Lucas 21 - Inkeanon

Gindayaw ni Jesus Ro Haead it Pobreng Baeo nga Bayi

¹ Tag idto pa si Jesus sa *lagwirta it Templo hay hakita nana ro mga manggaranon nga nagahueog ku andang kwarta sa mga ginabutangan it kwarta nga ginahaead sa Dyos.

² Hakita man nana ro isaeang ka pobreng baeo nga bayi nga naghueog ku anang haead nga daywang ka pinakamanaba it kantidad nga sinsilyo.

³ Naghambae dayon si Jesus sa anang mga sumueunod, “Matuod rang ginahambae kinyo nga mas abo ro ginhueog ku ruyong pobre nga baeo kaysa sa kanda tanan.

⁴ Ginahambae ko ron ay ro ginhueog ku mga manggaranon hay tag kaisot eang nga parti ku sobra sa andang manggad, pero bisan pobre gid ro baeo ngaron hay gintao nana tanan bisan rato eon lang ro katapusan nanang kwarta.”

Ginhambae Eagi ni Jesus nga ro Templo hay Mawasak

⁵ Pagkatapos, may anang mga sumueunod nga gainistorya parti sa Templo nga human sa mga sadyaan nga bloke it mga bato ag ginpanami pa gid it mga sadyaan nga dekorasyon sa liwan it mga dingding nga ginhaead it mga manggaranon.

⁶ Naghambae si Jesus, “Maabot ro oras nga ro tanan nga inyo nga ginapamantaw ngaron hay mawasak gid. Owa gid it hibinlan nga nagataeangkas ku mga bato ngaron.”

Ro mga Paeatandaan ku Pagkawasak it Jerusalem ag ku Katapusan it Kalibutan

⁷ Nagpangutana kay Jesus ro anang mga sumueunod, “Maestro, hin-uno matabo ro imo ngatong ginhambae. Ano ro mga paeatandaan nga madali eon lang rato matabo?”

⁸ Nagsabat si Jesus, “Mag-andam gid kamo nga indi kamo hipataeang ay abo ro magaabot sa ulihi nga magagamit ku akon nga ngaean. Akuon nanda nga sanda gid ro Maneueuwas nga ginpromisa it Dyos ag mahambae man sanda nga madali eon lang ro oras. Ayaw kamo magsunod kanda.

⁹ Ayaw kamo mahadlok kon makabalita kamo nga may mga gira ag mga grabing kinagulo ay dapat gid-a nga matabo ron pero bukon pa it duyon ro katapusan it kalibutan.”

¹⁰ Naghambae pa gid si Jesus kanda, “Magagira ro mga nasyon ag imaw man ro mga ginharian.

¹¹ Magalinog it kabaskog ag may grabi nga tiggueutom ag tigpilisti sa iba-ibang mga lugar. May makita man sa kaeangitan nga mga daeagko ag makangingidlis nga mga paeatandaan.

¹² Pero bago raya magkaeatabo hay pagadakpon kamo ag pagahingabuton. Daehon man kamo sa mga pinuno it mga sinagoga ag prisuhon. Ipaatubang man kamo sa mga hari ag sa mga gobernador dahil mga sumueunod nakon kamo.

¹³ Kon matabo ron hay duyon eon ro inyong kahigayunan nga ikawali kanda ro Mayad nga Balita.

¹⁴ Dapat nga desidido kamo nga indi magpinahaom kon paalin sabton ro nagaakusar kinyo

¹⁵ ay ako ro magatao kinyo it inogsabat. Taw-an ko man kamo it kaaeam nga indi masukean o mabali it bisan sin-o sa inyong kuntra.

¹⁶ Traiduron kamo ku inyo pa mismo nga mga ginikanan, mga igmanghod, igbata ag amigo nga owa nagatuo kakon. Ro iba kinyo hay anda nga ipapatay.

¹⁷ Pagakaugtan kamo it tanan nga mga tawo dahil mga sumueunod nakon kamo

¹⁸ pero indi maalin bisan ro punta ku inyong buhok.

¹⁹ Paagi sa inyong pagtiis ku mga kalisod ngaron ag padayon nga pagtuo kakon hay makabaton kamo it kabuhi nga owa it katapusan.

²⁰ “Kon hikita ninyo nga ginalibutan eon it mga soldado ro Jerusalem hay dikaron eon ninyo hisayran nga madali lang gid ron waskon.

²¹ Ro mga idto sa Judea hay dapat nga magpaeagiw eagi sa kabukiran ag ro mga idto sa syudad hay dapat maghalin ag ro mga nagaobra sa eanas hay indi eon dapat magbalik sa syudad.

²² Ginapauna ko kinyo ra it hambae dahil rato ro oras nga matuman eon ro tanan nga nasueat sa Sagrado nga Kasueatan parti sa pagpina it Dyos sa Jerusalem.

²³ Malisdan gid it duro ro mga nabdos ag ro mga may ginapasuso kon mag-abot eon ruyong tyempo dahil grabi gid nga kalisod ro maabot sa nasyon ngara ag masamitan nanda ro kaakig it Dyos.

²⁴ Ro iba kanda hay magakaeamatay paagi sa espada. Ro iba hay bihagon ag daehon sa tanan nga mga nasyon sa kalibutan. Ro Jerusalem hay tapak-tapakon eang ku mga owa nagakilaea sa Dyos hasta nga ro tyempo nga itugot kanda it Dyos hay matapos.”

Ro mga Gakaeatabo Kon Magbalik Eon si Jesus, ro Unga it Tawo

²⁵ Nagpadayon si Jesus it hambae, “May makangawa-ngawa nga matabo sa adlaw, sa buean ag sa mga bituon nga mga paeatandaan nga madali eon lang ako magbalik. Iya sa kalibutan hay magaumang ro mga pumueuyo it mga nasyon sa kabaskog it humbak ag kasangag it kadagatan.

²⁶ Magakaealipong ro mga tawo sa kahadlok dahil ginapaabot nanda kon ano ro maeain nga matabo sa bilog nga kalibutan ay ro tanan nga una sa kaeangitan hay pagauyugon it mabaskog.

²⁷ Pagkatapos hay makita ninyo ako nga Unga it Tawo sa daeaura nga nagaabot iya sa kalibutan ag makita man ninyo ro akong gahom ag pwerting pagkadaeayawon.

²⁸ Ngani kon nagaumpisa eon it katabo ro mga butang ngara hay baskuga ro inyong buot ag ayaw kamo it kahadlok ay madali eon lang ro paghilway kinyo.”

²⁹ Nagturo dayon kanda si Jesus paagi sa rayang halimbawa. Hambae nana, “Tan-awa tuo ninyo ro kahoy nga higera ag bisan pa ngani ro iba pang mga kahoy.

³⁰ Kon magpangeumbay eon ngani sanda hay sayod eagi ninyo nga maeapit lang ro tigsililak.

³¹ Makaruyon man, kon hikita ninyo nga nagakaeatabo eon ro mga bagay nga ginhambae nakon hay masayran ninyo nga madali lang ag magahari eon gid ro Dyos.

³² Matuod rang ginahambae kinyo nga ro mga tawo sa makarong tyempo hay indi maubos it kaeamatay bago matabo raya tanang mga butang.

³³ Maduea eang ro eangit ag kalibutan pero ro akon tanan nga ginpangturo hay owa gid it pagkaduea bisan hasta hin-uno.

³⁴ “Ngani mag-andam gid kamo sa sobra-sobrang pagkinalipay ag pagpinahilong, ag pagpinalitik it ueo parti sa tanan nga kinahangeanon sa pagpangabuhi, ay magapugong ron kinyo sa pagpahaom sa akong pagbalik, ag basi hiabut-abutan kamo ku adlaw ngaron nga gulping maabot pareho ku pagpisik it kisiw.

³⁵ Magbantay kamo dahil gulpi eang maabot ro adlaw ngaron sa tanan nga iya sa ibabaw it kalibutan.

³⁶ Magbantay gid kamo ag magpangamuyo permi nga may inyo nga kusog agod maeampuwasan ro tanan ngara nga matabo, ag makaatubang kamo kakon nga Unga it Tawo nga owa it pagkatahap kon maghukom eon ako.”

³⁷ Ku ratong mga inadlaw, nagaturo si Jesus sa Templo kon adlaw ag kon gabii hay nagaguwa imaw sa syudad ag nagaadto sa Bukid it Olibo ag idto gaeubog.

³⁸ Ro tanan nga mga tawo hay agahon pa nagabangon ag nagaadto idto sa Templo agod magpamati kana.