Mateo 21 - Inkeanon

Gindayaw si Jesus ku mga Tawo Pag-abot Nana sa Jerusalem

¹ Tag maeapit eon sanday Jesus sa Jerusalem ag nakaabot eon sanda sa Bukid it Olibo, nga maeapit sa baryo it Betfage hay ginpauna dayon ni Jesus ro daywa sa anang mga sumueunod.

² Ginbilinan nana sanda, “Una kamo idto sa baryo sa unahan ag makakita eagi kamo it inahan nga asno ag may ana ron nga tiyo. Hubari ninyo sanda ag daehon iya kakon.

³ Kon may magmueo ngani kinyo, sabta nga ginadapatan maton it Ginuo ag ipadaea ma't-a eagi sanda ron kinyo.”

⁴ Natabo ra agod magmatuod ro ginpahambae it Dyos sa propeta kato,

⁵ “Hambaea ro mga pumueuyo it Jerusalem ‘Haron, nagapaeangop ro inyo nga hari nga nagpaubos ku anang kaugalingon ag nagasakay sa tiyo it asno.’ ”

⁶ Tapos nagpanaw ro daywa ngato nga ka sumueunod ag gintuman ro sugo ni Jesus.

⁷ Ginbuoe nanda ro asno ag ro anang tiyo kara ag gindaea kay Jesus. Ginhapinan dayon nanda ro likod ku mga asno it andang mga pangsanib ag nagsakay dayon si Jesus.

⁸ Tag nagapanaw eon si Jesus nga nagasakay sa asno, ro kaabo-abo nga mga tawo ngato nga nagasueunod kana hay naghapead ku andang mga pangsanib sa anang aeagyan sa pagpadungog kana. Ro iba man kanda hay nagbutang it mga maintok nga sanga it kahoy nga andang gin-utod sa binit it daean.

⁹ Ro mga tawo nga nagauna kay Jesus ag ro mga nagasunod hay nagasilinggit. Sinanda, “Dayawon ro apo ni Haring David! Daeayawon raya nga ginpadaea iya it Ginuong Dyos! Dayawon ro Dyos sa pinakamataas nga kaeangitan!”

¹⁰ Tag nakasueod eon si Jesus sa Jerusalem hay nagkagubot ro bilog nga syudad. Hambae nanda, “Sin-o ron?”

¹¹ “Ro propeta nga si Jesus ron, nga tagaNazaret nga sa probinsya it Galilea,” sabat ku mga tawo nga nagasueunod kay Jesus.

Ginpangsuboe ni Jesus ro mga Negosyante sa *Lagwirta it Templo

¹² Pag-abot nanda sa Jerusalem hay nagsueod si Jesus sa *lagwirta it Templo ag ginpangsuboe ro mga tawo nga idto nagabaligya it mga sapat nga pangsakripisyo. Ana man nga ginpangsuboe pati ro mga nagabakae ku mga sapat ngato. Ginpangbaliskad man nana ro mga lamisa it mga nagabaylo it kwarta pati ro mga pungkuan it mga nagabaligya it salampati.

¹³ Ginhambaean nana sanda, “Naghambae ro Dyos sa Sagrado nga Kasueatan nga, ‘Ro akong baeay hay tawgon nga baeay nga paeangamuyuan.’ Pero inyo ra nga ginaobra nga paeanaguan it mga buyong!”

¹⁴ Pagkatapos hay nag-adto kay Jesus idto sa *lagwirta it Templo ro mga bulag ag mga eupog ag ana sanda nga ginpangmayad.

¹⁵ Pero naugot ro mga pinuno it mga saserdote ag mga maestro it Kasuguan pagkakita nanda ku mga makangawa-ngawa nga ginaobra ni Jesus ag pagkabati nanda nga nagasininggit ro mga unga it “Dayawon ro apo ni Haring David!”

¹⁶ Ngani ginhambae nanda si Jesus, “Ano ra? Owa ka baea kabati kon ano ro ginasininggit ku mga unga?” Nagsabat si Jesus, “Huo, habatian ko. Owa baea kamo kabasa sa Sagrado nga Kasueatan nga nagahambae it makaraya, ‘O Dyos, imong ginpahambae it pagdayaw kimo ro mga unga ag bisan pa ro mga eapsag.’ ”

¹⁷ Pagkahambae karon ni Jesus hay inaywanan nana sanda ag umadto imaw sa Betania, kaibahan ku anang mga sumueunod, ag idto nageubog.

Ginmaldesyon ni Jesus ro Sangka Kahoy nga Higera

¹⁸ Agahon pa nga mayad, tag nagapabalik eon sanda sa syudad hay nakabatyag it gutom si Jesus.

¹⁹ Nakakita imaw sa binit it daean it kahoy nga higera kon tawgon. Ana ra nga ginpaeapitan ag gintan-aw kon may bunga nga sarang makaon pero owa imaw it hakita kundi dahon. Ginhambae ra nana, “Umpisa makaron, indi ka eon magpamunga maskin hin-uno.” Ag naeaay eagi ro kahoy it higera.

²⁰ Hakita ra ku anang mga sumueunod ag hangawa gid sanda. “Haalin baea ro kahoy ngara nga naeaay eagi imaw?” pangutana nanda.

²¹ Nagsabat si Jesus, “Matuod rang ginahambae kinyo nga kon nagasalig kamo sa Dyos ag owa kamo nagaduda, mahimo man ninyo ro akon nga gin-obra sa kahoy ngara. Ag bukon eang it duyon kundi masugo man ninyo rayang bukid nga maghalin ag magsaylo sa dagat ag mahimo gid ron.

²² Bisan ano ro inyong pangayuon sa Dyos kon magpangamuyo kamo hay mabaton ron ninyo basta nagasalig gid kamo kana.”

Gin-usisa si Jesus Kon Sin-o Kana ro Nagtao it Otoridad

²³ Pag-abot nanda sa Jerusalem, nagbalik si Jesus sa Templo ag idto nagturo. Tag nagaturo imaw, ginpaeapitan imaw ku mga pinuno it mga saserdote ag ku kaibahan nandang mga lider ag ginpangutana, “Ano ring otoridad nga obrahon ro imong mga ginaobra iya sa Templo? Sin-o kimo ro nagtao ku otoridad ngaron?”

²⁴ Nagsabat si Jesus, “Kon sabton ninyo ro akong pangutana ngara, sabton ko man kamo.

²⁵ Sin-o ro nagtao kay Juan it otoridad nga magpangbawtismo? Ro Dyos baea o tawo?” Nagpaeangutan-an dayon sanda, “Ano ro atong isabat kana? Kon hambaeon naton nga ro Dyos ro nagtao it otoridad kay Juan, ana man kita nga kutan-on kon ham-an it owa kita nagpati kay Juan.

²⁶ Pero kon hambaeon man naton nga halin eang sa tawo ro otoridad ni Juan, delikado man kita, ay basi alinon man kita it mga tawo bangod gapati gid sanda nga propeta si Juan.”

²⁷ Ngani ginsabat nanda si Jesus, “Tao ngani, owa kami kasayod.” Nagsabat man si Jesus, “Kon mawron hay indi ko man kamo pagsabton kon sin-o ro nagtao kakon it otoridad nga obrahon ro akong ginaobra.”

Dapat nga Tumanon Gid Naton ro Dyos Bukon Eang it Nagapakuno-kuno nga Nagatuman

²⁸ Naghambae dayon si Jesus kanda, “Ano ro inyong mahambae sa akong iistorya ngara kinyo? May isaeang ka tatay nga may daywang ka unga. Naghambae imaw sa anang kamagueangan, ‘Toto, adto abi sa atong ubasan ag magtrabaho ka idto.’

²⁹ “ ‘Indi't-ang, Tay,’ sabat ku unga. Pero ku ulihi hay nagbaylo ro anang isip ngani nag-adto imaw sa ubasan.

³⁰ Inadtunan man ku tatay ro kamanghuran ag ginsugo man ra nana nga mag-obra sa ubasan. ‘Huo, Tay, maadto ako,’ sabat ku unga. Pero owa man imaw mag-adto.

³¹ Siin sa daywa ngato nga ka unga ro nagsunod sa gusto ku andang ama?” “Ro kamagueangan,” sabat nanda. Nagsabat si Jesus, “Tama. Matuod rang ginahambae kinyo nga ro mga madaya nga mga *manogsukot it buhis ag ro mga bayi nga nagabaligya ku andang kaugalingon hay nagauna pa kinyo nga mangin sinakpan it Dyos.

³² Bangod tag nag-adto riya si Juan nga Manogbawtismo ag nagturo kon mauno ro pagpangabuhi it matarong hay owa kamo magtalikod sa inyong mga saea ag magpati kana. Pero nagpati kana ro mga *manogsukot it buhis ag ro mga maeain nga bayi. Bisan hakita eon ron ninyo hay owa gihapon kamo nagpati kay Juan.”

Ginkompara ni Jesus ro mga Pinuno it mga Judio sa mga Manog-agsa nga Nagpatay ku Unga ku Tag-ana it Ubasan

³³ Naghambae pa gid si Jesus kanda, “Pamati kamo sa sambilog pa ngara nga paanggid nga istorya. May isaeang ka tawo nga may taeamnan ag gintamnan ra nana it ubas. Ana ra nga ginpakuraean ag nagpaobra man imaw it pueugaan it ubas ag tore para sa bantay. Ginpaagsahan dayon nana ro ana ngara nga ubasan ag tapos nagpanaw imaw it mabuhay sa maeayo nga lugar.

³⁴ Tag tigpueu-pu eon it ubas, ana nga ginpaadto ro anang mga ulipon sa mga manog-agsa agod bue-on ro anang hueay sa tubas.

³⁵ Pero pag-abot idto ku mga ulipon hay pinuko sanda ku mga manog-agsa, binakoe ro sambilog, pinatay ro sambilog ag ginbato ro sambilog.

³⁶ Ngani pinaadto eon man idto ku tag-ana ro iba pa nanang mga ulipon. Mas abo pa ro anang ginpaadto kaysa sa hauna ngato pero makarato man sa mga hauna ro gin-obra kanda ku mga manog-agsa.

³⁷ Sa kaulihanan gid, ro ana lang nga unga nga eaki ro anang ginsugo idto ay sinana sa anang isip, ‘Unga ko eon ron. Anda't-a ron nga tahaon.’

³⁸ Pero pagkakita ku mga manog-agsa nga nagapaeangop ro unga ku tag-ana it ubasan hay nagkaeasugot sanda. Hambae nanda, ‘Hara ro manunubli ku ubasan ngara. Patyon ta imaw agod aton eon dayon ro anang paeanublion ngara.’

³⁹ Ngani pag-abot nana, anda imaw nga pinuko ag initsa sa guwa it ubasan ag pinatay.”

⁴⁰ Nagpangutana dayon si Jesus sa mga tawo, “Kon mag-abot sa ubasan ro tag-ana, alinon nana ro mga manog-agsa ngato?”

⁴¹ Nagsabat sanda kay Jesus, “Pamatyon nana ro mga maeain ngato nga mga manog-agsa sa makangingidlis nga paagi! Ag pagkatapos hay paagsahan nana ro ubasan sa iba nga magatao kana ku anang hueay kon tig-aeani eon.”

⁴² Naghambae si Jesus, “Owa baea kamo kabasa ku Sagrado nga Kasueatan nga, ‘Ro bato nga ginbilang nga owa it pueos ku mga panday hay imaw pa gali ro pinakaimportanti nga bato sa pundasyon it bilding. Ro Dyos ro nagplano nga matabo ron ag makangawa-ngawa gid ron katon’?

⁴³ “Ngani ginahambae ko eagi kinyo nga bukon eon it kamo ro bilangon it Dyos nga anang mga sinakpan kundi ro iba't-ang mga tawo nga ro bunga ku andang kabuhi hay magapalipay kana.

⁴⁴ Ro mahueog sa bato ngaron hay sigurado gid nga mawas-ag ag ro mahueugan karon hay sigurado gid nga magkaeatumok.”

⁴⁵ Pagkatagumpaaw ku mga pinuno it mga saserdote ag ku mga Pariseo nga sanda ro ginapatamaan ni Jesus sa ana ngatong paanggid nga istorya

⁴⁶ hay anda kunta imaw nga ginadakop. Pero owa man nanda pagpadayuna ay nahadlok man sanda sa mga tawo dahil nga nagapati ro mga tawo nga propeta si Jesus.