Marcos 11 - Inkeanon

Gindayaw si Jesus ku mga Tawo Pag-abot Nana sa Jerusalem

¹ Tag maeapit eon sanday Jesus sa Jerusalem, ag nakaabot eon sanda sa Bukid it Olibo, nga maeapit sa daywang ka baryo nga Betfage ag Betania hay ana dayon nga ginpauna ro daywa sa anang mga sumueunod.

² Ginbilinan nana sanda, “Una kamo idto sa baryo sa unahan. Pag-abot ninyo idto hay may makita eagi kamo nga nakahigot nga tiyo it asno. Owa pa gid ron hisakyi. Hubara ninyo ag daehon iya kakon.

³ Kon may magpangutana ngani kinyo kon ham-an it ginahubad ninyo ron hay sabta nga ginadapatan maton it Ginuo ag ibalik man eagi.”

⁴ Ngani nagpanaw ro daywa ag pag-abot nanda sa baryo hay nakakita sanda idto it tiyo it asno nga nakahigot sa may pwertahan it baeay nga maeapit sa daean. Tag ginahubad ra nanda,

⁵ may mga nagatilindog idto nga nagpangutana kanda, “Ham-an it ginahubad 't-a ninyo ron?”

⁶ Ginsabat nanda ro mga nagpangutana kon ano ro bilin kanda ni Jesus nga isabat. Ginsugtan dayon sanda ku mga tawo ngato nga daehon ro asno.

⁷ Gindaea nanda rato kay Jesus ag ginhapinan ku andang pangsanib ro likod ku asno. Nagsakay dayon si Jesus.

⁸ Abo sa mga tawo ngato nga nagasueunod kana hay naghapead ku andang mga pangsanib sa anang aeagyan bilang pagpadungog kana. Ro iba ma't-a hay nagbutang it mga maintok nga sanga it kahoy nga andang gin-utod sa binit it daean.

⁹ Ro mga tawo nga nagauna kay Jesus ag ro mga nagasunod hay nagasilinggit. Sinanda, “Dayawon ta ro Dyos! Daeayawon raya nga ginpadaea iya it Ginuong Dyos!

¹⁰ Daeayawon rayang magahari pareho sa paghari kato anay ni Haring David! Dayawon ro Dyos sa pinakamataas nga kaeangitan!”

¹¹ Pag-abot ni Jesus sa Jerusalem, nagsueod imaw sa Templo ag gintan-aw kon gaalin ro mga tawo idto. Pero tungod nga madali lang matunod ro adlaw hay nagguwa lang imaw ag nag-agto sanda ku anang doseng ka sumueunod sa Betania.

Ginmaldesyon ni Jesus ro Sangka Kahoy nga Higera

¹² Pagkaagahon, tag gapahalin eon sanda sa Betania paadto sa Jerusalem hay nakabatyag it gutom si Jesus.

¹³ Nakakita imaw sa unahan it kahoy nga higera nga magabong gid ro dahon. Ginpaeapitan nana ra ag gintan-aw kon may bunga nga sarang makaon. Pero owa gid ay bukon pa man it tigbueunga ku rato nga kahoy.

¹⁴ Ngani hinambaean nana ro kahoy ngato, “Umpisa makaron, indi ka eon magpamunga maskin hin-uno!” Nabatian ku anang mga sumueunod ro ana ngatong ginhambae.

Ginpangsuboe ni Jesus ro mga Negosyante sa Guwa it Templo

¹⁵ Pag-abot nanda sa Jerusalem hay nag-adto si Jesus sa *lagwirta it Templo ag ginpangsuboe ro mga tawo nga idto nagabaligya it mga sapat nga pangsakripisyo. Ana man nga ginpangsuboe pati ro mga nagabakae ku mga sapat ngato. Ginpangbaliskad man nana ro mga lamisa it mga nagabaylo it kwarta, pati ro mga pungkuan it mga nagabaligya it salampati.

¹⁶ Ginbawae man nana sa mga tawo nga magpangeaktod sa Templo kon may dinaea.

¹⁷ Tapos, nagturo imaw sa mga tawo. Hambae nana, “Bukon abi it naghambae ro Dyos sa Sagrado nga Kasueatan nga ‘Ro akong baeay hay tawgon nga baeay nga paeangamuyuan ku tanan nga mga rasa it tawo?’ ” Pero inyo ra nga gin-obra nga paeanaguan it mga buyong!

¹⁸ Pagkasayod ku mga pinuno it mga saserdote ag ku mga maestro it Kasuguan ku gin-obra ni Jesus hay nag-usoy sanda it ideya kon paalin nanda imaw hipatay, ay nahadlok sanda kana. Nahadlok sanda kay Jesus ay hangawa gid ro tanan nga mga tawo sa ana nga mga ginaturo.

¹⁹ Tag madali lang matunod ro adlaw hay naghalin sa syudad sanday Jesus.

Dapat nga Malig-on ro atong Pagtuo ag Owa Kita it Eain it Buot sa atong Isigkatawo kon Magpangamuyo Kita

²⁰ Pagkaagahon, tag nagapabalik sanday Jesus sa Jerusalem hay haagyan nanda ro kahoy nga higera nga ginmaldesyon nana. Hakita nanda nga eaay gid-a rato, pati ro gamot.

²¹ Hadumduman ni Pedro ro ginhambae ni Jesus sa kahoy ag naghambae imaw, “Maestro, tan-awa tuo, ro kahoy nga imong ginmaldesyon hay eaay gid-a.”

²² Nagsabat si Jesus, “Magsalig kamo sa Dyos.

²³ Matuod rang ginahambae kinyo nga kon nagasalig kamo sa Dyos, puydi ninyo nga suguon rayang bukid nga maghalin ag magsaylo sa dagat, ag kon owa kamo gaduda hay matabo gid ron. Bisan ano ro inyong ihambae hay matabo kon nagasalig kamo.

²⁴ Ngani, ginahambae ko kinyo nga kon magpangamuyo kamo ag magpangayo it bisan ano, patihi gid it hugot nga mabaton ninyo ron nga matsa habaton eo't-a ninyo, ag mabaton gid matuod ninyo ron.

²⁵ Pero kon magpangamuyo kamo, kon may eain kamo it buot sa inyong isigkatawo, patawara sanda agod patawaron man kamo ku inyong Ama sa eangit sa inyong mga saea.”

Gin-usisa si Jesus kon Sin-o Kana ro Nagtao it Otoridad

²⁷ Nag-abot sanda sa Jerusalem ag nag-agto si Jesus it uman sa Templo. Tag nagalibot-libot imaw sa *lagwirta it Templo, ginpaeapitan dayon imaw ku mga pinuno it mga saserdote, mga maestro it Kasuguan ag ku kaibahan nandang mga lider.

²⁸ Ginpangutana nanda imaw, “Ano ring otoridad nga obrahon ro imong mga ginaobra iya sa Templo? Sin-o kimo ro nagtao ku otoridad ngaron?”

²⁹ Nagsabat si Jesus, “Kon sabton ninyo ro akong pangutana ngara, sabton ko man kamo.

³⁰ Sin-o ro nagtao kay Juan it otoridad nga magpangbawtismo? Ro Dyos baea o tawo? Abi, sabta ninyo ako.”

³¹ Nagpaeangutan-an dayon sanda nga mahinay ro andang limog. Sinanda, “Ano ro atong isabat kana? Kon hambaeon naton nga ro Dyos ro nagtao it otoridad kay Juan, ana man kita nga kutan-on kon ham-an it owa kita nagpati kay Juan.

³² Pero kon hambaeon man naton nga halin eang sa tawo ro otoridad ni Juan, delikado.” Ruyon sinanda ay nahadlok sanda sa mga tawo, ay gapati ro tanan nga tawo nga propeta gid si Juan.

³³ Ngani ginsabat nanda si Jesus, “Tao ngani, owa kami kasayod.” Nagsabat man si Jesus, “Kon mawron hay indi ko man kamo pagsabton kon sin-o ro nagtao kakon it otoridad nga obrahon ro akong ginaobra.”