Marcos 7 - Inkeanon

Ginhambaean ni Jesus ro mga Pariseo ay Ginatuman Nanda ro Andang mga Kaugalian Imbis nga ro Kasuguan it Dyos

¹ Kaisaea kato, ginpaeapitan si Jesus it mga Pariseo ag ku mga maestro it Kasuguan nga idto naghalin sa Jerusalem.

² Hakita nanda nga ro iba ku ay Jesus nga mga sumueunod hay nagakaon eagi, bisan owa pa sanda makahimo it ritwal sa pagpalibanaw agod mangin malimpyo kuno sanda sa panueok it Dyos.

³ Ro mga Pariseo, pareho ku tanan nga mga *Judio hay owa gakaon kon owa pa sanda makahimo ku ritwal sa pagpalibanaw it alima, suno sa andang kaugalian nga ginturo kanda ku andang mga taeahaon nga mga kalolo-lolohan.

⁴ Owa man sanda gakaon eagi kon maghalin sanda sa tindahan kon owa pa sanda makahimo it ritwal sa pagpalibanaw. Abo pa ro andang mga ginahuptan it mayad ag ginasunod nga mga kaugalian, pareho it paalin ro paghugas it tasa, pitsel, ag mga saway nga mga kasirola.

⁵ Pagkakita nanda sa gin-obra ku ay Jesus nga mga sumueunod hay ginpangutana nanda imaw, “Ham-an it owa ginasunda ku imong mga sumueunod ro kaugalian nga ginturo pa ku atong mga taeahaon nga mga kalolo-lolohan? Haron, gakaon eo't-a sanda bisan mahigko pa sa mata it Dyos ro andang alima.”

⁶ Nagsabat si Jesus, “Tama gid ro hambae ni Propeta Isaias parti kinyo, nga mga ipokrito kamo. Sa ginsueat ni Isaias, naghambae ro Dyos: ‘Ginapadunggan ako ku mga tawo ngara sa andang mga ginahambae, pero maeayo ro andang buot kakon.

⁷ Owa it pueos ro andang pagsimba kakon, ay ro andang ginaturo, nga ro akon kuno nga kasuguan hay kasuguan nga gin-obra man lang it tawo.’ ”

⁸ Naghambae si Jesus, “Inyo nga gintalikdan ro kasuguan it Dyos ag ro inyo't-a nga ginahuptan it mayad hay ro mga kaugalian it tawo.

⁹ Eaom ninyo hay kamayad-mayad gid-a kamo ay owa eon ninyo ginainatuha ro kasuguan it Dyos agod eang tumanon ro inyong mga kaugalian.

¹⁰ Halimbawa, ginpasueat it Dyos kay Moises nga, ‘Tahura ro inyong mga ginikanan’ ag ‘Sintinsyahi it kamatayon ro bisan sin-o nga maghambae it maeain sa anang mga ginikanan.’

¹¹ Pero kon kinyo hay puydi nga hambaeon it unga sa anang ginikanan nga, ‘Buligan ko kunta kamo ugaling ro akon nga inogbulig kinyo hay korban, nga ro buot hambaeon hay kinapangako ko eo't-a nga ihaead sa Dyos.’

¹² Ngani owa eon dayon ninyo imaw ginasugti nga gamiton ro anang ginahambae nga korban agod ibulig sa anang mga ginikanan.

¹³ Ginabaliwala ninyo ro hambae it Dyos por dahil eang sa inyong mga kaugalian. Ag abo pa ro inyong ginaobra nga makaraya.”

¹⁴ Tapos hay ginpapaeapit ni Jesus kana ro abo nga mga tawo nga idto ag ginhambae, “Pamati kamo tanan ag eubta ro akon nga ihambae kinyo.

¹⁵ Bukon 't-a it ro ginakaon it tawo ro makapahigko kana sa mata it Dyos kundi ro maeain nga nagahalin sa anang kabubut-on.”

¹⁷ Tapos, gin-aywanan nana ro mga tawo ngato ag nagsueod sa baeay. Ginsunod man imaw idto ku anang mga sumueunod ag ginpangutana kon ano ro kahueugan ku ana ngato nga ginhambae.

¹⁸ Nagsabat imaw, “Ano? Pati baea kamo hay owa man kaeubot? Owa baea ninyo maeubti nga bisan ano ro kan-on it tawo hay indi ra makapahigko kana sa mata it Dyos?

¹⁹ Tungod gasueod eang ra sa anang tiyan ag gaguwa man dayon, owa ra nagasueod sa anang tagipusuon.” (Ro buot hambaeon kara hay puyding makaon ro tanan nga klasi it pagkaon.)

²⁰ Naghambae pa gid imaw, “Ro mga maeain nga nagahalin sa kabubut-on it tawo ro nagapahigko kana sa mata it Dyos.

²¹ Sa kabubut-on abi it tawo nagahalin ro mga maeain nga handom nga nagatueod kana nga mag-obra it maeain pareho it paghulid sa bukon it asawa, pagpanakaw, pagpatay,

²² pagpangawatan, paghinangoe, pagdumot, pagpangluko, owa it hawid-hawid nga pangueag, pagkamahisa, pagpakaeain sa anang isigkatawo, pagkabugaeon, ag pagpadungoe.

²³ Raya nga mga maeain nga buhat nga nagahalin sa tagipusuon it tawo ro nagapahigko kana sa mata it Dyos.”

Ro Pagtuo it Bayi nga Bukon it Judio

²⁴ Pagkatapos hay naghalin sanday Jesus sa lugar it Genesaret ag nag-adto sa lugar nga sakop it Tiro. Pag-abot idto hay nagdayon sanda sa sangka baeay. Owa naila si Jesus nga may makasayod nga idto imaw ugaling hasayran man gihapon ku mga tawo.

²⁵ May isaeang ka bayi nga may unga nga bayi nga ginsudlan it maeain nga espirito. Pagkabati nana nga idto si Jesus hay umadto eagi imaw idto kana. Pag-abot idto hay naghapa imaw sa atubang ni Jesus

²⁶ ag nagpakitluoy nga subueon sa anang unga ro demonyo. Bukon it Judio ro bayi ngato kundi tagaFenicia, nga sakop ku probinsya it Syria.

²⁷ Pero ginhambaean imaw ni Jesus, “Unahon ko anay it pagbulig ro mga Judio. Kon paeabyon ko abi ikaw hay matsa ginbuoe ko ro pagkaon it mga unga ag gin-itsa eang sa ayam.”

²⁸ Pero nagsabat ro bayi, “Tama ron, Ginuo, pero bisan ngani ro mga ayam hay gakaon man it mga muhmoh it mga unga nga gakahueog sa idaeom it lamisa.”

²⁹ Naghambae si Jesus, “Dahil manami ro imong sabat, uli eon ay hasuboe ko eon ro demonyo sa imong unga.”

³⁰ Nag-uli eagi ro bayi ag haabutan nana sa anda ro anang unga nga nagaeubog sa katri nga mayad eon, ay naghalin eon matuod kana ro demonyo.

Ginpamayad ni Jesus ro Isaeang ka Buyon

³¹ Pagkatapos, naghalin sanday Jesus sa lugar ngato nga sakop it Tiro. Nag-agi sanda sa Sidon ag sa mga lugar nga sakop it Napueong ka Syudad paadto sa Dagat it Galilea.

³² May mga tawo nga nagdaea kay Jesus ku andang amigo nga buyon. Nagpakitluoy sanda kay Jesus nga itungtung nana sa buyon ro anang alima agod magmayad ra.

³³ Gindaea ni Jesus ratong buyon paeayo sa abo nga tawo nga idto. Ginsutsot dayon nana ro anang tudlo sa daywang ka dueunggan ku buyon. Nagpila dayon imaw ag tapos hay ginhibo nana rato sa dila it eaki.

³⁴ Nagtangda dayon si Jesus sa eangit ag nagpanghakoe ag ginhambae nana sa inAramaic, “Effata!” Ro kahueugan kara hay “Magbukas ka.”

³⁵ Ag insigida hay nakabati ro eaki, ro anang dipekto sa paghambae hay nabuoe ag nakahambae eon imaw it mayad.

³⁶ Ginpaandaman ni Jesus ro mga tawo, “Ayaw gid kamo it sugid bisan kanyo ku inyong hakita.” Pero bisan ginpinaandaman sanda ni Jesus, nagsinugid man gihapon sanda.

³⁷ Hangawa gid sanda it duro ag naghambae sanda, “Puro gid-a mayad ro tanan nana nga gin-obra! Hamak mo, hapamayad nana ro mga uwaw ag ro mga bungoe.”