Lucas 18 - Inkeanon

Ro Istorya Parti sa Baeo nga Owa Naayawi Magpinangayo it Bulig

¹ Pagkatapos, may ginsugid si Jesus nga sangka paanggid nga istorya agod tud-an ro anang mga sumueunod nga dapat sandang magpangamuyo permi ag indi pageuyahan it buot.

² Hambae nana, “Sa sangka banwa hay may huwis nga owa it ginatahod, bisan pa ro Dyos.

³ May baeo man sa banwa ngato nga permi nga nagabinalik-balik sa huwis ag nagapangayo it hustisya kuntra sa nag-agrabyo kana.

⁴ Ku primero hay owa gid mag-inato ro huwis pero ku ulihi, sinana sa anang paino-ino, ‘Owa ako gatahod bisan kanyo, bisan pa sa Dyos,

⁵ pero dahil ginasinupae ako ku baeo ngara hay buligan ko lang imaw sa anang diritso, ay kon indi hay ana ako kara nga pagbinalik-balikon hasta tak-an ako kana.’ ”

⁶ Naghambae dayon ro Ginuo, “Isipa ninyo nga bisan bukon it matarong ro huwis ngato hay ana gihapon nga ginbuligan ro baeo ngato.

⁷ Bukon abi it mas kapin pa gid ro Dyos nga matarong gid? Anang taw-an it hustisya ro anang mga pinili nga katawhan nga ginmaltrato nga nagapinangayo it bulig kana adlaw-gabii. Indi gid imaw matak-an sa andang pagpinangayo kana.

⁸ Ginahambae ko kinyo nga sa tama nga oras hay ana eagi sanda nga taw-an it hustisya. Pero kon magbalik ako nga Unga it Tawo iya sa kalibutan, may hiabutan pa baea ako nga mga tawo nga makarayang klasi ro pagtuo nga nagapadayon sa pagpangamuyo?”

Ro Istorya Parti sa Pariseo ag ro Manogsukot it Buhis

⁹ Nagsugid pa gid si Jesus it sangka paanggid nga istorya sa mga tawo idto nga nagapati gid-a nga mga matarong sanda ngani andang ginasika-sika ro iba.

¹⁰ Hambae ni Jesus, “May daywang ka tawo nga nagsueod sa Templo agod magpangamuyo. Ro sambato hay Pariseo ag ro isaea hay *manogsukot it buhis.

¹¹ Nagtindog ro Pariseo ag nagpangamuyo nga ginapabugae ra kaugalingon. Hambae nana, ‘Gapasaeamat ako kimo, Dyos ko, nga bukon ako it pareho ku ibang tawo nga buyong, bukon it matarong, ag hangawatan. Ag gapasaeamat gid-ang nga bukon ako it pareho ku *manogsukot it buhis ngato.

¹² Nagapuasa ako it daywang beses sa sang dominggo ag gatao ako it ikanapueong parti ku tanan nakong kinitaan.’

¹³ “Pero ro *manogsukot it buhis ma't-a nga nagatindog idto sa maeayo-eayo hay indi ngani makatangda sa eangit sa kahuya ag ginabinayo ro anang dughan, tanda ku anang paghinuesoe. Hambae nana, ‘Makasasaea ako, Dyos ko. Kaeuuyi man ako!’ ”

¹⁴ Hambae ni Jesus, “Ginahambae ko kinyo nga pag-uli ku manogsukot hay imaw 't-a ro matarong eon sa mata it Dyos ag bukon it ratong Pariseo. Ro tanan nga matinaas-taason hay pagasumpuon it Dyos ag ro mga mapainubuson hay pagapadunggan it Dyos.”

Dapat Naton nga Tuearon ro mga Unga sa Atong Pagtuo kay Kristo

¹⁵ Isaeang adlaw, may mga tawo nga nagdaea ku andang mga maintok nga mga unga pati ku andang mga eapsag agod hibuytan ag hibendisyunan sanda ni Jesus. Ugaling pagkakita kara ku anang mga sumueunod hay andang ginpangisgan ratong mga tawo.

¹⁶ Pero ginpapaeapit sanda ni Jesus kana ag naghambae imaw sa anang mga sumueunod, “Pabay-i nga magpaeapit kakon ro mga unga. Ayaw ninyo sanda pagbawaei tungod ro mga pareho kanda ro ginatapoe sa mga sinakpan it Dyos.

¹⁷ Matuod rang ginahambae kinyo nga ro bisan sin-o nga owa nagabaton ku paghari it Dyos sa anang kabuhi pareho sa malipayon nga pagbaton ku mga unga hay indi matapoe sa mga sinakpan it Dyos.”

Malisdan ro mga Manggaranon nga Magsunod it Hantop kay Jesus

¹⁸ Tapos, may sangka manogdumaea it mga Judio nga naghambae kay Jesus, “Maestro, mayad ka nga tawo. Ano ro akon nga dapat obrahon agod mabaton ko ro kabuhi nga owa it katapusan?”

¹⁹ Nagsabat si Jesus, “Ham-an it ginatawag mo ako nga mayad? Owa it ibang mayad kundi ro Dyos eang.

²⁰ Parti ma't-a sa imong pangutana hay raya ro akong sabat. Hasayran mo ro mga kasuguan nga: ‘Indi ka magpangawatan, indi ka magpatay, indi ka magpanakaw, indi ka magtestigo it pinuril, tahura ro imong ginikanan.’ ”

²¹ Nagsabat ro manogdumaea, “Ginatuman ko eon ron tanan halin ku bata pa ako hasta makaron.”

²² Pagkabati kara ni Jesus, ginhambae nana ro manogdumaea, “Sambilog pa gid ro dapat nimong obrahon. Baligyaan tanan ro imong pagkabutang ag ipanueupod sa mga pobre ro kabakeanan, ag may imo dayon nga manggad idto sa eangit. Pagkatapos hay bumalik ka agod mangin sumueunod nakon.”

²³ Pagkabati kara ku tawo hay nasubo gid imaw it duro ay pwerti abi imaw ka manggaranon.

²⁴ Pagkakita ni Jesus ku anang grabi nga kasubo hay naghambae imaw, “Malisod gid-a sa mga manggaranon nga magpasakop sa paghari it Dyos sa andang tagipusuon.

²⁵ Mas maeumo pa sa mabahoe nga sapat pareho it kamelyo nga mageapos sa tuhob it dagom kaysa sa manggaranon nga magpasakop sa paghari it Dyos sa andang tagipusuon.”

²⁶ Nagpangutana ro mga tawo nga nagapamati kana. Hambae nanda, “Hay sin-o ea't-a gali kara ro maeuwas?”

²⁷ Nagsabat si Jesus, “Ro imposible sa tawo hay posible't-a sa Dyos.”

²⁸ Tapos, hambae ni Pedro, “Hay paalin 't-a kami? Ginpang-aywanan namon ro tanan-tanan ag nagsunod kimo.”

²⁹ Naghambae si Jesus kanda, “Matuod rang ginahambae kinyo nga makabaton gid it baeos ro tanan nga mag-ayaw ku andang baeay o asawa o mga igmanghod o ginikanan o mga unga tungod sa andang pagwali parti sa paghari it Dyos.

³⁰ Sa makaron hay makabaton sanda it mas pa gid kaysa sa andang gin-aywanan ag sa pihak nga kinabuhi hay taw-an sanda it kabuhi nga owa it katapusan.”

Ro ay Jesus nga Ikatlong Beses nga Paghambae Parti sa Anang Kamatayon

³¹ Gindaea dayon ni Jesus sa binit ro anang dose nga ka sumueunod ag ginhambae, “Pamati anay kamo kakon! Nagapaeangop eon kita sa Jerusalem ag ro tanan nga ginsueat it mga propeta parti kakon nga Unga it Tawo nga idto matabo hay matuman.

³² Traiduron ako ag itugyan sa mga owa nagatuo sa Dyos. Anda ako nga intrimison, pakahuy-an ag pil-an.

³³ Anda man ako nga latiguhon ag patyon pero sa ikatlong adlaw hay mabanhaw ako.”

³⁴ Pero owa gid sanda kaeubot ku ay Jesus nga mga ginhambae ay ginlipod kanda ro kahueugan kato.

Nagpamayad si Jesus it Sangka Bulag

³⁵ Tag maeapit eon lang sanday Jesus sa Jerico, may idto nga bulag nga nagalingkod sa binit it daean ag nagapakalimos.

³⁶ Habatian nana ro abong tawo nga nagainagi ngani nagpangutana imaw, “May ano ay?”

³⁷ Nagsabat ro mga tawo, “Gaagi rikara si Jesus nga tagaNazaret.”

³⁸ Nagsinggit dayon ro bulag, “Jesus! Apo ni Haring David, maeuoy ka kakon!”

³⁹ Ro mga tawo nga gauna kay Jesus hay nagsinaway sa bulag ngato nga maghipos. Pero imbis nga maghipos hay ginbinaskog pa gid ngani nana ro anang pagsinggit. Hambae nana, “Jesus, Apo ni Haring David! Maeuoy ka man kakon!”

⁴⁰ Pumundo si Jesus ag ginpadaea nana ro bulag sa anang atubang. Tag gaatubang eon sanda, ginpangutana ra ni Jesus,

⁴¹ “Ano ring gusto nga obrahon ko kimo?” Nagsabat ro bulag, “Ginuo, gusto ko nga makakita it uman.”

⁴² Ginhambae imaw ni Jesus, “Matuman ron! Makakita ka eon it uman! Nagmayad ka ay nagsalig ka kakon.”

⁴³ Nakakita eagi it uman ro tawo ag nagsinunod dayon imaw kay Jesus nga nagadinayaw sa Dyos. Ag ro tanan nga mga tawo nga nakakita ku natabo hay nagdayaw man sa Dyos.