Mateo 17 - Inkeanon

Nag-iba ro Itsura ni Jesus

¹ Pagkataliwan it an-om nga adlaw, gindaea ni Jesus si Pedro, ro magmanghod nga si Juan ag si Santiago ag nagsaka sanda sa mataas nga bukid nga sanda-sanda eang.

² Tag idto eon sanda hay hasaksihan ku tatlo nga nag-iba ro itsura ni Jesus. Ro anang uyahon hay kasilaw-silaw pareho it adlaw ag ro anang eambong hay nagabanaag sa kaputi nga pareho it masilaw nga iwag.

³ Ag gulpi eang dayon nga hakita ku tatlo sanday Moises ag si Propeta Elias nga nagapakighambae kay Jesus.

⁴ Naghambae dayon si Pedro kay Jesus, “Ginuo, mayad ngani ay iya kami. Kon gusto mo, maobra ako it tatlong ka payag. Sambilog para kimo, sambilog para kay Moises ag sambilog man para kay Elias.”

⁵ Tag nagahambae pa imaw hay gintabunan ro tatlo it sangka masilaw nga daeaura. Ag may limog nga naghambae halin sa daeaura, “Daya ro akong palangga nga Unga nga nagapalipay kakon. Pamati kamo kana it mayad.”

⁶ Pagkabati ku mga sumueunod ku limog ngato hay hinadlukan gid sanda ag naghaeapa sanda sa eugta.

⁷ Ginpaeapitan dayon sanda ni Jesus ag ginbuytan ag ginhambae, “Tindog eon kamo a. Ayaw kamo mahadlok.”

⁸ Pagtan-aw ku tatlo sa palibot hay owa sanda it ibang hakita kundi si Jesus eang.

⁹ Tag nagapapanaog eon sanda sa bukid, ginbilinan sanda ni Jesus. Hambae nana, “Ayaw ninyo pagsugiran bisan kanyo ro inyo ngatong hakita hasta indi pa mabanhaw ako nga Unga it Tawo.”

¹⁰ Nagpangutana dayon kana ro tatlo, “Ham-an it ginahambae ku mga maestro it Kasuguan nga dapat anay magbalik ro propeta anay nga si Elias bago mag-abot ro *Kristo nga ginpromisa it Dyos?”

¹¹ Nagsabat si Jesus, “Tama ro andang ginahambae ngaron. Hauna gid man si Propeta Elias agod papahaumon nana ro mga tawo sa pag-abot ni Kristo.

¹² Pero ginahambae ko kinyo nga nakaabot eon si Elias, ugaling owa imaw hakilaea it mga tawo ag gin-obra nanda ro andang maeain nga gustong obrahon kana. Makaruyon man ro matabo kakon nga Unga it Tawo, anda man ako nga pagapasakitan.”

¹³ Haeubtan eon dayon ku anang mga sumueunod nga si Juan nga Manogbawtismo ro anang buot hambaeon nga si Elias.

Ginpamayad ni Jesus ro Sangka Unga nga Ginsudlan it Maeain nga Espirito

¹⁴ Pagkaabot ni Jesus ag ku anang tatlong ka sumueunod sa kaabo nga mga tawo nga idto sa ubos it bukid, may eaki nga nagpaeapit kana ag nageuhod sa anang atubang

¹⁵ ag naghambae, “Ginuo, kaeuuyi man ro akong unga! Imaw hay kueueuon ag kon dungguon ngani imaw hay grabi. Permi imaw nga gakatumba sa kaeayo o kon sa tubi.

¹⁶ Gindaea ko imaw sa imong mga sumueunod pero indi nanda imaw hipamayad.”

¹⁷ Naghambae si Jesus, “Abi gid-a ro mga tawo ngara makaron. Owa pa't-a gihapon kamo nagatuo kakon ag mga balingahag gid kamo it paino-ino! Hasta hin-uno pa baea ako mag-iba kinyo bago kamo magtuo kakon? Hasta hin-uno pa't-a ako magtiniis kinyo? Daeha ro unga iya kakon.”

¹⁸ Ginsugo ni Jesus ro demonyo nga magguwa sa unga. Nagguwa rato ag halin kato, ro unga hay owa eon pagkueua.

¹⁹ Ku ulihi, kat sanda lang ku anang mga sumueunod hay nagpaeapit ra sanda kay Jesus ag nagpangutana, “Ham-an it indi namon masuboe ro demonyo ngato?”

²⁰ Nagsabat si Jesus, “Tungod kueang pa ro inyong pagtuo kakon. Pero matuod rang ginahambae kinyo nga kon may inyo nga pagtuo nga bisan mat busoe eang it mustasa it bahoe hay puydi ninyo nga suguon rayang bukid nga ‘Adto rikato’ ag maadto ron idto. Mahimo ninyo ro tanan.

²¹ [Pero ratong klasi it demonyo hay indi maghalin kon indi pagpangamuyuan ag pagpuasahan.”]

Nagsugid it Uman si Jesus Hanungod sa Anang Pag-antos, Kamatayon ag Pagkabanhaw

²² Isaeang adlaw kat nagtilipon sa Galilea si Jesus ag ro anang mga sumueunod naghambae imaw kanda, “Maabot gid ro oras nga ako nga Unga it Tawo hay traiduron ag itugyan sa mga tawo

²³ nga magapapatay kakon. Pero mabanhaw ako sa ikatlong adlaw.” Nasubuan gid ro anang mga sumueunod sa ana ngarang ginhambae.

Nagbayad si Jesus ag si Pedro Ku andang Buhis sa Templo

²⁴ Pag-abot nanday Jesus sa Capernaum, nag-adto kay Pedro ro mga *manogsukot it buhis para sa Templo ag nagpangutana, “Gabayad ma't-a it buhis sa Templo ro inyong maestro, no?”

²⁵ “Huo gid lang ron,” sabat ni Pedro. Pag-abot ni Pedro sa baeay nga ginadayunan ni Jesus, bago nakahambae si Pedro hay pinangutana eon imaw ni Jesus, “Simon, kon kimo, sin-o ro ginapabayad it sari-saring buhis ku mga hari iya sa kalibutan? Ro anda baea mismong pamilya o ro ibang tawo?”

²⁶ “Syempre, ro ibang tawo't-a ron,” sabat ni Pedro. Nagsabat si Jesus, “Kon mawron hay owa it kinahangean nga magbayad ro mismong pamilya.

²⁷ Pero owa kita naila nga mageain ro buot ku mga manogsukot ngato katon. Ngani pagpamunit idto sa dagat ag buksi ro ba-ba ku primerong isda nga imong hidakpan. Makakita ka idto it kwarta nga sarang ikabayad sa buhis natong daywa sa Templo. Tapos, bayari dayon ro atong buhis.”