Lucas 24 - Inkeanon

Ro Pagkabanhaw ni Jesus

¹ Pagkaaga-aga it Dominggo hay nag-adto sa eueubngan ro mga bayi ngato. Gindaea nanda ro mga mahumot nga bueong nga andang ginpahaom.

² Pag-abot idto hay hakita nanda nga bukas eon ro eueubngan ay hapaligid eon ro bato nga ginsara sa pwertahan.

³ Nagsueod sanda pero owa nanda hakita idto ro eawas ni Ginuong Jesus.

⁴ Naglitik ro andang ueo kon ano ro natabo. Samtang nagainisip sanda hay gulpi eang dayon nga may daywang ka tawo nga nagtindog maeapit kanda nga kasilaw-silaw ro andang eambong.

⁵ Hinadlukan it duro ro mga bayi pagkakita sa daywa mawron nga naghapa sanda sa eugta. Ginhambae sanda ku daywa ngato, “Ham-an it ginausoy 't-a ninyo ro buhi sa mga minatay?

⁶ Owa imaw iya. Nabanhaw eo't-a imaw. Dumduma ninyo nga tag idto pa kamo sa Galilea hay raya ro anang ginhambae kinyo,

⁷ ‘Ako nga Unga it Tawo hay dapat itugyan sa mga makasasaea, ieansang sa krus, mamatay ag mabanhaw sa ikatatlong adlaw.’ ”

⁸ Hadumduman dayon nanda ro hambae ngato ni Jesus.

⁹ Ngani nagpanaw sanda ag ginsugid sa onseng ka sumueunod ni Jesus pati man sa iba ro tanan nga natabo.

¹⁰ Ro mga bayi nga nagsugid kara sa mga apostoles hay sanday Maria Magdalena, Juana ag Maria nga nanay ni Santiago ag iba pa gid nga mga bayi nga kaibahan nanda.

¹¹ Pero eaom ku mga apostoles hay nagapinaumang eang sanda ngani owa sanda magpati.

¹² Pero tumindog si Pedro ag dumaeagan paadto sa eueubngan. Pag-abot nana idto hay nagyukbo imaw ag naglingling, ag owa imaw it ibang hakita kundi ro mga makitid nga maeahaeon nga tela nga ginbalibod sa eawas ni Jesus. Nagpanaw dayon imaw nga nagapalitik ku anang ueo kon ano ro natabo.

Nagpakita si Jesus sa Daywa ku Anang mga Sumueunod sa Daean PaEmaus

¹³ Ku rato man mismo nga adlaw, daywa ku mga sumueunod ni Jesus hay nagapaadto sa baryo nga Emaus kon tawgon. Mga onse kilometros ro kaeayo ku baryo ngato sa Jerusalem.

¹⁴ Tag nagatikang sanda hay andang ginaistoryahan ro tanan nga natabo.

¹⁵ Tag sige ro andang tinikang ag inistorya, naghingabot kanda si Jesus ag nagdungan.

¹⁶ Hakita nanda imaw pero owa nanda imaw makilaea ay ginlipod kanda nga imaw gali rato.

¹⁷ Naghambae si Jesus kanda, “Ano gid-a ro inyong ginaistoryahan ngaron samtang nagatinikang kamo?” Nagpundo sanda ag makita gid sa andang uyahon ro kasubo.

¹⁸ Nagsabat ro sambilog kanda nga si Cleopas ro ngaean. Hambae nana, “Ikaw ea't-a siguro sa mga bisita sa Jerusalem ro owa nakasayod kon ano ro nagkaeanabo ku mga pilang adlaw ngara.”

¹⁹ Naghambae si Jesus, “Anong mga natabo?” Nagsabat sanda, “Ro mga natabo kay Jesus nga tagaNazaret. Ginpamatud-an it Dyos sa mga tawo nga gamhanan imaw nga propeta paagi sa anang mga gin-obra ag ginhambae.

²⁰ Gintugyan imaw ku mga pinuno it mga saserdote ag ku iba pang mga manogdumaea naton agod sintinsyahan imaw it kamatayon, ag gineansang imaw sa krus.

²¹ Nagaeaom gid kami nga imaw eon ro magahilway katon nga mga inapo ni Israel, ugaling hay ikatlong adlaw eon ra nga ginpatay imaw ag owa pa gihapon it natabo.

²² Pero hangawa kami kaina ku ginsugid it pilang ka bayi nga mga kaibahan man namon nga nag-adto it aga-aga pa sa eueubngan.

²³ Owa nanda idto hakita ro anang eawas. Pagkatapos, gin-adtunan nanda kami ag ginsugiran. May nagpakita pa kuno kanda nga daywang ka anghel nga naghambae nga buhi't-a imaw.

²⁴ Nag-adto sa eueubngan ro iba namong mga kaibahan, ag owa't-a matuod ro anang eawas idto pareho sa ginhambae ku mga bayi ngani owa nanda imaw hakita.”

²⁵ Tapos, naghambae si Jesus, “Ay, mga kaumangon gid-a kamo. Owa gihapon kamo gapati sa tanan nga ginsugid it mga propeta.

²⁶ Bukon abi it bago mabaton ku Maneueuwas nga ginpromisa it Dyos ro anang indi matupungan nga kadungganan hay dapat anay nana nga maagyan ratong anang mga gin-antos?”

²⁷ Ginpaathag dayon kanda ni Jesus ro tanan nga ginsueat ni Moises ag ku tanan nga mga propeta parti kana nga nasueat sa Sagrado nga Kasueatan.

²⁸ Tag maeapit lang sanda sa baryo nga andang ginaadtunan, gadiritso't-a kunta si Jesus

²⁹ pero ginhawiran gid nanda imaw. Hambae nanda, “Iya ka lang eubog. Hapon eon nga mayad ag madueom-dueom eo't-a.” Ngani nagpahawid imaw kanda.

³⁰ Tag nagakaon eon sanda, ginbuoe ni Jesus ro tinapay ag ginpasaeamatan. Ginpihak-pihak nana dayon rato ag gintao kanda.

³¹ Habuksan dayon ro andang mata ag hakilaea nanda imaw pero gulpi eang dayon imaw nga naduea sa andang panueok.

³² Sinanda ku daywa, “Maw 't-a gali ron nga nalipay gid-a ro atong buot tag nagaistorya imaw katon sa daean ag tag ginapaathag nana katon ro Sagrado nga Kasueatan.”

³³ Pagkatapos hay pumanaw eagi sanda pabalik sa Jerusalem. Haabutan nanda idto nga nagatilipon ro onse ka sumueunod ni Jesus ag ro iba pa nandang mga kaibahan.

³⁴ Hambae nanda sa daywa nga bag-ong abot, “Matuod 't-a nga nabanhaw ro Ginuo! Nagpakita man imaw kay Simon!”

³⁵ Ginsugid man dayon ku daywa kon ano ro natabo tag sa daean sanda ag tag ginpihak-pihak nana ro tinapay hay dikato nanda hasayri nga imaw gali rato.

Ro Katapusan nga Pagpakita ni Jesus sa Anang mga Sumueunod ag ro Anang Mga Bilin Kanda

³⁶ Gaistorya pa ngani kara ro daywa tag gulpi eang nga nagpakita mismo si Jesus sa andang tunga. Hambae nana, “Patawhaya ro inyong paino-ino.”

³⁷ Hakibot gid-a sanda ag hinadlukan ay eaom nanda hay nakakita sanda it mueto.

³⁸ Naghambae si Jesus kanda, “Ham-an it nahadlok kamo ag nagaduda?

³⁹ Ako gid ra. Tan-awa tuo ninyo ro akong alima ag siki. Buyti ninyo ako agod makasiguro kamo. Ro mueto't-a hay owa it tue-an ag unod pareho ku inyong makita kakon nga may akon 't-a.”

⁴⁰ Pagkahambae nana kara, ana dayon nga ginpakita kanda ro anang siki ag alima.

⁴¹ Nalipay gid sanda ag nangawa man ngani haeos indi sanda makapati nga imaw rato matuod. Nagpangutana dayon si Jesus, “May makaon kamo iya?”

⁴² Gintaw-an nanda imaw it sang utod nga inihaw nga isda.

⁴³ Ginbaton nana rato ag ginkaon sa andang atubang.

⁴⁴ Naghambae pa gid si Jesus, “Ginhambae ko eon kato kinyo, tag nagailiba pa kita, nga ro tanan nga ginsueat ni Moises ag ku mga propeta ag sa Libro it mga Salmo parti kakon hay dapat nga matuman.”

⁴⁵ Ginbuligan dayon sanda ni Jesus nga maeubtan ro matuod nga kahueugan ku mga ginsueat parti kana sa Sagrado nga Kasueatan.

⁴⁶ Sa katapusan, ginhambae nana sanda, “Ngani sayod eon ninyo makaron nga nasueat eon eagi sa Kasueatan nga ro Maneueuwas nga ginpromisa it Dyos hay magaantos ag mamatay ag sa ikatlong adlaw hay mabanhaw.

⁴⁷ Ag nasueat man nga sa anang pangaean hay igawali sa tanan nga tawo, umpisa iya sa Jerusalem hasta sa bilog nga kalibutan, nga dapat sanda nga maghinuesoe ag magtalikod sa andang mga saea agod patawaron it Dyos.

⁴⁸ Hakita ninyo ro mga butang ngara nga natabo ngani dapat kamong magpamatuod parti kara sa mga tawo.

⁴⁹ Ag ako mismo ro magapaadto kinyo ku Espirito Santo nga ginpromisa ku akon nga Ama. Pero hueat anay kamo iya sa syudad hasta nga gamhan kamo it Espirito Santo halin sa eangit.”

Ginpakayab si Jesus sa Eangit

⁵⁰ Pagkatapos ni Jesus it hambae kara hay anang gindaea ro anang mga sumueunod sa guwa it Jerusalem hasta sa baryo it Betania. Pag-abot idto, gin-alsa nana ro anang mga alima ag ginbendisyunan sanda.

⁵¹ Samtang ginabendisyunan nana sanda hay amat-amat imaw nga nagbueag kanda ag ginpakayab sa eangit.

⁵² Nagsimba dayon sanda kana. Pagkatapos hay nagbalik sanda sa Jerusalem nga nagakalipay it duro

⁵³ ag idto sanda permi sa Templo nagadinayaw sa Dyos.