea.”

Dapat nga Haom Kita Permi sa Pagbalik ni Jesus

³⁶ Naghambae pa gid si Jesus, “Owa it nakasayod kon anong adlawa o anong orasa ako mabalik iya sa kalibutan. Bisan ro mga anghel sa eangit o ako nga Unga hay owa karon kasayod. Ro Dyos Ama gid lang.

³⁷ Ro ginaobra ku mga tawo sa tyempo nga magbalik ako nga Unga it Tawo hay pareho man sa ginaobra ku mga tawo sa tyempo anay ni Noe.

³⁸ Bangod kato, bago nagbaha hay owa sanda mag-inato ku maabot nga kaeaeat-an kundi sa adlaw-adlaw hay normal ma't-a gihapon ro andang pagpangabuhi nga nagakaon, nagainom, ag nagaaeasawa hasta sa oras nga nagsueod sanday Noe sa arka.

³⁹ Ag owa gihapon sanda nakaeubot ku magakaeanabo hasta nagbaha eon ro kalibutan ag nagkaeaeumos sanda tanan. Ro pagbalik nakon nga Unga it Tawo hay pareho man sa pag-abot ku baha ngato.

⁴⁰ Kon may daywang ka tawo nga gaobra sa eanas pero sambilog eang kanda ro akong sumueunod, bue-on ro sambilog kanda ag hiaywanan ro anang kaibahan.

⁴¹ Kon may daywang ka bayi nga nagabayo pero sambilog eang kanda ro akong sumueunod, bue-on kanda ro sambilog ag hiaywanan ro anang kaibahan.

⁴² Ngani dapat gid nga haom kamo permi bangod owa kamo kasayod kon hin-uno mabalik ro inyong Ginuo.

⁴³ Paino-inoha tuo ninyo ra. Halimbawa abi nga sayod ku tagbaeay kon anong oras maabot ro manakaw, bukon abi it mapueaw gid imaw ag bantayan nana ro anang baeay agod indi ra hisueod ku manakaw?

⁴⁴ Ngani dapat man kamo nga mangin haom permi bangod ako nga Unga it Tawo hay maabot sa oras nga owa ninyo ginapaabuta.”

Ro mga Sueuguon it Dyos hay Dapat nga Matutom sa Paghimo ku Ginsalig Kanda

⁴⁵ Naghambae pa gid si Jesus, “Isipa ninyo kon pareho kamo it isaeang ka matutom ag maaeam nga sueuguon nga ginbutang ku anang amo nga magdumaea ku iba pa nga mga sueuguon ag magpakaon kanda sa tamang oras.

⁴⁶ Bulahan gid-a ro sueuguon ngaron kon hiabutan imaw ku anang amo nga ginaobra ro ginbilin ngaron kana.

⁴⁷ Matuod rang ginahambae kinyo nga bangod masaligan ro sueuguon ngaron, kana isalig ku anang amo ro pagpatikang ku tanan nanang pagkabutang.

⁴⁸ Pero kon halimbawa abi nga ro isaeang ka sueuguon hay maeain 't-a, ag maghambae imaw sa anang kaugalingon nga mabuhay pa't-a mana mag-uli ro akong amo,

⁴⁹ ag ana't-ang pagbinakueon ro mga sueuguon ngato nga anang ginadumaeahan ag magkinaon 't-a imaw ag makig-inuman sa mga paeahilong.

⁵⁰ Maabot 't-a rayon ro anang amo sa adlaw nga owa nana ginapaabuta ag sa oras nga owa man nana masayri.

⁵¹ Grabi gid-a nga pina ro anang hisamitan sa anang amo ag itagbong dayon imaw, kaibahan it ibang mga ipokrito, sa lugar nga bagay gid kanda kon siin sige ro pagtinangis ag pagpinagot it mga tawo.”