Lucas 5 - Inkeanon

Ro Pagtawag ni Jesus ku Hauna Nana nga mga Sumueunod

¹ Isaeang adlaw, tag idto si Jesus nagatindog sa may baybayon ku Dagat it Genesaret, nagdaeaguso kana ro kaabo nga mga tawo agod magpamati it mensahi halin sa Dyos.

² Nakakita imaw idto it daywang ka baroto nga una sa bi-bi it dagat. Owa eon runa sa baroto ro mga mangingisda ay nagahugas sanda ku andang mga lambat sa tubi.

³ Nagsakay si Jesus sa sambilog sa mga baroto idto. Ro tag-ana ku baroto ngato hay si Simon. Ana dayon nga ginpangabay si Simon nga itikeod sa madaeom-daeom ro baroto. Pagkatapos, nagpungko imaw sa baroto ag nagturo sa mga tawo nga idto sa baybayon.

⁴ Pagkatapos ni Jesus it turo, ginhambae nana si Simon, “Daeha ro imong baroto sa madaeom ag itaktak ro inyong mga lambat agod makadakop kamo.”

⁵ Nagsabat si Simon, “Abaw, Sir, sang gabii ro among pagpinangisda pero owa gid kami it dakop. Pero bangod ruyon ro imong hambae hay di sige, itaktak ko ro mga lambat.”

⁶ Ngani gindaea nanda sa madaeom ro baroto ag gintaktak nanda ro andang mga lambat ag kaabo-abo ro andang hadakpan. Haeos magisi ro mga lambat sa kaabuon it hadakpan nga isda.

⁷ Ginsinyasan nanday Simon ro andang mga kaibahan sa sambilog pa nga baroto nga buligan sanda. Pag-abot ku andang mga kaibahan, ginbutang nanday Simon ro andang dakop sa daywang ka baroto. Napuno ro andang mga baroto ag matsa maeunod eon rato dahil sa kaabuon ku isda.

⁸ Pagkakita ni Simon Pedro kara hay nageuhod imaw sa atubang ni Jesus ag naghambae, “Paeayo kakon, Ginuo. Makasasaea ako.”

⁹ Nakahambae kara si Simon tungod hangawa gid imaw sa kaabo ku andang dakop. Hangawa man ro ay Pedro nga mga kaibahan,

¹⁰ pati man ro mga unga ni Zebedeo nga sanday Santiago ag Juan. Kaibahan gid ra sanda ni Simon sa pagpangisda. Nagsabat si Jesus kay Simon, “Ayaw mahadlok. Umpisa makaron, imbis nga isda ro inyong dakpon hay tawo ro inyong kumbinsihon nga magtuo kakon.”

¹¹ Pagkatapos, ginpabinit nanda ro mga baroto ag in-aywanan dayon nanda rato sa baybayon. Gin-aywanan nanda ro tanan bisan ro andang pagpangisda ag nagsunod kay Jesus, agod mangin anang mga sumueunod.

Ginpamayad ni Jesus ro Isaeang ka Aruon

¹² Kaisaea kato, idto si Jesus sa isaeang ka banwa. May tawo idto nga lipos it aro ro anang eawas. Pagkakita nana kay Jesus hay pinaeapitan nana ra ag naghapa sa anang atubang ag nagpakitluoy kana. Hambae ku aruon, “Ginuo, kasayod ako nga mapamayad mo ako kon gusto mo.”

¹³ Ginbuytan imaw ni Jesus ag ginhambae, “Gusto ko nga pamayron ka. Mayad ka eon!” Naduea eagi ro aro sa eawas ku tawo ngato.

¹⁴ Ginhambae imaw ni Jesus, “Ayaw gid magsugid kara bisan kanyo, pero umadto ka dayon sa saserdote ag magpatan-aw. Maghaead ka dayon it sakripisyo para sa imong paglimpyo suno sa Kasuguan ni Moises bilang pamatuod sa mga tawo nga mayad ka eon.”

¹⁵ Pero ro balita parti kay Jesus hay mas kapin nga nageapnaag ngani nag-adto kana ro kaabo nga tawo agod magpamati ag magpabueong.

¹⁶ Pero may mga beses nga ginaaywan nana sanda ag nagaadto imaw sa *disyerto agod magpangamuyo.

Ginpamayad ni Jesus ro Isaeang ka Paralitiko

¹⁷ Kaisaea kato, tag nagaturo si Jesus, may idto man nga mga *Pariseo ag mga *maestro it Kasuguan it Dyos nga nagapungko idto ag nagapamati. Idto pa sanda naghaealin sa mga kabaryuhan ku mga probinsya it Galilea ag Judea, ag pati man sa Jerusalem. Una kay Jesus ro gahom it Dyos agod makapamayad it mga nagamasakit.

¹⁸ May nag-abot dayon nga mga tawo nga may ginaeayungan nga paralitiko. Anda kunta imaw nga ginadaea sa sueod it baeay ag ibutang sa atubang ni Jesus,

¹⁹ ugaling hay indi sanda makasueod ay kaabo ro tawo. Ngani gindaea nanda rondatong paralitiko sa bubungan. Anda nga ginbuhuan ro bubungan nga tisa ag gintuntun sa tunga nanday Jesus ag ku mga tawo ro paralitiko nga nagaeubog sa ana nga eugban.

²⁰ Pagkakita ni Jesus nga nagatuo sanda kana nga mapamayad nana ro paralitiko, ginhambae ra nana, “Toto ginpatawad eon ro imong mga saea.”

²¹ Sa paino-ino it mga maestro it Kasuguan ag ku mga Pariseo, “Matsa kon sin-o gid imaw ra nga ana't-a nga tupungan ro Dyos! Sin-o eang ro makapatawad it mga saea kundi ro Dyos man lang?”

²² Pero sayod ni Jesus ro andang ginapaino-ino, ngani naghambae imaw kanda, “Ham-an it makaruyon 't-a ro inyong ginaisip?

²³ Ano ro mas maeumo nga ihambae? ‘Ginpatawad eon ro imong mga saea’ ukon, ‘Bangon ag magtikang’?

²⁴ Pero pamatud-an ko kinyo nga ako nga *Unga it Tawo hay may otoridad nga magpatawad it mga saea iya sa kalibutan.” Ginhambae dayon nana ro paralitiko, “Bangon, hakwata ro imong eugban ag umuli.”

²⁵ Bumangon eagi imaw sa atubang it mga tawo, hinakwat ro anang eugban ag umuli nga nagadinayaw sa Dyos.

²⁶ Hangawa gid it duro ro mga tawo ag gindayaw nanda ro Dyos sa andang grabi nga pagtaha kana. Hambae nanda, “Matsa indi mapatihan ro atong hakita ngara makaron!”

Gintawag ni Jesus Si Levi Agod Mangin Sumueunod Nana

²⁷ Pagkataliwan it pilang adlaw, nagpanaw si Jesus. Tag nagatikang imaw, hakita nana ro *manogsukot it buhis nga si Levi ro ngaean nga nagapungko sa anang opisina nga ginabayaran it buhis. Gintawag imaw ni Jesus, “Mali eon ay obrahon ko ikaw nga akon nga sumueunod.”

²⁸ Nagtindog dayon si Levi ag halin kato hay gin-aywanan nana ro tanan, ag nagsunod kay Jesus agod mangin ana nga sumueunod.

²⁹ Ku ulihi hay naghiwat it engrande nga handaan si Levi sa ana nga baeay para sa pagpadungog kay Jesus. Abo nga mga *manogsukot it buhis nga andang bisita ag iba pang mga tawo ro nagdungan kanda sa pagkaon.

³⁰ Pagkatapos kara hay ginbuslahan ku mga Pariseo ag ku mga maestro it Kasuguan nga kapareho nanda nga mga Pariseo man ro mga sumueunod ni Jesus ay naugot sanda. “Ham-an it nagasaeo kamo sa mga *manogsukot it buhis ag sa iba pa nga mga makasasaea?” hambae nanda.

³¹ Ginsabat sanda ni Jesus, “Ro mga mayad it eawas hay owa gakinahangean it doktor kundi ro mga masakiton eang.

³² Owa ako nag-adto riya agod pahinuesueon ro mga nagaeaom nga matarong eon sanda kundi rondato nga haom mag-ako nga sanda hay mga makasasaea.”

Indi Puyding Ibahon ro Daan nga Ginaturo ku mga Pariseo ag ro ay Jesus nga Bag-ong Ginaturo

³³ Pagkatapos, may mga tawo nga naghambae kay Jesus, “Ro mga sumueunod ni Juan nga Manogbawtismo hay permi nga nagapuasa ag nagapangamuyo, imaw man ro mga sumueunod it mga Pariseo. Pero ro imo nga mga sumueunod hay owa't-a gapuasa. Ham-an 't-a?”

³⁴ Nagsabat si Jesus kanda, “Kon may ponsyon, aeang-aeang ma't-a nga papuasahon ninyo ro mga amigo it nobyo sa ponsyon myentras kaibahan pa nanda imaw.

³⁵ Pero maabot ro oras nga bue-on kanda ro nobyo ag rikaron eon dayon sanda gapuasa dahil sa andang kasubo.”

³⁶ May gintao dayon kanda si Jesus nga mga halimbawa kon ham-an it indi puydi nga ibahon ro anang bag-o nga mga ginaturo ag ro daan nga ginaturo it mga Pariseo. Hambae nana, “Owa it gagisi it bag-o nga eambong agod eang ieupon sa gisi it daan eon nga eambong. Kon makaruyon ro imong obrahon, samaron mo ro bag-o nga eambong, ag ro gineupon ngato nga bag-o hay indi man mag-angay sa daan ngato nga eambong.

³⁷ Owa man it gabutang it bag-o nga bino sa daan nga panit nga sueudlan it bino ay kon magisi ra hay parehong kanugon ro bino ag ro sueudlan.

³⁸ Ngani dapat nga isueod ro bag-o nga bino sa bag-o man nga sueudlan.

³⁹ Owa it naila mag-inom it bag-o nga bino kon nakainom eon imaw it daan, tungod kon kana hay mas manami ro daan.”