Mateo 15 - Inkeanon

Ro Ginaturo ku mga Pariseo hay Owa Gakasinanto sa Kasuguan it Dyos

¹ Isaeang adlaw, may nag-adto kay Jesus nga mga Pariseo ag mga maestro it Kasuguan nga naghalin pa sa Jerusalem. Ginpangutana nanda imaw,

² “Ham-an it ginaeapas ku imong mga sumueunod ro kaugalian nga ginturo pa ku atong taeahaon nga mga kalolo-lolohan? Owa sanda nagasunod sa ritwal it pagpalibanaw it alima bago magkaon.”

³ Nagsabat si Jesus, “Hay ham-an it inyo man nga ginaeapas ro Kasuguan it Dyos por dahil eang sa inyong kaugalian?

⁴ Halimbawa, ginpasueat it Dyos kay Moises nga, ‘Tahura ro inyong mga ginikanan’ ag ‘Sintinsyahi it kamatayon ro bisan sin-o nga maghambae it maeain sa anang mga ginikanan.’

⁵ Pero kon kinyo hay puydi nga hambaeon it unga sa anang ginikanan nga, ‘Buligan ko kunta kamo ugaling hay ginpangako ko eon nga ihaead sa Dyos ro akong inogbulig kinyo.’

⁶ Ngani kon kinyo, owa it kaso bisan indi eon imaw magtahod sa anang ginikanan paagi sa pagtao ku andang kinahangeanon. Sa inyo ngaron nga ginaobra hay ginabaliwala't-a ninyo ro hambae it Dyos por dahil eang sa inyong kaugalian.

⁷ Mga ipokrito gid-a kamo! Tama gid ro hambae ni Propeta Isaias parti kinyo kato anay nga,

⁸ ‘Ginapadunggan ako ku mga tawo ngara sa andang mga ginahambae, pero maeayo ro andang buot kakon.

⁹ Owa it pueos ro andang pagsimba kakon ay ro andang ginaturo nga akon kuno nga kasuguan hay mga kasuguan nga gin-obra man lang it tawo.’ ”

Ro Makapahigko sa Tawo sa Mata it Dyos

¹⁰ Tapos, ginpapaeapit ni Jesus kana ro kaabo nga mga tawo nga idto ag ginhambae, “Pamati kamo ag eubton ro akon nga ihambae kinyo.

¹¹ Bisan ano ro ibutang it tawo sa anang ba-ba hay indi ra makapahigko kana sa mata it Dyos, kundi ro nagaguwa sa anang ba-ba ro makapahigko kana.”

¹² Nagpaeapit dayon kana ro anang mga sumueunod ag naghambae, “Sayod mo baea nga nanaw-ay it duro ro mga Pariseo pagkabati nanda sa imong ginhambae ngato?”

¹³ Nagsabat si Jesus, “Ro mga Pariseo ngaron hay pareho ku mga tanom nga bukon it ro akon nga Ama sa eangit ro nagtanom, ngani ana ron sanda nga panggabuton sa ulihi.

¹⁴ Ngani ayaw ninyo sanda pag-inatuha, ay pareho ron sanda it bulag nga nagaguyod man it bulag. Ag kon bulag man ro nagaguyod sa isaea pa nga bulag hay pareho sanda nga mahueog sa kutkut.”

¹⁵ Naghambae dayon si Pedro, “Abi, sugiri kami kon ano ro kahueugan ku imo ngatong gin-istorya kaina, tag ratong parti sa pagkaon nga indi makapahigko sa tawo.”

¹⁶ Nagsabat si Jesus, “Ano? Pati baea kamo hay owa gihapon kaeubot?

¹⁷ Owa baea kamo kasayod nga ro pagkaon nga gasueod sa ba-ba hay nagadiritso sa tiyan ag nagaguwa man dayon?

¹⁸ Pero ro gaguwa sa ba-ba nga maeain nga mga haeambaeunon hay halin sa kabubut-on it tawo, ag ruyon ro nagapahigko kana sa mata it Dyos.

¹⁹ Sa kabubut-on abi it tawo nagahalin ro mga maeain nga handom nga nagatueod kana nga maghimo it maeain pareho it pagpatay, pagpangawatan, paghulid sa bukon it asawa, pagpanakaw, pagtestigo it pinuril, ag pagpakaeain sa isigkatawo.

²⁰ Ro mga ruyon ngaron ro makapahigko sa tawo sa mata it Dyos, bukon it ro pagbaliwala sa ritwal it pagpalibanaw it alima bago magkaon.”

Ro Grabi nga Pagtuo ku Bayi nga Bukon it Judio

²¹ Nagpanaw dayon sanday Jesus paadto sa mga lugar nga sakop it Tiro ag Sidon.

²² Tag idto eon sanda, may nag-adto kana nga bayi nga tagaidto nga halin sa linahi it mga tagaCanaan kato anay. Nagsininggit ratong bayi, “Ginuo, apo ni Haring David, maeuoy ka kakon! Ginsudlan it demonyo ro akong unga nga bayi ag grabi gid ro anang kahimtangan.”

²³ Pero owa gid imaw pagsabta ni Jesus. Nagpaeapit ro ay Jesus nga mga sumueunod kana ag naghambae, “Papanawa eon abi imaw ron. Nagaisturbo imaw katon ay nagasinunod imaw ag magsininggit.”

²⁴ Ginsabat dayon ni Jesus ro bayi, “Ginpaadto ako iya ku Dyos para eang sa mga inapo ni Israel, ay pareho sanda it mga karnero nga nagtaeang ag nagkaeaduea.”

²⁵ Pero nagpinilit gid ro bayi. Naghapa imaw sa atubang ni Jesus ag naghambae, “Ginuo, buligi man ako.”

²⁶ Ginsabat imaw ni Jesus it uman, “Bukon it tama nga bue-on ro pagkaon it mga unga ag iitsa eang sa mga ayam.”

²⁷ Nagsabat man ro bayi, “Tama ron, Ginuo, pero gakaon man ro mga ayam it bisan mga muhmoh eon lang nga nagakaeahueog sa lamisa ku andang amo.”

²⁸ Tapos, naghambae si Jesus, “Nang, grabi gid ro imong pagtuo kakon ngani itao ko ro imong ginapangayo.” Ag ku rato mismong oras hay nagmayad eagi ro unga ku ratong bayi.

Nagpamayad si Jesus it Kaabo-abong Tawo

²⁹ Naghalin sa ratong lugar si Jesus ag nagpamanawon hasta nga nakaabot imaw sa may Dagat it Galilea. Pag-abot idto, nagsaka imaw sa sangka bukid ag nagpungko.

³⁰ Kaabo-abo nga tawo ro nag-adto idto kana ag gindaea nanda ro andang mga masakiton, mga eupog, mga bulag, mga paki, mga uwaw ag abo pa nga sari-saring masakit. Ratong mga masakiton hay gindaea nanda sa atubang ni Jesus ag ana sanda tanan nga ginpamayad.

³¹ Hangawa gid ro mga tawo pagkakita nanda nga nakahambae ro mga uwaw, nakatikang ro mga eupog ag paki ag nakakita ro mga bulag. Gindayaw nanda ro Dyos it mga inapo ni Israel dahil sa anda ngatong hakita.

Ginpakaon ni Jesus ro Sobrang Ap-at nga Libong Ka Tawo

³² Pagkataliwan it tatlong adlaw, idto gihapon ro mga tawo sa bukid kaibahan ni Jesus. Gintawag nana ro anang mga sumueunod ag ginhambae, “Naeuoy ako sa kaabong mga tawo ngara ay tatlong adlaw eon ra sanda iya kakon ag owa eon sanda it makaon. Owa ako naila nga paulion sanda nga owa it kinaon, basi magkaealipong sanda sa daean.”

³³ Nagsabat ro anang mga sumueunod, “Siin abi kita mabuoe it ipakaon karon kanda ay owa gid it kabaeayan riya ag kaabo-abo pa sanda?”

³⁴ Nagpangutana si Jesus, “Pilang bato ro inyong tinapay?” “Pito ag may pilang bato man nga maintok nga isda,” sabat nanda.

³⁵ Ginpaplastar dayon ni Jesus ro mga tawo sa eugta

³⁶ ag ginbuoe ro pito ngato nga ka tinapay ag pilang ka isda ag ginpasaeamatan rato sa Dyos. Pagkatapos hay ginpihak-pihak nana rato ag gintao sa anang mga sumueunod ag ginpapanueupod sa mga tawo.

³⁷ Nagkaon ro tanan nga mga tawo hasta nga nagkaeabusog ag may habilin pa nga pitong ka kaing sa anda ngato nga pagkaon.

³⁸ Ap-at nga libong ka eaki ro nakakaon kato. Owa pa't-a karon hatapoe it huyap ro mga bayi ag mga unga.

³⁹ Pagkatapos, ginpauli ni Jesus ratong kaabo-abo nga mga tawo ag nagsakay dayon imaw ag ro anang mga sumueunod sa baroto. Idto sanda nag-adto sa lugar nga maeapit sa Magadan.