Mateo 14 - Inkeanon

Ro Pagpatay kay Juan nga Manogbawtismo

¹ Owa mabuhayi hay habatian ni Herodes nga gobernador it Galilea ro mga ginahimo ni Jesus.

² Hambae ni Herodes sa anang mga opisyales, “Si Juan nga Manogbawtismo't-a ro tawo ngara. Nabanhaw imaw mawron nga may gahom imaw nga makahimo it mga milagro.”

³ Naghambae karon si Herodes dahil sa anang gin-obra kato kay Juan. Kato abi hay ana nga ginpadakop si Juan ag ginpapriso agod sundon ro gusto ni Herodias. Rayang si Herodias hay hipag ni Herodes nga anang gin-agaw kay Felipe nga anang igmanghod.

⁴ Tungod kara hay ginhambaean ni Juan si Herodes, “Ginabawae ku kasuguan it Dyos ro imong pag-asawa sa bayi ngaron.”

⁵ Gusto kunta ni Herodes nga ipapatay si Juan pero nahadlok man imaw sa mga tawo ay nagapati sanda nga propeta si Juan.

⁶ Tag adlaw kato it pagselebrar ku kaadlawan it pagkatawo ni Herodes hay nagkinalipay sanda. Nagsaot ro unga nga daeaga ni Herodias sa atubang ku mga bisita ag naila gid si Herodes sa ana ngato nga saot.

⁷ Ngani nagpanumpa imaw sa daeaga nga itao gid nana ro bisan ano nga pangayuon kana.

⁸ Gintud-an ku anang ina ro daeaga kon ano ro anang pangayuon kay Herodes, ngani hambae ku daeaga, “Taw-an kakon ro ueo ni Juan nga Manogbawtismo nga nakabutang sa bandehado.”

⁹ Nasubo ro hari pero tungod nakapanumpa eon imaw sa atubang ku anang mga bisita ngani nagsugo imaw nga itao ro pangayo ku daeaga.

¹⁰ Ngani ginpapugutan nana si Juan idto sa prisuhan.

¹¹ Ginbutang dayon ro ueo ni Juan sa bandehado ag gindaea sa daeaga ag gintao nana dayon rato sa anang ina.

¹² Pagkabati ku mga sumueunod ni Juan ku natabo, nag-adto sanda idto ag ginbuoe ro anang eawas ag gineubong. Tapos, nag-adto sanda kay Jesus ag ginsugiran imaw.

Ginpakaon ni Jesus ro Sobrang Limang Libo Paagi sa Anang Gahom

¹³ Pagkabati ni Jesus ku natabo kay Juan hay sumakay imaw sa baroto kaibahan ro anang mga sumueunod ag tumabok sa sangka lugar nga owa it kabaeayan agod sanda-sanda eang idto. Pero kaabo nga mga tawo ro nakasayod nga nagpanaw si Jesus ag nag-aeapas 't-a sanda. Halin sa mga kabanwahan sa libot hay nagtikang sanda sa baybay paadto sa ay Jesus nga ginapaadtunan.

¹⁴ Pagpanaog ni Jesus, hakita nana ro kaabo-abo nga tawo nga nagsunod kana. Naeuoy gid imaw kanda ngani anang ginpangmayad ro mga masakiton kanda.

¹⁵ Tag hapon eon gid, nagpaeapit kay Jesus ro anang mga sumueunod ag naghambae, “Salikaeom eon ag iya pa kita sa lugar nga owa it kabaeayan. Mayad siguro nga papanawon eon naton ro kaabo ngara nga mga tawo idto sa mga kabaryuhan agod makabakae sanda it pagkaon.”

¹⁶ Pero nagsabat si Jesus, “Owa eon it kinahangean nga papanawon ninyo sanda. Kamo mismo ro magtao it pagkaon kanda.”

¹⁷ Nagsabat sanda, “Limang ka tinapay ag daywang ka isda gid lang ro pagkaon ngara iya.”

¹⁸ Naghambae si Jesus, “Daeha ron ninyo iya kang.”

¹⁹ Ginpapungko dayon nana ro mga tawo sa hilamunon. Ginbuytan nana ro limang ka tinapay ag daywang ka isda ngato ag nagtangda sa eangit ag nagpasaeamat sa Dyos. Tapos hay ana nga ginpihak-pihak ro tinapay ag gintao sa anang mga sumueunod ag ginpanueupod nanda rato sa kaabo nga mga tawo.

²⁰ Nagkaon sanda tanan hasta nagkaeabusog. Pagkatapos hay gintipon ku mga sumueunod ro habilin ag nakapuno sanda it dose ka kaing.

²¹ May mga limang libong ka eaki ro nakakaon kato. Owa pa't-a karon hatapoe it huyap ro mga bayi ag mga unga.

Nagtikang si Jesus sa Ibabaw it Tubi

²² Pagkatapos eagi kara hay ginpasakay ni Jesus sa baroto ro anang mga sumueunod ag ginpauna it tabok ay papaulion pa nana ro mga tawo.

²³ Pagkapauli nana ku mga tawo, nagsaka imaw sa bukid agod magpangamuyo nga nagaisaeahanon. Tag gabii eon hay idto gihapon si Jesus nga nagaisaeahanon sa bukid.

²⁴ Ro ay Jesus ma't-a nga mga sumueunod hay idto gihapon sa tunga-tunga it eawod. Nalisdan abi sanda sa pagtabok ay subeang sanda sa mabaskog nga hangin ag ginahinampak it daeagko nga humbak ro andang baroto.

²⁵ Tag aga-aga eon, nag-adto kanda si Jesus nga nagatikang sa ibabaw it tubi.

²⁶ Pagkakita nanda kay Jesus nga nagatikang sa ibabaw it tubi hay hinadlukan sanda ag nagsilinggit sa andang kakueba, ay eaom nanda hay mueto imaw.

²⁷ Pero naghambae eagi si Jesus, “Ayaw kamo it kahadlok. Ako ra.”

²⁸ Naghambae si Pedro, “Ginuo, kon ikaw gid man don, patikanga man ako sa tubi paadto kimo.”

²⁹ “Sige, maliya,” sabat ni Jesus. Nanaog matuod si Pedro sa baroto ag nagtikang sa ibabaw it tubi paadto kay Jesus.

³⁰ Pero pagkakita nana ku maeagko nga humbak nga daea ku mabaskog nga hangin, kinuebaan imaw ag nag-umpisa imaw it eugdang. Suminggit imaw, “Ginuo, tabangi ako!”

³¹ Binutong imaw it dali-dali ni Jesus ag ginhambae, “Ham-an it nagduda ka? Kueang 't-a gihapon ro imong pagtuo kakon.”

³² Nagsakay dayon sanda sa baroto ag nagpundo eagi ro hangin.

³³ Nageuhod dayon ro anang mga sumueunod nga idto sa baroto ag ginsimba nanda imaw. Hambae nanda, “Ikaw gid matuod ro Unga it Dyos.”

Ginpamayad ni Jesus ro mga TagaGenesaret

³⁴ Pagkatabok nanda hay idto sanda nagdungka sa lugar it Genesaret.

³⁵ Hakilan-an ku mga tawo idto si Jesus ngani ginpasayod nanda sa mga tawo sa tanan nga kabanwahan sa rato nga lugar nga nag-abot si Jesus, ngani andang gindaea ro tanan nandang mga masakiton kana.

³⁶ Ginpinangabay nanda imaw nga kon puydi hay sugtan nana ro mga masakiton nga tabingon nanda bisan ro gayad eon lang ku ana nga eambong. Ag ro tanan nga nakatabing kato hay nagmaeayad.