Lucas 17 - Inkeanon

Indi Naton Pagtentaron ro Iba nga Magpakasaea ag Patawaron Naton ro Nagakasaea Katon

¹ Naghambae si Jesus sa anang mga sumueunod, “Indi gid malikawan nga nagaabot ro mga tentasyon pero makangingidlis gid ro matabo sa ulihi sa nagatentar sa anang isigkatawo nga magkasaea.

² Mas mayad pa't-a nga hinigtan imaw it mabahoe nga galingan nga bato sa liog ag tinagbong sa eawod kaysa sa masamitan na ro pina it Dyos sa ulihi kon makatentar imaw nga magkasaea ro bisan sambilog eang sa mga bukon pa it malig-on ro pagtuo kakon.

³ Ngani bantayi ro inyong hueag. “Kon magkasaea kimo ro imong igmanghod, hambaei imaw, ag kon magpangayo imaw it patawad hay patawara.

⁴ Bisan magkasaea pa imaw kimo it pitong beses sa sang adlaw ag magbinalik ag magpinangayo imaw it patawad sa kada pagkasaea nana kimo hay dapat nimo imaw nga patawaron.”

⁵ Pagkabati ku mga apostoles sa ginhambae ngato ni Jesus, naghambae sanda kana, “Dugangi pa gid ro among pagtuo.”

⁶ Nagsabat ro Ginuo, “Kon may inyo nga pagtuo nga bisan mat busoe eang it mustasa it bahoe, ag halimbawa nga ginsugo ninyo ro mabahoe ngara nga kahoy nga gabuton nana ro anang kaugalingon ag itanom sa eawod hay tumanon 't-a kamo karon.”

Dapat nga Mapainubuson Kita sa Pagtuman sa Dyos, Bukon Eang it Para Dayawon

⁷ Naghambae pa gid si Jesus, “Halimbawa abi nga may imong ulipon. Gaarado imaw o gabantay it karnero. Pagkauli nana halin sa anang obra, ginahambae baea nimo imaw nga magkaon eagi ag ikaw nga anang amo hay owa pa ngani kakaon?

⁸ Bukon abi it imo anay imaw nga ginahambae, ‘Mag-ilis ka anay ag hikutan mo dayon ako it ihapon. Pagkatapos hay serbihan mo ako it pagkaon ag mainom. Kumaon ka dayon kon tapos eon ako.’

⁹ Dapat baea nga magpasaeamat ro amo sa ulipon dahil gintuman ro anang sugo? Indi't-a dapat ron ay ruyon ma't-a ro obligasyon it ulipon.

¹⁰ Makaruyon man kamo. Kon gintuman ninyo ro tanan nga ginsugo kinyo it Dyos, ayaw kamo mag-isip nga dapat kamo nana nga dayawon kundi butangan sa inyong isip nga, ‘Mga ulipon man lang kami it Dyos. Gin-obra man lang namon ro among obligasyon.’ ”

Sambilog Eang ro Nagpasaeamat kay Jesus sa Napueo nga Ginpamayad Nana

¹¹ Tag nagapadayon si Jesus sa anang pagpamanawon paadto sa Jerusalem, idto imaw nag-agi sa may dueunan it probinsya it Samaria ag probinsya it Galilea.

¹² Tag nagapasueod eon imaw sa sangka baryo, may napueong ka aruon idto nga nagsueang-sueang kana pero pumundo sanda tag maeayo-eayo pa sanda kay Jesus

¹³ ag nagsinggit, “Jesus! Sir! Maeuoy ka kamon!”

¹⁴ Pagkakita kanda ni Jesus hay naghambae imaw, “Adto kamo sa mga saserdote ag magpatan-aw.” Nagpanaw sanda ag tag sa daean pa eang sanda hay nagmayad ro andang aro.

¹⁵ Pagkapan-o it sambilog kanda nga nagmayad eon imaw hay bumalik imaw ag nagsininggit it pagdayaw sa Dyos.

¹⁶ Naghapa imaw sa atubang ni Jesus ag nagpinasaeamat kana. TagaSamaria pa gali ro tawo ngato.

¹⁷ Naghambae si Jesus, “Bukon abi it napueo ro nagmayad? Hay siin 't-a ro siyam?

¹⁸ Ham-an it daya eang nga bukon pa it Judio ro nagbalik agod magdayaw sa Dyos?”

¹⁹ Ginhambae dayon ni Jesus ratong tawo, “Tindog ag pumanaw ka eon. Naeuwas ka tungod nagatuo ka kakon.”

Pagturo Parti sa *Paghari it Dyos ag sa Pagbalik ni Jesus Iya sa Kalibutan

²⁰ May mga Pariseo nga nagpangutana kay Jesus kon hin-uno eon magahari ro Dyos sa kalibutan. Nagsabat si Jesus, “Indi makita it mata ro pag-abot ku paghari it Dyos

²¹ tungod ro paghari it Dyos hay ro anang paghari sa inyong tagipusuon. Ngani owa it makahambae nga iya eon o idto mana dikato.”

²² Tapos ginhambae nana sa anang mga sumueunod, “Maabot ro tyempo nga inyong handumon nga makasamit bisan sang adlaw eang ku daeayawon nga paghari nakon nga Unga it Tawo, pero indi pa ron puydi.

²³ May mahambae kinyo nga idto mana imaw o hara mana, iya imaw. Ayaw kamo it pati ag munot kanda,

²⁴ tungod ro pagbalik nakon nga Unga it Tawo hay pareho it kilat nga gaguhit ro hayag sa bilog nga kaeangitan ag makita it tanan nga tawo.

²⁵ Pero bago ako magbalik hay dapat mag-antos anay ako it abo nga kalisod, ag indi pagpatihon ku mga tawo sa makaron nga tyempo.

²⁶ “Ro ginaobra ku mga tawo sa tyempo nga magbalik ako nga Unga it Tawo hay pareho man sa ginaobra ku mga tawo sa tyempo anay ni Noe.

²⁷ Bangod kato, bago nagbaha hay owa sanda mag-inato ku maabot nga kaeaeat-an kundi sa adlaw-adlaw hay normal ma't-a gihapon ro andang pagpangabuhi nga nagakaon, nagainom, ag nagaaeasawa hasta sa oras nga nagsueod sanday Noe sa arka. Nagbaha dayon ag nagkaeaeumos sanda tanan.

²⁸ Makaruyon man kato ro hilimuon it mga tawo sa tyempo ni Lot tag idto imaw nag-istar sa Sodoma. Nagakaon, nagainom, nagapamakae, nagabaligya, nagatanom, ag nagapatindog sanda it baeay, pareho gid it normal nga pagpangabuhi.

²⁹ Pero sa adlaw nga naghalin sanday Lot sa Sodoma hay ginpaueanan it Dyos it kaeayo ag nagadaba-daba nga asupre ro ratong lugar ag nagkaeamatay ag nagkaeasamad ro tanan idto.

³⁰ Makaruyon man nga bukon it haom ro mga tawo kon magbalik ag magpakita eon ako nga Unga it Tawo.

³¹ “Pag-abot ku adlaw ngaron, kon may tawo nga idto sa atop ku anang baeay hay dapat nga magpaeagiw eagi imaw ag indi eon magsueod sa baeay agod bue-on ro anang pagkabutang. Ag ro nagaobra sa eanas hay indi eon dapat nga mag-uli.

³² Dumduma ninyo ro natabo sa asawa ni Lot.

³³ Ro bisan sin-o nga naila nga magsunod sa ana eang nga gusto sa anang kabuhi hay mamatay man gihapon ag pinahan sa impyerno. Pero ro bisan sin-o nga magsakripisyo ku anang gusto agod sundon ro akong pagbuot hay makabaton it kabuhi nga owa it katapusan.

³⁴ “Ginahambae ko eagi kinyo nga kon gabii ako magbalik, kon may daywa nga nagahulid sa katri pero sambato eang kanda ro akong sumueunod hay bue-on ro sambato kanda ag hiaywanan ro anang kaibahan.

³⁵ Kon may daywang ka bayi nga nagabayo pero sambato eang kanda ro akong sumueunod hay bue-on kanda ro sambato ag hiaywanan ro sambato.”

³⁷ Nagpangutana dayon ro anang mga sumueunod, “Siin ra matabo, Ginuo?” Nagsabat si Jesus, “Matabo gid ra pareho it haeambaeunon nga madali hikita kon siin kampi ro may patay nga eawas tungod idto ro mga pispis nga buwitri nagadaeapo agod magtuka.”