Lucas 2 - Inkeanon

Ro Pagkatawo ni Jesus

¹ Tag si Augustus anay ro Emperador it Roma, nagpapanaog imaw it mando nga ro tanan nga pumueuyo it mga nasyon nga sakop it Roma hay kinahangean nga magpalista.

² Rato ro primero nga sensus ag si Quirinius ro gobernador it Syria tag ginhimo rato.

³ Ngani ro mga tawo hay nag-ueuli sa andang banwang natawuhan agod magpalista.

⁴ Nagpanaw si Jose halin sa Nazaret nga sangka banwa it Galilea paadto sa Betlehem nga sangka banwa man it Judea nga lugar nga natawuhan ni Haring David. Idto imaw nag-adto ay isaea imaw sa mga inapo ni Haring David.

⁵ Nagpalista idto si Jose kaibahan si Maria nga anang gin-asawa pero owa pa sanda gaiba. Manog-unga eon kato si Maria ag

⁶ tag idto eon sanda sa Betlehem hay rato man ro tyempo nga ginsaeapuan imaw.

⁷ Nag-unga imaw ku anang panganay ag eaki rato. Ana ra nga ginputos it lampin ag ginpaya sa pasungan nga kaean-an it sapat ay owa it bakanti nga kwarto sa baeay nga andang ginsakaan.

Ginpahisayod ku mga Anghel ro Pagkatawo ni Jesus sa mga Manogbantay it Karnero

⁸ Ku ruyon man nga gabii idto sa pahangeaban nga maeapit sa Betlehem hay may mga manogbantay it karnero nga nagabantay ku andang mga panong.

⁹ Gulpi eang dayon nga may nagpakita kanda nga anghel it Ginuong Dyos ag ginhayagan sanda ku grabi nga kasilaw it Dyos. Hinadlukan gid sanda it duro.

¹⁰ Pero naghambae ro anghel, “Ayaw kamo mahadlok. May akon nga mayad nga balita kinyo nga makapalipay gid sa tanan nga mga tawo.

¹¹ Makaron sa banwa nga natawuhan ni Haring David, natawo ro inyong Maneueuwas. Imaw ro Ginuo, ro *Kristo nga ginpromisa it Dyos.

¹² Ro paeatandaan nga matuod ro akon nga ginahambae hay makakita kamo it eapsag nga naputos it lampin ag napaya sa pasungan.”

¹³ Gulpi dayon nga nag-iba sa anghel ngato ro kaabo-abo pa gid nga mga anghel halin sa eangit. Nagdayaw sanda sa Dyos. Sinanda,

¹⁴ “Daeayawon ro Dyos sa pinakamataas nga kaeangitan, ag sa kalibutan hay katawhayan sa mga katawhan nga anang nahamut-an.”

¹⁵ Pagkatapos, naghalin ro mga anghel ag nagbalik sa eangit. Pagkahalin nanda, nagsaeampitan ro mga manogbantay ngato, “Musyon, maadto kita sa Betlehem ag tan-awon naton rondaya nga natabo nga ginsugid katon it Ginuong Dyos paagi sa anang anghel.”

¹⁶ Nagdali-dali sanda it pag-adto idto sa Betlehem ag anda nga gin-usoy ro ginhambae it anghel. Hakita nanda sanday Maria ag Jose ag hakita man nanda ro eapsag nga napaya sa pasungan.

¹⁷ Pagkakita nanda sa eapsag hay anda nga ginsugid sa mga tawo idto ro ginhambae kanda it anghel parti sa unga.

¹⁸ Ag tanan nga nakabati hay hangawa sa ginsugid kanda ku mga manogbantay.

¹⁹ Pero si Maria ma't-a hay ginpinaino-ino it madaeom ro tanan ngato nga mga natabo ag owa gid rato maduea sa anang isip.

²⁰ Nagbalik dayon ro mga manogbantay sa andang pahangeaban. Samtang nagapanaw sanda hay nagadayaw ag nagapasaeamat sanda sa Dyos dahil sa tanan nga andang hakita ag habatian nga natabo pareho ku ginsugid kanda it anghel.

²¹ Tag waeong adlaw eon ro eapsag, gintuli imaw ag ginpangaeanan it Jesus pareho sa ngaean nga ginhambae it anghel bago pa imaw ginpanamkon.

Gindaea si Jesus sa Templo Agod Ihaead sa Dyos

^22-24 Nag-abot eon ro adlaw nga kinahangean nga tumanon nanday Jose ag Maria ro kasuguan it Ginuong Dyos nga ginsueat ni Moises parti sa mga bayi nga bag-ong nakaunga. Ngani nag-adto sanda sa Jerusalem agod tumanon ro kasuguan ngato nga maghaead it pangsakripisyo nga daywang ka salampati o daywang ka talin nga alimukon. Gindaea man nanda ro eapsag nga si Jesus agod ihaead sa Ginuong Dyos ay suno sa *Kasuguan it Dyos hay “Ro kada panganay nga eaki hay ana eang it Ginuong Dyos.”

²⁵ May isaeang ka tagaJerusalem nga si Simeon ro ngaean. Matarong ra imaw nga tawo ag matinumanon sa Dyos. Nagahawat-hawat gid ra ginhawa nga euwason it Dyos ro anang mga kadugo nga mga inapo ni Israel ag ginagamhan ra imaw permi it Espirito Santo.

²⁶ Ginpahayag kana ku Espirito Santo nga indi imaw mamatay hasta indi nana hikita ro Maneueuwas nga ginpromisa it Ginuong Dyos.

²⁷ Ginpaadto si Simeon ku Espirito Santo sa Templo ku ruyon man nga adlaw nga gindaea nanday Jose ro eapsag nga si Jesus agod tumanon ro ginapasunod it Kasuguan parti sa mga eapsag.

²⁸ Pagkakita kanda ni Simeon hay ginbuoe nana ro eapsag ag ginkuekoe. Nagdayaw dayon imaw sa Dyos. Sinana,

²⁹ “Makagagahom nga Ginuong Dyos, puydi mo eon nga bawion ro hueam nga kabuhi nakon nga imong ulipon. Gintuman mo eon ro imong promisa kakon ngani matawhay eon ro akong paino-ino

³⁰ ay hakita ko eon mismo ro Maneueuwas nga imong ginpadaea iya.

³¹ Ginplano mo eon kon paalin makaeuwas ro tanan nga rasa it tawo ag hikita nanda ro magaeuwas kanda.

³² Imaw hay pareho it kahayag nga magapaathag ku imong kamatuuran sa mga bukon it *Judio. Ag tungod kana, pagapadunggan kami nga imong mga katawhan nga mga inapo ni Israel.”

³³ Hangawa gid ro mga ginikanan ku eapsag sa ginpanghambae ni Simeon parti kana.

³⁴ Ginbendisyunan dayon sanda ni Simeon. Ag ginhambaean pa nana si Maria nga nanay ku eapsag, “Pamatii it mayad ro akong ihambae ngara. Suno sa ginplano it Dyos kato pa, ro unga ngara hay mangin dahilan it kasamaran ag kaeuwasan it abo nga mga inapo ni Israel. Mangin tanda imaw nga magaturo it daean paadto sa Dyos pero abo ro indi kana magpati.

³⁵ Igahayag nana ro matuod nga baeatyagon ag paino-ino it mga tawo. Ag ikaw, Maria hay makabatyag it grabi nga kasubo nga matsa ginapihak it espada ro imong dughan.”

³⁶ May idto man nga magueang eon gid nga bayi nga propeta it Dyos nga ro ngaean hay si Ana. Unga ra imaw ni Fanuel nga isaea sa mga inapo ni Asher. Bata pa imaw nag-asawa ag nabaeo imaw pagkataliwan it pitong dag-on nga pag-iba nandang mag-asawa.

³⁷ Otsenta e kwatro anyos eon imaw nga nabaeo ag idto imaw permi sa Templo. Adlaw-gabii hay nagasimba imaw sa Dyos. Permi man imaw nga nagapuasa ag nagapangamuyo.

³⁸ Tag idto sanday Jose sa Templo hay nagpaeapit si Ana kanda ag nagpasaeamat imaw sa Dyos dahil sa andang unga. Ag ginsinugid dayon nana ro parti sa unga ngato sa tanan idto nga nagahueat man ku oras nga pagahilwayon it Dyos ro tanan nga mga inapo ni Israel.

³⁹ Tag hatuman eon nanday Jose ag Maria ro tanan nandang dapat obrahon suno sa Kasuguan it Ginuong Dyos hay nag-uli sanda sa Nazaret nga sakop ku probinsya it Galilea.

⁴⁰ Nagbahoe si Jesus nga may mabaskog nga eawas ag indi matupungan nga kaaeam ag ginpinakamaayo imaw it Dyos.

Nagpabilin si Jesus sa Templo

⁴¹ Kada dag-on hay nagapaJerusalem sanday Jose ag Maria para sa Pagtililipon sa Pagdumdum ku *Pagtaliwan.

⁴² Tag dose anyos eon si Jesus hay nag-adto eon man sanday Jose ag Maria sa Jerusalem pareho ku andang kinaandan nga ginaobra ag gindaea eon nanda si Jesus.

⁴³ Pagkatapos it pagtililipon hay nag-uli eon sanda pero nagpabilin si Jesus sa Jerusalem ag owa ra hapan-uhi nanday Jose ag Maria.

⁴⁴ Eaom nanda hay idto si Jesus nakaiba sa andang mga kaibahan nga nagaueuli man. Sang adlaw eon ro andang pagpinanaw bago nanda hapan-uhan nga owa't-a si Jesus. Anda imaw nga gin-inusoy sa andang mga igbata ag kakilaea.

⁴⁵ Pero owa gid nanda hakita si Jesus, ngani nagbalik sanda sa Jerusalem agod usuyon imaw.

⁴⁶ Kat ikatatlong adlaw eon hay hakit-an nanda si Jesus sa *lagwirta it Templo. Gapungko imaw kaibahan ku mga ginatahod nga mga maestro it mga Judio. Nagapamati imaw kanda ag nagapangutana man.

⁴⁷ Ro tanan nga nagapamati kana hay hangawa gid sa anang kaaeam ag sa anang pagsabat man sa mga pangutana ku mga maestro ngato.

⁴⁸ Pagkakita nanday Jose kay Jesus hay hangawa gid sanda it duro. Nagpaeapit ro anang ina ag naghambae kana, “Toto, ham-an it haobra mo't-a ra kamon? Nahawag gid kami ni Tatay mo kimo ngani gin-inusoy ka namon.”

⁴⁹ Nagsabat imaw kanda, “Ham-an 't-a it gin-inusoy ninyo ako? Owa baea kamo kasayod nga iya dapat ako sa baeay it akong Ama, ag nagahimo ku anang pagbuot?”

⁵⁰ Pero owa nanda haeubti ro ay Jesus nga buot hambaeon.

⁵¹ Nagmunot kanda si Jesus pauli sa Nazaret ag sa anang pagbahoe hay nagpadayon imaw nga matinumanon kanda. Ro tanan ngatong natabo hay gintanom ni Maria sa anang paino-ino.

⁵² Nagbinahoe si Jesus ag nag-inaeam pa gid. Ginkinahamut-an pa gid imaw it Dyos ag ku mga tawo.