Lucas 9 - Inkeanon

Ginpapanaw ni Jesus ro Anang Dose nga ka Sumueunod Agod Magwali ag Magpangmayad

¹ Kaisaea kato, ginpatipon ni Jesus ro dose nanang ka mga sumueunod ag gintaw-an nana sanda it otoridad ag gahom nga magpangsuboe it tanan nga demonyo ag magpamayad it mga baeatian.

² Ana dayon sanda nga ginpapanaw agod magwali parti sa paghari it Dyos sa anang mga sinakpan ag magpamayad it mga masakiton.

³ Nagbilin man imaw kanda. Hambae nana, “Ayaw kamo it daea it bisan ano kon magpanaw kamo, bisan baston o bag. Ayaw man kamo it baeon it pagkaon o kwarta o bisan ilislan.

⁴ Kon ginabaton kamo sa sangka baeay, idto eang kamo magdayon hasta nga maghalin eon kamo sa lugar ngaron.

⁵ Kon may hiadtunan kamo nga banwa nga indi magbaton kinyo ro mga pumueuyo, aywani sanda. Ag kon maghalin kamo sa banwa ngaron hay pagpaga ro tapu-tapu sa inyong mga siki bilang tanda nga, sa mata it Dyos hay pareho sanda it mga tawo nga owa nagakilaea kana.”

⁶ Nagpanaw dayon ro mga sumueunod sa mga kabaryuhan ag nagwali ku Mayad nga Balita ag nagpamayad it mga masakiton bisan siin sanda mag-adto.

Naglitik ro Ueo ni Herodes

⁷ Owa mabuhayi hay habatian ni Herodes nga gobernador it Galilea ro tanan ngarang ginpang-obra ni Jesus ag naglitik ro anang ueo ay gahinambae ro iba nga nabanhaw 't-a kuno si Juan nga Manogbawtismo.

⁸ Ginahambae man ku iba nga rayang si Jesus hay tag propeta anay kuno nga si Elias nga nagbalik. Ag ro hambae pa gid ku iba hay sambilog kuno imaw ra sa mga propeta kato anay nga nabanhaw.

⁹ Naghambae si Herodes, “Ginpapugutan ko it ueo si Juan nga Manogbawtismo pero sin-o raya ngara nga abo eo't-a ro akong habatian parti kana?” Ngani gusto gid ni Herodes nga makita si Jesus.

Ginpakaon ni Jesus ro Sobrang Limang Libo Paagi sa Anang Gahom

¹⁰ Pagbalik ku mga apostoles halin sa andang panaw, ginsugid nanda kay Jesus ro andang gin-obra. Gindaea dayon nana sanda sa lugar nga maeapit sa banwa it Betsaida agod sanda-sanda eang idto.

¹¹ Pero kaabo nga mga tawo ro nakasayod nga nagpanaw sanday Jesus ag nag-aeapas 't-a sanda. Pag-abot nanda kon siin sanday Jesus hay gin-abi-abi nana sanda ag ginsinugiran parti sa paghari it Dyos ag ana nga ginpamayad ro mga nagamasakit.

¹² Tag hapon eon hay nagpaeapit kay Jesus ro anang doseng ka apostoles ag naghambae, “Mayad siguro nga papanawon eon naton ro kaabo ngara nga mga tawo idto sa mga baeay sa kaumahan ag sa kabaryuhan sa libot, agod makabakae sanda it pagkaon ag makakita sanda it madayunan ay owa it kabaeayan sa lugar ngara.”

¹³ Pero nagsabat kanda si Jesus, “Kamo mismo ro magtao kanda it pagkaon.” Nagsabat sanda, “Limang ka tinapay ag daywang ka isda gid lang ro pagkaon ngara iya, mageuwas eang abi ron kon magpanaw kami ag magbakae it pagkaon para sa kaabo-abo ngarang tawo.”

¹⁴ Ginhambae nanda ron ay mga limang libong ka eaki ro idto. Ginsugo ni Jesus ro anang mga sumueunod, “Papungkua ninyo ro mga tawo sa hilamunon it mga tig 50 ro kada grupo.”

¹⁵ Gintuman nanda si Jesus ag nagpungko dayon ro tanan nga mga tawo.

¹⁶ Tapos, ginbuoe ni Jesus ro limang ka tinapay ag daywang ka isda. Nagtangda imaw sa eangit ag nagpasaeamat sa Dyos. Ginpihak-pihak dayon nana ro mga tinapay ag isda ngato ag gintao sa anang mga sumueunod agod ikapanueupod sa kaabo ngato nga mga tawo.

¹⁷ Nagkaon sanda tanan hasta nagkaeabusog. Pagkatapos hay gintipon ku mga sumueunod ro mga habilin nga tinapay ag isda ag nakatipon sanda it dose ka kaing.

Ginpahayag ni Pedro nga si Jesus ro Maneueuwas nga Ginpromisa it Dyos

¹⁸ Isaeang adlaw nga nagpangamuyo nga isaeanhon si Jesus, idto ro anang mga sumueunod sa ueu-unahan. Pagkatapos nana it pangamuyo, ginpangutana nana sanda, “Sin-o kuno ako kon sa mga tawo?”

¹⁹ Nagsabat sanda, “May gahambae nga si Juan nga Manogbawtismo ka kuno. Kon sa iba ma't-a, ikaw kuno hay kat si Elias anay. Sa iba pa gid hay may nabanhaw nga isaea sa mga propeta man kato anay.”

²⁰ Ginpangutana nana sanda, “Hay kon kinyo, sin-o ako?” Nagsabat si Pedro, “Ikaw ro Maneueuwas nga ginpromisa it Dyos.”

²¹ Ginbilinan gid sanda ni Jesus nga indi rato igsugid bisan kanyo.

²² Naghambae pa gid imaw, “Ako nga Unga it Tawo hay dapat gid nga mag-antos it abo nga kalisod ag indi pagpatihon ku mga pinuno it mga saserdote, mga maestro it Kasuguan ag ku kaibahan nandang mga lider. Pagapatyon ako pero banhawon man dayon pagkatatlong adlaw.”

Dapat Haom Kita nga Mag-antos it Kalisod ag Bisan Mamatay Dahil sa Pagsunod kay Jesus

²³ Tapos, naghambae si Jesus sa tanan nga nagapaeamati kana, “Kon sin-o ro naila nga mangin sumueunod nakon hay dapat nga talikdan nana ro anang kaugalingon nga mga handom ag gusto, ag dapat nga haom imaw nga mag-antos bisan pa mag-atubang imaw it paghingabot ag kamatayon por dahil sa anang pagsunod kakon.

²⁴ Ro bisan sin-o nga naila nga magsunod sa ana eang nga gusto sa anang kabuhi hay mamatay man gihapon ag pinahan sa impyerno. Pero ro bisan sin-o nga magsakripisyo ku anang gusto agod sundon ro akong pagbuot hay makabaton it kabuhi nga owa it katapusan.

²⁵ Ano pa abi ro pueos kon mangin ana it tawo ro tanan nga iya sa kalibutan, kon ro kabaylo man karon hay pinahan imaw sa impyerno hasta sa owa it katapusan?

²⁶ Kon ikahuya ninyo ako ag isikway ro akong ginaturo, isikway ko man kamo kon magbalik Ako nga Unga it Tawo. Sa akon nga pagbalik iya sa kalibutan hay may akon nga grabi nga kasilaw ku akon nga Ama ag ku anang mga balaan nga anghel.

²⁷ Matuod rang ginahambae kinyo nga may iya kinyo nga indi gid mamatay hasta indi nanda makita ro paghari it Dyos sa anang mga sinakpan.”

Nag-iba ro Itsura ni Jesus

²⁸ Pagkataliwan it mga waeong adlaw nga ginhambae ra ni Jesus, nagsaka imaw sa bukid agod magpangamuyo. Gindaea nana sanday Pedro, Juan ag Santiago.

²⁹ Tag nagapangamuyo si Jesus hay nag-iba ro itsura ku anang uyahon. Ro anang eambong hay nangin kaputi-puti ag kasilaw-silaw.

³⁰ Ag gulpi eang dayon nga may daywang ka tawo nga nagpakita nga nagapakighambae kana. Ro daywa ngato hay sanday Moises ag Elias.

³¹ Kasilaw-silaw gid-a sandang daywa. Nagaistorya sanda kay Jesus parti sa anang kamatayon nga idto matabo sa Jerusalem sa indi magbuhay agod tumanon ro kabubut-on it Dyos.

³² Hamuok gid ro tueog ni Pedro ag ku anang mga kaibahan pero habugtaw sanda it gulpi. Hakita nanda nga kasilaw-silaw si Jesus pati man ro daywa nga kaibahan nanang nagatindog.

³³ Tag nagabueag eon kay Jesus ratong daywa, naghambae si Pedro kay Jesus, “Sir, mayad ngani ay iya kami. Mayad siguro maobra kami it tatlong ka panilungan. Sambilog para kimo, sambilog para kay Moises ag sambilog man para kay Elias.” Matsa owa sa paino-ino ni Pedro ro ana ngatong ginhambae.

³⁴ Tag nagahambae pa imaw, gintabunan sanda it daeaura ngani hinadlukan sanday Pedro.

³⁵ Ag may limog dayon nga naghambae halin sa daeaura, “Daya ro akong unga. Imaw ro akong pinili. Pamati kamo kana it mayad.”

³⁶ Pagkatapos it ratong hambae, owa eon dayon sanda it ibang hakita kundi si Jesus eang. Owa gid sanda it ginsugiran ku anda ngatong hakita hasta nga owa pa nabanhaw si Jesus.

Ginpamayad ni Jesus ro Sangka Unga nga Ginsudlan it Maeain nga Espirito

³⁷ Pagkaaga kato, pagkapanaog ni Jesus ag ku anang tatlong ka sumueunod halin sa bukid, kaabo-abo nga mga tawo ro nagsueang-sueang kana.

³⁸ Tapos, sambilog sa mga tawo idto hay nagtawag kay Jesus ag naghambae, “Maestro, kaeuy-i man ro akong unga nga eaki! Bugtong ko man lang imaw ra nga unga.

³⁹ Permi imaw nga ginaatake it maeain nga espirito ag gulpi eang dayon imaw nga nagasiyagit ag ginapawaeas imaw ag nagabuea ro anang ba-ba. Haeos indi imaw pag-aywanan ku maeain nga espirito ag mat binakoe eon dayon ro anang eawas.

⁴⁰ Nagpakitluoy ako sa imong mga sumueunod nga subueon nanda ro maeain nga espirito sa eawas ku akon nga unga pero indi nanda masarangan.”

⁴¹ Naghambae si Jesus, “Abi gid-a ro mga tawo ngara makaron. Owa pa't-a gihapon kamo nagatuo kakon ag mga balingahag gid-a kamo it paino-ino! Hasta hin-uno pa't-a ako mag-iba kinyo bago kamo magtuo kakon? Hasta hin-uno pa't-a ako magtiniis kinyo?” Ginhambae dayon nana ro tatay ku unga, “Abi, daeha ro imong unga iya kakon.”

⁴² Tag nagapaeapit kay Jesus ro unga, ginpatumba ra it demonyo ag ginpawaeas. Pero ginsugo ni Jesus ro maeain nga espirito ngato nga magguwa sa unga. Pagkatapos, nagmayad eon dayon ro unga ag gin-intrigar ra ni Jesus sa anang tatay.

⁴³ Ag tanan nga mga tawo idto hay hangawa gid sa pwerti nga gahom it Dyos. Ag samtang nagakinaguea pa ro mga tawo sa tanan nga ginahimo ni Jesus, naghambae imaw sa anang mga sumueunod,

Nagsugid it Uman si Jesus Hanungod sa Anang Pag-antos, Kamatayon ag Pagkabanhaw

⁴⁴ “Tamnan gid sa inyong paino-ino ro ihambae ko ngara. Ako nga Unga it Tawo hay traiduron ag itugyan sa mga manogdumaea.”

⁴⁵ Pero owa sanda kaeubot ku ginhambae ngato ni Jesus tungod ginlipod rato kanda agod indi nanda maeubtan. Natahap man sanda magpangutana kon ano ro kahueugan kato.

Ro Pinakamapainubuson ro Importanti sa Mata it Dyos

⁴⁶ Ku ulihi, nagbinais ro mga sumueunod ni Jesus kon sin-o gid kanda ro pinakaimportanti.

⁴⁷ Hasayran ni Jesus ro una sa andang paino-ino. Ngani ginhakwat nana ro sangka unga ag ginpatindog sa anang euyo.

⁴⁸ Naghambae dayon imaw, “Ro bisan sin-o nga nagadipara sa nagatuo kakon nga mapainubuson pareho ku unga ngara hay ako gid-a ro anang ginadipara. Ag ro bisan sin-o nga nagahimo karon kakon hay ana man nga ginahimo ron sa Dyos nga nagpadaea kakon. Ngani kon sin-o ro pinakamapainubuson kinyo tanan hay imaw 't-a ro importanti.”

Kon Sin-o ro Owa Nagakuntra kay Jesus hay Kaibahan Nana

⁴⁹ Tapos, naghambae si Juan, “Sir, nakakita kami it tawo nga nagagamit ku imong ngaean sa pagsuboe it mga demonyo. Ginbawaean 't-a namon imaw ay bukon man abi naton imaw it kaibahan.”

⁵⁰ Pero nagsabat si Jesus, “Ayaw ninyo imaw pagbawaei tungod ro owa nagakuntra kinyo hay kaapin ninyo.”

Ginbalibaran Sanday Jesus sa Sangka Baryo it mga *Samaritano

⁵¹ Tag madali lang mag-abot ro adlaw nga magakayab si Jesus sa eangit, nagdesidir imaw nga mag-adto sa Jerusalem.

⁵² May ginpauna imaw idto sa sangka baryo it mga *Samaritano agod mag-usoy it andang madayunan.

⁵³ Pero indi magbaton idto ro mga tawo kay Jesus ay sa Jerusalem imaw nagapaadto.

⁵⁴ Pagkasayod ku anang daywang ka sumueunod nga sanday Santiago ag Juan nga indi kanda magbaton ro mga tawo, ginhambae nanda si Jesus, “Hay ano, Ginuo, paueanan namon sanda it kaeayo halin sa eangit agod magkaeatugbang sanda?”

⁵⁵ Pero binalikid sanda ni Jesus ag pinangisgan.

⁵⁶ Tapos kara hay nagdiritso lang sanda sa ibang baryo.

Ro mga Dapat Isakripisyo ku Gustong Mangin Matuod nga Sumueunod ni Jesus

⁵⁷ Tag nagapinanaw sanda, may eaki nga naghambae kay Jesus, “Mamunot ako kimo bisan siin ka mag-adto bilang isaea sa imong mga sumueunod.”

⁵⁸ Nagsabat si Jesus, “Ro mga sapat sa taeon hay may buho nga ginaulian. Ro mga pispis hay may pugad, pero ako nga Unga it Tawo hay owa gid it bisan maeugban.”

⁵⁹ Tapos, may sangka tawo nga ginhambae ni Jesus, “Musyon. Sunod kakon.” Pero nagsabat ratong tawo, “Ginuo, gusto ko nga mangin sumueunod nimo, pero mauli anay kunta ako ag ipaeubong ro akong ama.”

⁶⁰ Nagsabat si Jesus, “Pabay-i ro mga patay sa panueok it Dyos nga mageubong ku andang patay. Pero ikaw't-a hay magpanaw ag magwali parti sa paghari it Dyos.”

⁶¹ May isaea pa gid nga naghambae kay Jesus, “Ginuo, mamunot ako kimo pero mauli anay ako sa amon agod mageaong.”

⁶² Pero naghambae si Jesus kana, “Ro tawo nga naila magsunod kakon pero perming nagabalik ro anang isip sa anang haaywanan nga pangabuhi hay parehas it tawo nga nagaarado pero nagainadwing. Ro tawo nga parehas kara hay bukon it bagay nga itapoe sa mga sinakpan it Dyos.”