Marcos 14 - Inkeanon

Ro Plano nga Patyon si Jesus

¹ Daywang adlaw lang bago mag-abot ro Pagtililipon sa Pagdumdum ku *Pagtaliwan, ag ro Pagtililipon sa Pagdumdum ku Pagkaon it Tinapay nga Owa it Pangpaalsa. Nagainusoy ro mga pinuno it mga saserdote ag ro mga maestro it Kasuguan it paagi kon paalin nanda hidakop it patago si Jesus, agod hipapatay imaw.

² Pero hambae man nanda, “Indi naton imaw puyding dakpon sa Pagtililipon ay basi magkagulo ro mga tawo.”

Ginbu-buan it Mahumot nga Banyos ro Ueo ni Jesus

³ Pilang adlaw pa't-a bago ro mga nagkaeanabo ngaron hay nag-adto anay sanday Jesus sa Betania. Tag idto sanda sa baeay ni Simon nga dating aruon hay may sangka bayi nga nag-abot tag nagakaon sanday Jesus. Ro bayi ngato hay may daea nga pahumot nga ro sueudlan hay human sa bato nga alabastro kon tawgon. Ro pahumot ngato hay maeahaeon, ay puro gid rato ag halin sa tanom nga nardo. Ana nga ginbali ro liog it sueudlan ag ginbu-bu ro pahumot sa ueo ni Jesus.

⁴ Ro iba ku mga tawo nga idto man sa ratong baeay hay naakig pagkakita nanda ku gin-obra ku bayi. Hambae nanda sa kada isaea, “Kaumangon 't-a! Ham-an it gin-amulitan nana ro maeahaeon nga pahumot ngaron?

⁵ Kon ginbaligya't-a kunta ron hay kundi linibo ro kabakeanan nga ikatao sa mga pobre.” Ngani ginpinangisgan nanda ro bayi.

⁶ Pero ginhambaean sanda ni Jesus, “Pabay-i ninyo imaw. Ham-an it ginapamas-ot 't-a ninyo ro anang buot ay mayad ro anang gin-obra ngara kakon.

⁷ Ro mga pobre hay kaibahan 't-a ninyo permi ag kon gusto ninyo, mabuligan ninyo sanda bisan anong oras pero ako hay bukon ninyo it kaibahan permi.

⁸ Ginhimo ku bayi ngara ro anang masarangan. Ana nga ginbu-buan it pahumot ro akon nga eawas agod pahaumon sa akon nga eubong.

⁹ Matuod rang ginahambae kinyo nga bisan siin iwali sa bilog nga kalibutan ro Mayad nga Balita hay igasugid man ro gin-obra ku bayi ngara agod indi imaw malipatan.”

Nakigkunsabo si Judas sa mga Pinuno it mga Saserdote nga Traiduron si Jesus

¹⁰ Pagkatapos hay nagpanaw si Judas Iscariote nga sambilog sa doseng ka sumueunod ni Jesus. Nag-adto imaw sa mga pinuno it mga saserdote agod makigkunsabo kon paalin nana buligan sanda nga hidakop si Jesus.

¹¹ Nalipay gid sanda sa ginhambae ni Judas ag ginpromisahan nanda imaw nga taw-an it kwarta. Ngani nagbinantay si Judas it tama nga kahigayunan agod ikapadakop nana si Jesus.

Ginpasayod ni Jesus nga Sambilog sa mga Anang Sumueunod ro Magatraidor Kana

¹² Primero eon dato nga adlaw it Pagtililipon sa Pagdumdum ku Pagkaon it Tinapay nga Owa it Pangpaalsa. Ruyon ro adlaw nga ginapatay nanda ro tiyo it karnero para sa ihapon sa Pagdumdum ku *Pagtaliwan. Ku adlaw ngaron, ginpangutana si Jesus ku anang mga sumueunod, “Siin mo gusto nga pahaumon namon ro tanan nga kinahangean nimo para sa aton nga ihapon makaron nga Pagdumdum ku *Pagtaliwan?”

¹³ Ginsugo dayon ni Jesus ro daywa ku anang mga sumueunod, “Adto kamo sa syudad. May inyo idto nga hisubeang nga eaki nga may daea nga sangka banga nga tubi. Sunda ninyo imaw

¹⁴ hasta sa baeay nga sudlan nana. Hambaea rayon ninyo ro tagbaeay nga ginapapangutana maton it maestro kon siin ro kwarto nga puydi nanda gamiton kon mag-ihapon sanda ku anang mga sumueunod makaron nga Pagdumdum ku *Pagtaliwan?

¹⁵ Daehon rayon kamo it tagbaeay sa ibabaw. May idto nga mabahoe nga kwarto nga una eon ro tanan natong kinahangeanon. Pahauma ninyo idto ro aton nga ihapon.”

¹⁶ Nagpanaw dayon sa syudad ro daywang ka sumueunod. Hapamatud-an nanda nga matuod ro mga ginhambae ngato ni Jesus ag nagpahaom dayon sanda ku tanan nandang kinahangeanon para sa andang ihapon sa Pagdumdum ku *Pagtaliwan.

¹⁷ Tag gabii eon hay nag-adto sa syudad si Jesus kaibahan ro anang dose nga ka sumueunod, ag nagdiritso sanda idto sa kwarto nga ginpahaom para kanda.

¹⁸ Tag nagakaon eon sanda hay naghambae si Jesus, “Matuod rang ginahambae kinyo nga sambilog kinyo ro magatraidor kakon, ag kaibahan ko imaw nga nagakaon iya makaron.”

¹⁹ Nasubo gid ro mga sumueunod ni Jesus sa anang ginhambae. Kada isaea kanda hay naghambae kay Jesus, “Bukon 't-a it ako, no?”

²⁰ Naghambae si Jesus, “Ro magatraidor kakon hay sambilog kinyo nga dose nga nagasawsaw ku anang tinapay sa maeukong nga akon man nga ginasawsawan.

²¹ Magataliwan eon ako nga Unga it Tawo suno sa nasueat sa Sagrado nga Kasueatan. Pero makaeueuoy ro magatraidor kakon, ay makangingidlis gid ro matabo kana sa ulihi. Mas mayad pa nga owa eon lang imaw matawo sa rayang kalibutan.”

Ro Ihapon nga Mangin Padumdum ku Kamatayon ni Jesus

²² Samtang nagakaon sanda, nagbuoe it tinapay si Jesus, ginpasaeamatan ra nana sa Dyos, ginpihak-pihak ag gintao sa anang mga sumueunod. Naghambae imaw, “Raya ro akon nga eawas. Kan-a ninyo.”

²³ Nagbuoe man dayon imaw it kopa nga may bino ag ginpasaeamatan man ra nana sa Dyos. Gintao nana ra sa anang mga sumueunod ag tanan sanda hay nag-inom kara.

²⁴ Naghambae imaw, “Raya ro akon nga dugo nga gapalig-on ku bag-o nga kasugtanan nga gintao it Dyos sa tawo. Igauea ra por dahil sa abo nga mga tawo.”

²⁵ Naghambae pa si Jesus, “Matuod rang ginahambae kinyo nga halin makaron, indi eon gid ako mag-inom it bino hasta indi mag-abot ro oras nga kaibahan ko ro tanan nga mga sinakpan it Dyos, ag bag-o eon ro tanan.”

²⁶ Pagkatapos ni Jesus it hambae hay nagkanta sanda it pagdayaw sa Dyos, ag nagpanaw dayon sanda paagto sa Bukid it Olibo.

Ginhambae Eagi ni Jesus nga Ipanghiwaea Imaw ni Pedro

²⁷ Samtang nagapanaw sanda hay naghambae kanda si Jesus, “Makaron nga gabii, kamo tanan hay magatalikod kakon ag aywanan ninyo ako. Ruyon ro katumanan ku ginsueat sa Sagrado nga Kasueatan nga, ‘Patyon ko ro manogbantay it mga karnero ag magakaealhit ro mga karnero.’

²⁸ Pero pagkabanhaw kakon it Dyos hay mauna ako kinyo idto sa Galilea.”

²⁹ Naghambae dayon si Pedro, “Ginuo, indi ko ikaw pagtalikdan bisan talikdan ka nanda tanan.”

³⁰ Ginsabat imaw ni Jesus, “Matuod rang ginahambae kimo, Pedro, nga sa rayang gabii, bago magpamaeo ro manok it ikaywa hay tatlong beses mo man nga igapanghiwaea nga kilaea mo ako.”

³¹ Pero nagsabat gihapon si Pedro, “Indi gid ron matabo, Ginuo! Bisan mamatay pa ako kaibahan nimo, indi ko gid ikaw igpanghiwaea.” Imaw man ron ro ginhambae ku iba nga mga sumueunod.

Nagpangamuyo si Jesus sa Getsemani

³² Pag-abot nanday Jesus sa lugar nga ginatawag nga Getsemani hay naghambae imaw sa anang mga sumueunod, “Pungko eang anay kamo dikara ay mangamuyo pa ako.”

³³ Gindaea nana sanday Pedro, Santiago ag Juan sa unahan. Nakabatyag dayon si Jesus it kangidlis ag indi imaw himayang.

³⁴ Naghambae imaw sa tatlo, “Matsa mamatay gid ako sa grabi nga kasubo. Iya eang kamo rikara ag ayaw kamo it tueog.”

³⁵ Nag-adto si Jesus sa may ueu-unahan, naghapa ag nagpangamuyo sa Dyos nga kon mahimo kunta hay pataliwanon lang kana ro kasakit nga gintigana kana.

³⁶ Hambae ni Jesus, “Ama, owa it imposible kimo. Kon mahimo hay indi mo lang ako pagpaagihon sa grabi nga kasakit nga akon nga aeatubadngon. Pero bukon it akon nga pagbuot ro dapat matuman kundi ro imo.”

³⁷ Pagkatapos hay nagbalik imaw sa tatlo ag haabutan nana sanda nga nagakatueog. Ginpukaw nana sanda ag naghambae dayon imaw kay Pedro, “Simon, ham-an it nagakinatueog ka't-ing? Indi ka eon makatakod nga indi magkatueog bisan sang oras eang ay?

³⁸ Magbantay kamo ag magpangamuyo nga indi kamo matentar. Naila kunta kamo maghimo it tama pero ro inyong kinaiya bilang tawo hay indi kasarang nga maghimo karon.”

³⁹ Bumalik eon man imaw sa ueu-unahan ag nagpangamuyo, ag imaw man gihapon ro anang pangamuyo sa anang Ama.

⁴⁰ Bumalik eon man imaw sa anang mga sumueunod ag haabutan nana nga nagakatueog gihapon sanda, ay matsa ginasuyop gid ro andang mga mata sa kadueuygon. Owa sanda it ikabangdanan kay Jesus.

⁴¹ Inaywan sanda it uman ni Jesus. Pagbalik nana hay naghambae imaw, “Gapinahuway ag gakinatueog gihapon kamo? Abi, tama eon don. Nag-abot eon do oras nga ako nga Unga it Tawo hay ipadakop ag itugyan sa alima it mga makasasaea.

⁴² Bangon eon kamo. Mapanaw eon kita. Hayra eon ro nagatraidor kakon.”

Gintraidor ag Gindakop si Jesus

⁴³ Owa pa katapos it hambae si Jesus hay nag-abot si Judas nga isaea sa dose nana nga ka sumueunod. Kaibahan nana ro kaabong mga tawo nga may mga daeang daga ag bakulo. Ro mga tawo ngato hay ginsugo ku mga pinuno it mga saserdote, mga maestro it Kasuguan ag ku kaibahan nandang mga lider, agod dakpon si Jesus.

⁴⁴ Ginhambaean eagi ni Judas ro anang mga kaibahan ngato kon paalin nanda makilaea ro andang daeakpon. Hambae ni Judas, “Ro tawo nga akong haruan hay ruyon ro inyong daeakpon. Dakpa eagi ninyo imaw ag pagwardyahi gid ninyo it mayad pagdaea ninyo kana.”

⁴⁵ Nagdiritso eagi si Judas kay Jesus ag naghambae, “Maestro!” Ag ana ra dayon nga ginharuan.

⁴⁶ Dinakop ag pinuko eagi ku mga tawo si Jesus.

⁴⁷ Pero sambilog sa mga idto nga nagatindog maeapit kay Jesus hay gumabot ku anang daga, ag linabo ro ulipon it pinakapinuno nga saserdote. Nautas gid ro dueunggan ku ulipon ngato.

⁴⁸ Ginhambae dayon ni Jesus ro mga tawo ngato, “Ano ay? Matsa rebelde't-a ako nga nagdaea pa kamo it daga ag bakulo sa pagdakop kakon!

⁴⁹ Adlaw-adlaw hay idto ako kinyo sa Templo nga nagaturo pero owa ninyo ako kato pagdakpa. Pero natabo ra agod ro ginsueat sa Sagrado nga Kasueatan hay matuman.”

⁵⁰ Pagkahambae karon ni Jesus hay nagpaeagiw dayon tanan ro anang mga sumueunod ag inaywan imaw.

⁵¹ May isaeang ka eaki nga nakatapis eang nga nagasunod tag gindaea ku mga tawo si Jesus.

⁵² Ginadakop man kunta imaw ra it mga tawo ugaling nanginpadlos imaw. Napaeos ro anang tapis pagpanginpadlos nana ngani nakauba imaw pagpaeagiw nana.

Gin-imbistigar si Jesus sa Atubang it *Sanedrin

⁵³ Gindaea si Jesus sa palasyo it pinakapinuno nga saserdote. Nagtililipon idto ro mga pinuno it mga saserdote, ro mga maestro it Kasuguan, ag ro kaibahan nandang mga lider.

⁵⁴ Nagsunod man si Pedro, pero idto imaw sa maeayo-eayo. Pag-abot nana idto, nagsaylo imaw sa *lagwirta it palasyo, ag pumungko kaibahan it mga gwardya nga nagapainit-init maeapit sa kaeayo.

⁵⁵ Nagtinguha ro mga pinuno it mga saserdote ag ro tanan nandang kaibahan sa *Sanedrin nga makatipon it mato-mato nga ebidensya kuntra kay Jesus, agod masintinsyahan imaw it kamatayon, pero owa gid sanda it ebidensya nga magamit.

⁵⁶ Owa gid sanda it magamit dahil bisan abo ro nagtestigo it pinuril kuntra kay Jesus, ro andang mga sugid hay owa nagsilinanto.

⁵⁷ Pagkatapos, may mga nagtestigo pa gid it pinuril kuntra kay Jesus nga naghambae,

⁵⁸ “Nakabati gid kami nga naghambae imaw nga waskon ko mana rayang Templo nga ginpatindog it tawo. Ag sa sueod it tatlong adlaw mana hay mapatindog ako it bag-o nga Templo nga bukon it mga tawo ro nag-obra.”

⁵⁹ Pero owa gihapon nagsilinanto ro andang mga sugid.

⁶⁰ Tumindog dayon sa tunga ro pinakapinuno nga saserdote ag ginpangutana si Jesus, “Owa ka gid baea it ikasabat sa ginaakusar ngaron kimo?”

⁶¹ Pero owa magsabat si Jesus. Pinangutana eon man imaw it pinakapinuno nga saserdote, “Ikaw baea ro *Kristo nga ginpromisa it Dyos? Ikaw baea ro Unga it daeayawon nga Dyos?”

⁶² Nagsabat si Jesus, “Huo, ako. Sa ulihi hay hikita ninyo ako nga Unga it Tawo nga nagapungko sa pinakadungganon nga pwesto sa tuo it Makagagahom nga Dyos. Hikita man ninyo ako sa daeaura sa akong pagbalik sa kalibutan.”

⁶³ Pagkabati karon ku pinakapinuno nga saserdote hay gin-gisi nana ro anang eambong sa anang kaakig. Naghambae imaw, “Ham-an it mausoy pa abi kita it iba pang testigo?

⁶⁴ Habatian man ninyo nga ginatupungan eo't-a nana ro Dyos. Ano ro inyong sintinsya?” Ngani ginsintinsyahan nanda tanan si Jesus it kamatayon.

⁶⁵ Ginpil-an dayon ku iba kanda si Jesus. Gintabunan man ku iba kanda ro anang mga mata ag gintueop imaw. Sinanda dayon, “Tugmaha abi kon sin-o ro nagtueop kimo.” Bisan ro mga gwardya nga gintugyanan kana hay nagtinueop man kana.

Ginpanghiwaea ni Pedro nga Kilaea Nana si Jesus

⁶⁶ Tag idto pa si Pedro sa *lagwirta it palasyo, may nag-abot idto nga bayi nga sueuguon ku pinakapinuno nga saserdote.

⁶⁷ Pagkakita nana kay Pedro nga nagapainit-init sa may kaeayo hay gintinueok ra nana ag ginhambae, “Kaibahan ka man ni Jesus nga tagaNazaret.”

⁶⁸ Pero nagbalibad 't-a si Pedro. Nagsabat imaw, “Bukon a. Owa't-ang kasayod ku imong ginahinambae ngaron. Owa't-ang kaeubot karon.” Ag naghalin eagi imaw ag umadto sa may aeagyan paguwa. Nagpamaeo dayon ro manok.

⁶⁹ Hakita eon man imaw idto ku ratong bayi nga sueuguon. Ginhambae nana sa mga nagaistambay idto, “Isaea man raya ngara sa mga sumueunod ku tawo ngato.”

⁷⁰ Pero nagbalibad eon man si Pedro. Maangan-angan, ginhambae it mga nagaistambay si Pedro, “Sigurado gid nga kaibahan ka nanda ay tagaGalilea ka gid.”

⁷¹ Pero nagsabat si Pedro, “Sumpa ko man, bisan maldisyunon pa ako it Dyos, owa gid-ang kakilaea ku haning tawo ngaron nga inyong ginahambae.”

⁷² Pagkahambae kara ni Pedro hay nagpamaeo eon man ro manok. Hadumduman dayon ni Pedro ro hambae ni Jesus, “Bago ro manok magpamaeo it ikaywa hay tatlong beses mo nga ipanghiwaea nga kilaea mo ako.” Owa gid ni Pedro mapugngi ro anang baeatyagon ag nagtinangis imaw.