Mateo 11 - Inkeanon

Ro Pangutana ni Juan nga Manogbawtismo

¹ Pagkatapos ni Jesus it hambae ku anang mga bilin sa anang dose nga ka sumueunod hay naghalin dayon imaw sa ratong lugar ag nag-adto sa iba pang mga kabanwahan it Galilea agod magturo ag magwali.

² Si Juan ma't-a nga Manogbawtismo hay idto sa prisuhan tag nakabati imaw ku mga ginahimo ni Kristo. Ginpaadto dayon nana idto ro pila ku anang sumueunod agod mangutana.

³ Pag-abot idto, naghambae sanda kay Jesus, “Ginapapangutana kamon ni Juan kon ikaw eon baea kuno ro among ginapaabot nga ginpromisa it Dyos, o mahueat pa kami it iba?”

⁴ Nagsabat si Jesus, “Balik kamo kay Juan ag sugiran imaw ku inyo nga mga hakita ag habatian.

⁵ Sugiri imaw nga nakakita eon ro mga bulag, nakatikang eon ro mga eupog, nagmayad eon ro mga aruon, nakabati eon ro mga bungoe, nabanhaw ro mga patay, ag ginawali sa mga kubos ro Mayad nga Balita.

⁶ Sugiri man imaw nga bulahan ro tawo nga owa gatalikod sa anang pagtuo kakon.”

Naghambae si Jesus Hanungod kay Juan nga Manogbawtismo

⁷ Pagkatalikod ku mga ginpaadto ni Juan nga Manogbawtismo, naghambae dayon si Jesus parti kay Juan sa kaabo nga mga tawo nga nagtilipon idto. Hambae ni Jesus, “Ano ro inyo nga ginapaabot nga makita pag-adto ninyo kay Juan idto sa *disyerto? Gapaabot baea kamo nga makakita it tawo nga owa it tinindugan pareho it tigbaw nga ginahuyop-huyop it hangin? Owa siguro no?

⁸ O basi gapaabot kamo nga makakita it tawo nga nakasuksuk it maeahaeon nga eambong? Bukon baea it sa mga palasyo gaistar ro mga nagasuksuk it maeahaeon?

⁹ Bukon abi it ro inyong gusto nga makita idto sa disyerto hay isaeang ka propeta it Dyos? Huo propeta gid imaw pero may anang katungdanan nga mas pa ku ana it propeta

¹⁰ dahil imaw ro ginahambae it Dyos sa Sagrado nga Kasueatan nga: ‘May akon nga mensahiro nga paunahon kimo agod pahaumon nana ro imong aeagyan.’ ”

¹¹ Hambae pa ni Jesus, “Matuod rang ginahambae kinyo nga owa pa it natawo iya sa ibabaw it kalibutan nga eabaw pa kay Juan nga Manogbawtismo. Pero mas pa kay Juan ro pinakakubos sa mga sinakpan it Dyos.

¹² Umpisa ku pagwali ni Juan nga Manogbawtismo hasta makaron, ro Mayad nga Balita nga puydi eon ikatapoe ro mga tawo sa mga sinakpan it Dyos hay madasig nga nagaeapta ag grabi ro epekto karon sa mga tawo. Abo nga mga tawo ro pursigido gid nga matapoe sa mga sinakpan ngaron it Dyos.

¹³ Ro tanan abi nga ginsueat ku mga propeta ag ro Kasuguan it Dyos nga ginsueat ni Moises hay nagapahayag kon ano ro matabo sa ulihi. Pag-abot ni Juan hay nag-umpisa man nga natuman ratong mga ginsueat.

¹⁴ Kon magpati kamo sa akong ihambae ngara hay maeubtan ninyo nga ro ginsueat kato ku sangka propeta nga magabalik si Elias sa ulihi hay owa napatungod kay Elias mismo kundi kay Juan 't-a.

¹⁵ Paino-inoha ninyo it mayad ro inyo ngarang habatian.”

¹⁶ Naghambae pa gid si Jesus, “Sa ano nakon ikakompara ro mga tawo sa rayang tyempo? Ano ro andang kapareho? Pareho sanda it mga unga nga mga artihan nga nagahinampang ag nagasinggit sa andang mga kahampang. Hambae nanda,

¹⁷ ‘Gintukaran namon kamo agod magsaot kamo, owa man kamo magsaot. Nagkanta kami it para sa namatyan pero owa gid kamo bisan magtangis-tangis eon lang.’

¹⁸ Ro mga tawo makarong tyempo hay pareho gid-a ku mga unga ngaron nga artihan. Ham-an abi? Tungod si Juan nga Manogbawtismo hay gapuasa ag owa gainom it bino, pero sinanda ku mga tawo hay ginsudlan imaw it demonyo.

¹⁹ Ako ma't-a nga Unga it Tawo hay gakaon ag gainom sa mga okasyon ag sinanda ku mga tawo hay ‘Haron ro sueok ag paeahilong ag nagaamigo pa sa mga manogluko nga *manogsukot it buhis ag sa ibang mga makasasaea.’ Pero di bali tungod ro kaaeam it Dyos hay mapamatud-an nga tama paagi sa matarong nga pagpangabuhi ku mga nagasunod karon.”

Ginpaandaman ni Jesus ro mga Pumueuyo it mga Banwa nga Owa Magtalikod sa Saea

²⁰ Pagkatapos kato, ginpangisgan ni Jesus ro mga pumueuyo ku mga banwa kon siin nana ginhimo ro kaeabanan nanang mga milagro tungod bisan hakita nanda rato hay owa sanda magtalikod sa andang mga saea.

²¹ Hambae nana, “Makangigidlis gid ro matabo kinyo nga mga tagaCorazin ag mga tagaBetsaida, tungod owa't-a kamo magtalikod sa inyong saea! Kon ginhimo ko't-a kunta sa Tiro ag Sidon ro mga milagro nga ginhimo ko iya kinyo hay kabuhay eo't-a sanda nga nagsuksuk it magaeas nga eambong ag nagbutang it abo sa andang ueo bilang tanda ku andang pagtalikod sa saea.

²² Ngani ginahambae ko eagi kinyo nga kon mag-abot ro adlaw it paghukom, ro pina nga inyong batunon hay mas grabi pa kaysa sa pina nga batunon ku mga tagaTiro ag Sidon.

²³ Ag kamo man nga mga tagaCapernaum, ayaw eon kamo magpaabot nga itue-og kamo sa eangit agod padunggan it Dyos dahil idto gid kamo sa impyerno itagbong agod pinahan. Kon nakakita ro mga tagaSodoma ku mga milagro nga pareho ku akon nga ginhimo inha kinyo hay sigurado nga gahinuesoe ag gatalikod sanda sa andang mga saea, ag nagatindog pa't-a ro andang syudad hasta makaron.

²⁴ Ginahambae ko eagi kinyo nga mas pa ro inyong pina nga batunon kaysa sa pina ku mga tagaSodoma kon mag-abot eon ro adlaw it paghukom.”

Si Jesus ro Nagatao it Katawhayan it Paino-ino

²⁵ Tapos, nagpangamuyo si Jesus, “Ama, Ginuo ka ku tanan sa eangit ag sa kalibutan. Ginapasaeamatan ko ikaw tungod ro mga ginlipod mo sa mga may tinun-an nga nagaeaom nga mga maaeam sanda hay ginpahayag mo't-a sa mga mapainubuson ag naila magpaturo pareho it mga unga.

²⁶ Tama gid-a ring paagi ngaron, Ama, ay suno ron sa imong plano.”

²⁷ Pagkatapos ni Jesus it pangamuyo hay naghambae pa gid imaw, “Ro tanan-tanan hay gintugyan kakon ku akon nga Ama. Owa it nakakilaea gid sa Unga mageuwas sa Ama. Owa man it nakakilaea it mayad sa akong Ama kundi ako eang nga anang Unga ag ro bisan sin-o nga gusto nakon nga pakilaeahan kana kon mauno gid imaw.”

²⁸ Naghambae dayon si Jesus, “Kamo tanan nga mga ginagaoy ag ginabug-atan ku inyong mga paeas-anon, paeapit kamo kakon ay papahuwayon ko kamo.

²⁹ Magpasakop kamo sa akong pagdumaea ag magpaturo kamo kakon, tungod mapinasensyahon ako ag mapainubuson ag magatawhay ro inyong paino-ino.

³⁰ Maeumo eang ro mga sugo nga akong ipatuman kinyo ag indi kamo karon malisdan.”